A associaçom Traslasxás de Boado impulsiona umha iniciativa chamada “ECOLIMIA TOUR”, sob um dos eixos fundamentais nos que se baseia a associaçom, como é a promoçom e fomento dos desportos e as atividades no meio rural. Assim esta iniciativa pretende organizar atividades de tempo livre na comarca e contorna, isto é, a Serra de Sam Mamede, a Serra do Larouco, o Gerês ou a Serra do Invernadoiro.

Os roteiros visam conhecer o meio, a cultura e os costumes do nosso rural; brevemente publicarám o plano de trabalho e os roteiros com os seus respetivos programas, entre os que se inclui um roteiro gastronómico, através do seu site(www.traslasxas.com) e na sua conta de facebook.

Da Aguilhoar queremos parabenizar os nossos companheiros/as e amigos/as de Boado por esta iniciativa na que botaremos umha mao em todo o que precisarem e estaremos presentes nos roteiros.

A Casa de Cultura de Ginzo de Límia acolherá nesta sexta-feira, 14 de janeiro, a partir de 20h00, a apresentação dos Cantares Galegos, primeira ediçom desta magnífica obra de Rosalia de Castro seguindo as normas do Acordo Ortográfico da Língua Portuguesa.

Isaac Alonso Estraviz e Concha Rousia serám os encarregados de apresentar este trabalho, impulsionado pola Academia Galega da Língua Portuguesa (AGLP), editado por Edições da Galiza e disponível para compra na loja Imperdível, entre outros locais.

Esta versão dos Cantares inaugura a coleção Clássicos da Galiza e foi realizada e dirigida polo membro da Academia Prof. Dr. Higino Martins Esteves, constando de 248 páginas entre preliminares, texto e notas finais.

Para a organização deste evento em Ginzo, a Academia Galega conta com a parceria do Centro Cultural Popular do Límia, do Centro Social Aguilhoar e de Edições da Galiza.

Este Natal abre-lhe as portas ao Apalpador, chega mais um ano o mágico carvoeiro vindo desde as montanhas do Courel. Um galego, um honesto e trabalhador carvoeiro, quem vem agora com os presentes para as nossas moradas, e que as castanhas de antano sejam acompanhadas por outros bens que a sua generosidade de seguro lhe permite doar.

QUE NENGUM MIÚDO FIQUE SEM APALPADOR!!

Da Aguilhoar disponibilizamos algumhas das cartas que da associaçom Gentalha do Pichel, recuperadora da figura do Apalpador, pom a nossa disposiçom para que podamos enviar-lhe os nossos desejos!

Quem é o Apalpador?
http://agal-gz.org/blogues/index.php/aguilhoar/2008/12/11/o-apalpador-chega-a-limia-abramos-lhe-as

6 DE DEZEMBRO: DIA DA CONSTITUIÇOM ESPANHOLA DAS MATANÇAS

O próximo 6 dezembro celebramos na Aguilhoar um dos nossos feriados nacionais mais importantes, o DIA DAS MATANÇAS, data na que a imensa maioria dos vacorinhos da Galiza passam a encher as nossas despensas para nos dar alimento todo o ano. Assim, como nom podia ser doutra forma, no nosso local social celebraremos este dia com umha ceia popular, com comida de matança, umha foliada e jogaremos ao jogo "pom-lhe a cara ao porco".

Animamos a todas e todos a acodir!!

6 DE DEZEMBRO DIA MATANÇAS!!
NEM ESTATUTO, NEM CONSTITUIÇOM: AUTODETERMINAÇOM!!

CONSTITUIÇOM ESPANHOLA: FRAUDE DEMOCRÁTICO!!

A Constituiçom espanhola nasce do pacto entre o fascismo franquista, a oligarquia espanhola, os militares, a igreja nacional-católica e a esquerda acomplexada que renúncia aos seus princípios ideológicos, desde a restauraçom da legalidade de 1931, a República ou a Autodeterminaçom dos povos, assim, como resultado da reforma política obtemos um Estado espanhol que nom é mais do que umha cárece dos povos que nega o sua supervivência, afoga as suas línguas e a suas culturas.

