Adia-se seminário sobre crise e marxismo a celebrar em Ourense

19-02-2011

Por problemas de última hora do docente responsável deste seminário, a EPG decidiu adiar a sessom formativa sobre crise capitalista e marxismo que se ia celebrar na vindoura sexta feira 25 de Fevereiro no CS Sem um Cam de Ourense.
Em próximas datas informaremos neste blogue da nova data escolhida para a celebraçom do seminário, que seguirá o mesmo guiom do celebrado no primeiro trimestre no CS A Fouce da Amaía.

Nova sessom de debate sobre a crise capitalista na Galiza

17-02-2011

Continuamos as sessons de formaçom em companhia do Grupo de Estudos do CS Mádia leva. Depois de debatermos sobre o filme 'As Encrovas a céu aberto', dedicamos mais umha sessom a alguns aspectos históricos sobre a introduçom do capitalismo na nossa Terra. A tal fim, estám disponhíveis no centro social os fragmentos de Pérez Touriño e Xoán Colino sobre dependência e campesinado, publicados na década de 80 como resposta às formulaçons do atraso económico elaboradas polo nacionalismo.
A sessom será nesta sexta feira 18, e começará a partir da ceia, com um custo de 5 euros para trabalhadores e de 2 para desempregadas e estudantes. A cita é às 21h00.

INAUGURAMOS BIBLIOTECA POPULAR DA EPG

02-02-2011

Depois dum longo e minucioso trabalho de clasificaçom, registo e catalogaçom que se demorou para além do inicialmente previsto, o próximo 12 de fevereiro abrirá as súas portas a Biblioteca Popular da Escola Popular Galega.

A Biblioteca Popular constitúe um dos piares centrais do projecto da EPG; enquanto projecto de educaçom popular de adultos/as, de base e auto-gerido, orientado a dotar à comunidade nacional galega de ferramentas formativas e educativas que aportem os materiais com os que construir valores, cultura e ideologia próprias à margem de Espanha e do capital, dotarmo-nos dum material bibliográfico e documental de seu é um objectivo prioritário.

É por isto que desde a EPG nom dubidamos em investir o tempo, os recursos económicos e o trabalho militante necessário para pôr em andamento a biblioteca. Para além de habilitar o local com as condiçons e o mobiliário precisso para facilitar o trabalho de leitura, consulta e investigaçom, também dotamos à biblioteca dum programa informático que permitirá umha óptima gestom dos seus recursos.

A Biblioteca Popular da EPG parte dum fundo constituido por mais de 2.000 volumes, entre os que se atopam títulos de importante valor. A dia de hoje um novo lote de 200 livros e revistas já agarda para ser registado, clasificado e catalogado, polo que presumivelmente o fondo bibliográfico seguirá medrando.

A biblioteca está organizada por volta de três grandes blocos: Livros, Revistas e textos fotocopiados e Livro infantil e juvenil. Por sua vez o bloco de livros está organizado seguindo a Clasificaçom Decimal Universal (CDU), o que permite ordena-los de modo eficaz e favoresce a sua localizaçom por parte das pessoas usuárias.

Com vocaçom inter-disciplinar, os fundos mais importantes e numerosos acham-se, porém, nas áreas de Ciências Sociais (Economia, Política, Sociologia, Direito, Teoria política, etc.) e Humanidades (História, Biografias, Literatura galega, Filologia galega e portuguesa, Sociolingüística, etc.). Entre os fundos bibliográficos mais importantes destacam os seguintes:

Umha colecçom fac-símile enquadernada dos 100 primeiros números da Revista GRIAL.
Umha colecçom fac-símile enquadernada da Revista Nós.
A Enciclopédia Galega Universal.
Dicionários e gramáticas de lingua galega e portuguesa.
Perto de 200 títulos sobre teoria e pensamento socialista, desde os clásicos (Marx, Engels, Lenine, Luxemburg, Trotski, Mao, etc.) até autores e autoras socialistas modernas.
Mais de 100 biografias, memórias ou livros de conversas com persoeiros da lingua, a cultura, a sociedade e a política galega.
Umha colecçom de 50 títulos da Biblioteca Básica da Cultura Galega.
Perto de 500 títulos de obras de poesia, teatro e romance da literatura galega.
Umha compilaçom temática dos livros mais importantes publicados sobre a catástrofe do Prestige.
Mais de 150 títulos de livros galegos para público infantil e juvenil.
Perto de 100 títulos sobre temas de história galega e de história local galega.
Perto de 50 títulos de obras de Sociolingüística de autores/as galegos/as e non galegos/as.

