Nunca Mais - Lugo

Ante a celebraçom no dia 9 de Junho às 10:30 horas no julgado do penal nº 2 de Lugo de um juízo a um cidadao que participou na concentraçom celebrada nesta cidade durante a celebraçom do acto de apresentaçom do ?Libro Blanco del Empleo y la Economía en Lugo? organizado polo Partido Popular, acto ao que assistiu, entre outros membros do PP, o senhor Mariano Rajoy; e que coincide no tempo com o ponto álgido da crise do Prestige, a Plataforma Cidadá Nunca Mais quer expressar publicamente que:

O comportamento das pessoas que participárom da concentraçom de protesta nom foi em nengum momento violento ou agressivo. Estes cidadáns e cidadás exerciam o seu legítimo direito a participarem e expressarem-se livre e pacificamente ante um assunto público de grande repercussom para Galiza.

Se alguém foi agredido ou resultou lesionado no decurso da protesta fórom as pessoas que estavam ali concentradas, tal e como pugérom de manifesto diversos meios de comunicaçom que se figérom eco da protesta.

Esta acusaçom só é compreensível no contexto da estratégia de perseguiçom e criminalizaçom da participaçom cidadá, dos movimentos sociais e do direito dos indivíduos a opinar livremente que pujo em marcha o Partido Popular durante a era Aznar. Neste sentido compre lembrar as muitas acusaçons das que foi objecto a Plataforma Nunca Mais e que com o passo do tempo se mostrárom completamente infundadas.

Dá-se o caso, para maior abundamento, de que a sensivelmente selectiva e infundada denúncia que foi apresentada contra este cidadám por parte do Jefe de Dispositivo Policial e de um número da Policia Nacional que actuarom nesse dia, é a única, de todas as apresentadas em similares circunstáncias contra a Plataforma Cidadá Nunca Mais ou contra qualquer cidadám ou cidadá que participasse nas movilizaçons convocadas pola mesma, que nom foi dessestimada ou arquivada. Isto é, que este juízo que se vai celebrar cobra categoria de Juízo Político numha cidade de Lugo que continua a ser feudo dos interesses do Partido Popular, e da sua política repressiva, através da sua rede caciquil encistada no seio da administraçom e do corpo funcionarial da cidade.

Este processo judicial iniciou-se abrindo diligências contra nove pessoas, todas elas com um destacado papel em diversos movimentos sociais da nossa cidade, e a maior parte delas presentes nos actos de protesta que se celebrárom contra a Lei Orgânica de Universidades (LOU). Este processo judicial só se pode entender como um intento de perseguir e assustar à sociedade lucense e galega.

Por tudo isto a Plataforma Nunca Mais deseja mostrar o seu firme apoio à pessoa acusada polo que convoca umha concentraçom acarom dos Julgados de Lugo na quarta-feira, mércores, 9 de Junho às 10:00 da manhá.

Lugo, 5 de Junho de 2004.

Atenciosamente. Plataforma Cidadá Nunca Mais de Lugo.

NOTA: Pode descarregar o impresso de recolhida de assinaturas (clique aqui), e ver as fotos da visita de Mariano Rajoy.
Fotos: 1 2 3 4 5 6 7 8 9
Mais info sobre Nunca Mais em Lugo nesta ligaçom.