Outubro de 1974, Congresso do PSOE em Suresnes, França
“Resoluçom sobre nacionalidades e regions. (...) a definitiva soluçom do problema das nacionalidades que integram o Estado espanhol parte indefectivelmente do pleno reconhecimento do direito de autodeterminaçom das mesmas que comporta a faculdade de que cada nacionalidade poda determinar livremente as relaçons que vai manter com o resto dos povos que integram o Estado espanhol”

Setembro de 1975, Manifesto-Programa do PCE
“Respeitando o inalienável direito dos povos a decidirem livremente os seus destinos, a democracia política e social reconhecerá o carácter multinacional do Estado espanhol e o direito de autodeterminaçom para Catalunha, Euskadi e Galiza”

Abril de 1976, Bases Constitucionais do Conselho de Forças Políticas Galegas,
“Conforme ao princípio de autodeterminaçom nacional a soberania política para Galiza corresponde ao Povo Galego”

ALGUNS ARTIGOS DA "DEMOCRÁTICA" CONSTITUIÇOM ESPANHOLA

Artigo 2. “ La Constitución se fundamenta en la indisoluble unidad de la Nación española, patria común e indivisible de todos los españoles”

Artículo 3. “El castellano es la lengua española oficial del Estado. Todos los españoles tienen el deber de conocerla y el derecho a usarla.”

Artículo 8 “ Las Fuerzas Armadas, constituidas por el Ejército de Tierra, la Armada y el Ejército del Aire, tienen como misión garantizar la soberanía e independencia de España, defender su integridad territorial y el ordenamiento constitucional”

Artículo 30 “Los españoles tienen el derecho y el deber de defender a España”

Artículo 38 “Se reconoce la libertad de empresa en el marco de la economía de mercado”

Artículo 55. “1. Los derechos reconocidos en los artículos ( direitos fundamentais), podrán ser suspendidos cuando se acuerde la declaración del estado de excepción o de sitio en los términos previstos en la Constitución.”

Artículo 56. “ El Rey es el Jefe del Estado, símbolo de su unidad y permanencia, arbitra y modera el funcionamiento regular de las instituciones, asume la más alta representación del Estado Español en las relaciones internacionales, especialmente con las naciones de su comunidad histórica, y ejerce las funciones que le atribuyen expresamente la Constitución y las Leyes.”

RESULTADOS DO REFERENDUM CONSTITUCIONAL NA GALIZA NO ANO 1978

Enquanto regions como Madrid, Andalucia ou Catilla-León apresentavam índices de abstençom do 29,3%, 27,7% e 25,9%, Pais Basco ou Galiza tiverom umha abstençom do 54,5% e 49,8% respectivamente.

-TAM SÓ 44,7% DE GALEGOS/AS VOTOU FAVORAVELMENTE NO REFERENDUM CONSTITUCIONAL

-54,7% DO GALEGOS/AS ABSTIVO-SE, VOTOU EM CONTRA OU EM BRANCO.

Reproduzimos na íntegra a entrevista que do jornal NOVAS DA GALIZA realizárom no número de outubro a Camilo Vila, responsável pola A.C. Traslasxás de Boado, a quem da Aguilhoar nom podemos mais que parabenizar polo seu trabalho.

O.R. / Vida comunitária, celebraçons colectivas, convívio de velhos e moços, enraizamento. Premissas que há cinqüenta anos definiam a vida da sociedade galega, som hoje metas por que luitar. Nom há naçom nem esquerda sem sociedade, sem redes, sem comunidade. E em Boado tenhem-no claro: “o mais básico é hoje o que mais falta”. Camilo Vila fala-nos da Associaçom Traslasxas, um projecto que nasceu para dinamizar a aldeia a que pertencem tornando-a um sítio onde viver e morrer.

Como nasce a associaçom?

No Sam Joam de 2007 pensamos que estaria bem recuperar a festa da nossa paróquia, o Sam Pedro, que era na semana seguinte. Nom se celebrava desde havia dez anos por problemas entre a vizinhança por causa da construçom dumha auto-estrada na nossa zona. Pugemo-nos a trabalhar e saiu mui bem. Assim, da boa experiência dessas primeiras festas de Sam Pedro, saiu a iniciativa de nos constituirmos como associaçom, ainda que nom demos o passo até Maio de 2008.

