Depois do obrigado parom natalício, o Grupo de Estudos do Mádia Leva e a EPG retomam a actividade do primeiro trimestre, que se valorizou mui positivamente por assistência e participaçom.

Avaliada a natureza da crise que se está a viver, passamos neste segundo trimestre a estudar as alternativas em andamento. As primeiras sessons do debate centrarám-se nas diferentes visons e linhas de acçom no campo independentista e da esquerda, tentando deslindar o que som simples modas intelectuais (passageiras e diversionistas) das correntes de pensamento de fundo que podem acompanhar umha praxe digna de tal nome.

Para tal efeito, disponibilizamos umha escolma de textos de Xosé Manuel Beiras, Alain Touraine, Serge Latouche e Alex Callinicos. Repassarám-se assi diferentes variedades da esquerda tolerada, também conhecida como "cidadanismo", e valorará-se o "ajuste de contas" que, desde o marxismo, acomete Alex Callinicos contra Toni Negri e outros.

Os textos estarám a disposiçom das pessoas assistentes desde a próxima segunda feira no centro social. A cea-colóquio decorrerá na sexta 15 a partir das 21hoo.

Nos últimos dias de dezembro as pessoas responsáveis das distintas áreas da EPG (um clautro docente de facto), procederom a fazer umha primeira avaliaçom do desenvolvimento do programa formativo do primeiro trimestre. Tendo em conta que este trimestre era o primeiro e tinha, polo tanto, moito de experimento inicial, desde o claustro valoramos positivamente estes primeiros passos da nossa Escola, ainda que som muitos os aspectos e detalhes que se podem melhorar.

Como aspectos mais positivimos destacamos os seguintes:
- A boa organizaçom e o bom desenvolvimento da maioria dos cursos.
- A boa acolhida do programa formativo entre o público objectivo ao que nos dirigiamos.
- O nível de asistência. A média de pessoas matriculadas e asistentes aos cursos situa-se por volta dos/as 15 alunos/as. Globalmente, o número de pessoas asistentes à totalidade dos cursos achéga-se a 100.
- A disponhibilidade e a cualificaçom do pessoal docente.
- A relativa diversificaçom da oferta formativa e a sua distribuiçom polo país adiante: Vigo, Ourense, Ames e Ordes.

Porém, também há certos aspectos que cumpre melhorar:
- A feble organizaçom dalgumhas áreas; o que obrigou a cancelar algúns cursos.
- O desequilibrio entre a oferta centrada nas humanidades e nas ciências sociais (tradicionalmente mais cubertas polos movimentos sociais da comunidade independentista) e a oferta centrada em conhecimentos mais praticos e técnicos.

Neste momento, estamos trabalhando na elaboraçom do programa formativo do segundo trimestre, o qual se fará público neste blogue nos primeiros dias de janeiro.

Publicamos para todas as pessoas interessadas o horário e palestras definitivas das jornadas de história a celebrar no vindouro fim de semana. Com motivo da ausência dum dos conferenciantes, Xurxo Martínez, decidimos fundir todas as sessons no próprio sábado. O horário fica como segue.

10h00-12h00. "Movimentos sociais na Galiza de anteguerra". Carlos Velasco Souto, Universidade da Crunha.

Recesso.

12h15-14h15. "Galiza baixo o franquismo. Política, economia, sociedade". Xavier Sánchez Paços, Escola Popular Galega.

Jantar.

16h00-18h00. "O movimento obreiro baixo o franquismo", Eliseo Fernández, estudioso do movimento libertário na Galiza.

Recesso.

18h15-20h15. "Memória da modernizaçom. Vulnerabilidade e resistência", Júlio Teixeiro, Grupo de Estudos Mádia leva.

Todas as palestras decorrem na casa da cultura, graças à colaboraçom organizativa da associaçom ordense "Foucelhas", com quem desenhamos as jornadas. Nas mesmas disponibilizaremos material diverso da EPG para quem lhe interessar: manuais de história, calendários ou marca-páginas, que aliás servem para ajudar economicamente o projecto.

A Escola Popular Galega estrutura-se em áreas temáticas de funcionamento muito autónomo, no senso de que cada área fai a sua programaçom e responsabiliza-se polo seu cumprimento. Nestes dias conformou-se a Área Feminista; os seus objectivos som elaborar umha programaçom formativa estável em feminismo e igualdade de género orientada preferentemente a colectivos e pessoas que se movem na contorna da EPG. A Área Feminista nom tenciona ser um outro colectivo feminista, simplesmente é um contributo mais para a formaçom e a educaçom em igualdade.

Neste momento a Área Feminista trabalha na elaboraçom dum programa educativo e formativo em igualdade de género que será introducido transversalmente nas actividades de tempo livre e lazer para cativos/as que se venhem desenvolvendo na EPG desde o mes de outubro. Também está previsto um curso básico de introduçom à igualdade de género para o 23 de janeiro, do qual nos próximos dias darám cumprida informaçom.

O endereço para contactar com a Área Feminista da EPG é o seguinte:

escolapopularfeminista@gmail.com

Desde o pasado mes de outubro a Escola Popular Galega, por iniciativa de estudantes de Filologia Galega, puxo em andamento umha das suas iniciativas mais ambiciosas: jornadas de tempo livre e lazer para que os cativos e as cativas aprendam língua e cultura galega.

Umha vez por semana (segundas feiras às 19:00 horas) um pequeno grupo de raparigos e raparigas com idades comprendidas entre os 7 e os 12 anos, reunem-se para, com o apoio de um/umha docente voluntária, jogar, brincar, divertir-se, pintar, debuxar, ler, etc. fazendo todo isto em galego. Compre sublinhar que estamos a falar de cativo se cativas da cidade e comarca de Vigo e polo tanto fortemente castelanizados/as e com muitas dificultades para expresar-se em galego. Deste jeito, através de jogos, leituras e múltiples actividades lúdicas, os cativos e as cativas vam aprendendo galego quase sem decatar-se. Estám previstas também saidas e excursons lúdicas e formativas pola contorna.

A actividade prolongará-se ao longo de todo o curso 2009-2010 e está aberta a mais cativos e cativas. Aliás, no programa lúdico-formativo introducirám-se de maneira transversal contidos de educaçom ambiental e de educaçom em igualdade.