Para poder acceder aos fundos da biblioteca cumpre ser sócio/a da EPG, do CS Revolta ou de algumha das entidades ou organizaçons com as que a EPG tem asinado um convénio de colaboraçom. Inicialmente o horário de apertura limíta-se aos sábados de 18h:30 a 21h:00, mais está previsto alargar esse horário a outros dias da semana. Durante o horário de apertura a sala manterá as adecuadas condiçons para facilitar a leitura, consulta e investigaçom.

Ademais, a Biblioteca Popular também conta com um serviço de videoteca gerido polos/as companheiros de GZ Contrainfo. Por outra parte, também estamos trabalhando na catalogaçom do arquivo dos Movimentos políticos e sociais galegos, e tencionamos ampliar os serviços que presta o nosso local dotándo-o de internet e diversos jornais e revistas.

Para dar-lhe o valor que a ocasiom meresce, nada mais acaido que abrir as nossas portas o próximo 12 de fevereiro às 17h:30 com um acto oficial de inauguraçom no que decorrerá umha apresentaçom pública da re-ediçom de Cantares Galegos, editada por Ediçoes Galiza. E será no lugar exacto no que este livro viu a luz lá polo 17 de maio de 1863, quase que cento e cinquenta anos depois do começo da longa marcha da lingua e cultura nacional galega no caminho da sua dignificaçom. Para as gentes da EPG será umha honra compartilhar com vós este nosso grande orgulho.

Novos cursos da Área de Ecologia e Medio Ambiente da EPG em Compostela

01-02-2011

Esta quinta feira dia 3 terá lugar a primeira das duas Jornadas formativas sobre temáticas ambientais organizadas pola Gentalha do Pichel e a Escola Popular Galega. Consistirá numha palestra sobre Energia impartida por Xosé Beiras, às 20h30 no Centro Social O Pichel.
Tedes mais informaçom sobre estas jornadas a continuaçom:

Continua:

ENERGIA
Xosé Beiras
3 de Fevereiro às 20h30

Describiremos a situaçom energética galega no seu conjunto e falaremos das alternativas

Trataremos de ver como construir no nosso país um modelo energético sustentável, que assuma os desafios globais das alteraçons climáticas e do cenite do petróleo e que minimize a pegada ecológica.

RESÍDUOS
Tino Quintela
10 de Fevereiro às 20h30

Introduziremos o conceito de sustentabilidade e o papel da gestom dos resíduos dentro dum modelo socio-económico sustentável.

Analisaremos a crítica situaçom atual da gestom dos RSU na Galiza, assinalando as principais causas da mesma e os possíveis futuros que marca o novo Plano de Resíduos.

Remataremos falando dos pontos básicos para acadarmos umha gestom sustentável do nosso lixo.

Curso de Introduçom ao género no CS Arrincadeira

31-01-2011

Arrancou com força este novo trimestre na EPG. Aos cursos programados para esta semana em Lugo e Compostela,soma-se o curso de Introduçom ao género que decorrerá este sábado 5 de fevereiro no CS Arrincadeira de Ribadávia. Para participar no curso tes que enviar um e-mail com o teu nome ao seguinte endereço: escolapopularfeminista@gmail.com

O curso começa às 16h:30 e terá umha duraçom aproximada de 2,5 horas com um pequeno descanso. Será ministrado por Raquel Doval, experta em género e igualdade para além de militante em diversos colectivos feministas e outros movimentos sociais da comarca de Vigo.

<< 1 2 3 4 5 6 7 8 9 10 11 12 ... 25 >>

Podes contactar-nos em:

escolapopularnacional [arroba]gmail[ponto]com

Escola Popular Galega, Rua Real nº 12 rés-do-chao, C.P. 36202 Vigo.

Escola Popular Galega, Apartado 794, C.P. 36202, Vigo

Busca

  Feeds XML

powered by b2evolution