Mas a cousa ja vinha de antes. Houvo umha geraçom de moços que fomos medrando juntos: íamos juntos à escola, juntos a aulas de gaita, combinavamos às noites. A partir do ano 96 mais ou menos começamos a ir à antiga escola unitária, que já nom tinha uso. O edifício estava mui mal e decidimos amanhá-lo. Compramos um frigorifico, um DVD, telhamos, pintamos o cal… Na planta de abaixo, andando o tempo, montamos um centro social com o básico, o mínimo que deveria haver em todas partes, mas para Boado já e todo um êxito. Numha aldeia de apenas setenta vizinhos a gente combina para jogar cartas ou ver o partido e vam ali por iniciativa própria.

Todas as casas de Boado tenhem algum membro na associaçom, por isso me incomoda escuitar falar “dos da associaçom”, porque todos fazemos parte dela. Até os velhos venhem às reunions!

A vossa actividade centra-se na recuperaçom das festas populares em Boado. Fala-nos das celebraçons que festejades.

Bem, umha das actividades que levamos a cabo desde 2008 e o Magusto. Em Boado ha um forno que era comunal, e levava corenta e um anos sem ninguém o acender, de maneira que pensamos aproveitar a celebraçom para cozer pam depois de tanto tempo. Os vizinhos todos dixerom-nos que eramos loucos, mas entre três pessoas carrejamos a lenha e quentamo-lo.Todo se encheu de fume e o pam nom havia quem o comesse, ainda menos mal que tinhamos carne, mas minha avô, e muitos outros como ela, chorárom de emoçom ao voltar a vê-lo em funcionamento.

Agora o que fazemos e acendê-lo um dia antes para que se quente e mantém-se atendido em roldas, primeiro os velhos, logo os medianos e logo os moços. Todo o mundo está de troula nessa noite de vigia, bebem juntos pais, avôs e filhos. Também fazemos um concurso da ataca mais grande. As festas de Sam Pedro, que recuperamos em 2007, estám centradas cada ano num tema. Em 2008 figemos umhas olimpíadas rurais com desportos aquáticos, de exibiçom,… Um deles consistia em levar olas na cabeça; aos homens romperom-nos todas, só chegou um e sete mulheres, a mais nova de 55 anos. Ao ano seguinte reunimos fotos velhas da gente de Boado, e noutra ocasiom houvo um matraquilho humano. Este ano adicamo- lo às tabernas de antes.

Também recuperamos o costume de ir polas casas cantar os Reis. No primeiro ano saímos quatro e rematamos vinte pessoas as duas da manhá. O Entruido é a melhor das nossas ctividades, porque investigamos para recuperá-lo com as suas particularidades. A figura do “manturriero”, pessoa vestida com umha mantúrria, um pau e um cesto de cinza ou farinha, e única da nossa zona. Recuperamos também o costume de ler o testamento, e fijo-o a mesma mulher que os fazia antes do 81, ano em que deixou de se fazer.

Se pretendesse andar com socos por caminhos de lama estaria fora do meu tempo, a chave é andar com o calçado que me dá o 2010 polos meus caminhos; é por isso que, ainda que fugindo dos folclorismos, nos interessamos tanto polo que implique a recuperaçom da vida de antano. O melhor da recuperaçom destas festas e a convivência dos velhos e os novos em igualdade, desfrutando todos juntos no sitio de onde som. Parece algo mui básico mas é imprescindível, e nom se dá tanto como deveria.

Ides já pola II Andaina da Comarca da Límia. Como foi acolhida esta iniciativa, que se distancia das actividades puramente festivas?

Mui bem, a gente implicou-se muito nas duas ediçons. Vinherom pessoas de toda a comarca e também de fora. O objectivo é conhecermos nós próprios a nossa zona, porque às vezes sabes do de fora e nom do que tés na casa. Para a andaina deste ano limpamos um caminho, e só por isso já teria merecido a pena fazê-la.

Como avalias o panorama associativo do rural galego? E na tua comarca?

O que há nunca é avondo, mas vam-se fazendo cada vez mais cousas. É imprescindível que a gente se associe nos sítios de onde é, sobretodo se se trata dum ambiente rural. Quanto à nossa comarca, há associaçons noutras aldeias como a Sainza, e em Ginzo está Aguilhoar,que é o mais importante ainda que nos trabalhemos outros campos.

Perspectivas de futuro?

Desde que podamos falar disto no ano que vem, para nós já é suficiente. Estamos num momento complexo porque somos a mesma gente para todo, e acaba por queimar. Criamos umha equipa de futebol, o Boado F.C., que chupa tambem muito esforço e fundos económicos. Mas o esforço paga a pena. Queremos que a gente poda morrer aqui e morrer bem, eu nom vou meter minha avô num apartamento de Torremolinos para que passe os últimos da vida ao sol. Se vai estar aqui, que esteja bem. Eu a minha vida imagino-a ali, e se nom pudesse por motivos de trabalho, Boado seria igual o meu referente sempre. Som de Boado, isso é o meu, e nisso trabalhamos e trabalharemos.

Mais um ano a Aguilhoar organiza o seu tradicional Magosto, que este ano se desloca a Vilar de Santos como acto dentro do leque de actividades que os novos associados do concelho limiao estám preparando e que nos apresentaram publicamente o projecto "Pikanha" como folha de agitaçom local.

No forno de Bárrio, 13 de novembro
O Magosto decorrerá no forno comunitário de Bárrio, Vilar de Santos, apartir das 19h30, e no que haverá além das castanhas, churrasco, chouriços e vinho para todas e todos os presentes, bem como umha actuaçom musical para amenizar a tarde. A ele ficam combidados especialmente as e os vizinhos de Barrio e Vilar de Santos para passarmos umha boa tarde-noite ao carom do forno de Bárrio que leva muito tempo abandonado e sem escoitar as lérias e histórias das e dos vizinhos.

O próximo domingo, 31 de outubro, a Aguilhoar participará na Festa do Samaín organizada, junto com outros colectivos locais de Ginzo de Límia, com o intuito de por em valor as nossas tradiçons populares tam ligadas à nossa cultura nacional. Assim celebramos a última noite de outubro que da começo ao ano novo celta e a sua festa na honra dos defuntos, marcando a transiçom do outono ao inverno.

Actividades na Praça Maior
As actividades que se denvoverám serám na tarde de domingo, a partir das 18h00, na Praça Maior de Ginzo expondo umha mesa de material elaborado ao efeito, com as cabaças, alimentos e agasalhos, seguindo as crenças relacionadas com a imortalidade da alma, buscando um mecanismo de reparaçom dos mortos.

Também haverá obradoiros e jogos para os nenos e nenas, e por volta das 20h30 dará começo a procesom dos mortos cujo objectivo é chamar polas ánimas dos parentes finados para que voltem visitar às suas familias e às suas velhas casas para comer nas mesas e ficar ao carom do lume da lareira.

Ceia e quiemada no Centro Social
Ao remate das actividades na rua haverá no Centro Social umha ceia para todos e todas as participantes no evento e umha queimada para todas e todos aqueles que desejem umha boa noite de espiritualidade.

Aguilhoar colabora com o projecto "Antes & Despois", longametragem que nasce de proxectocurta com o intuito de levar a cabo umha experiência cinematográfica realizada e filmada integramente na vila limiá de Ginzo e comarca.

Casting no Centro Social
O próximo dia 15 de outubro ás 16h30 no Centro Social da Aguilhoar decorrerá o casting aberto ao público e ao que animam a participar a todas aquelas pessoas que desejem botar umha mao para tirar avante com este projecto

Mais info. proxectocurta.es.tl

Na passada sexta-feira dia 5 de Fevereiro por volta das 19h30 decorreu no Centro Social de Vigo A Revolta umha palestra sob o mote "O Entroido na Galiza" na qual contarom com a presença de algumhas das principais personagens do entroido galego, e entre elas, como é lógico, a personagem limiá A Pantalha que foi exposta por umha delegaçom da Aguilhoar, que explicou as e aos presentes as caractrísticas principais da Pantalha, desde a sua vestimenta e o seu significado até o rol que assume no próprio entroido. Além da Pantalha, houve representantes do Merdeiro, o Cigarrom, o Peliqueiro e do entroido do Morraço.

VIVA O ENTROIDO!!!

NA GALIZA EM GALEGO!!
POR UM ENSINO GALEGO!!