Amig@s da Cultura fai um apelo à participaçom na manifestaçom nacional em defesa da língua do vindouro 17 de Maio em Compostela, com saída às 12h desde a Alameda.

Mais umha vez, a nossa associaçom fará parte do Bloco Laranja que reune o reintegracionismo de base sob a legenda "Crescer na nossa língua para estar no mundo".

Frente à política de agressons à língua por parte do governo autonómico do PP, tod@s à rua!

A nossa associaçom recebeu este sábado o Prémio Instituiçons outorgado pola AELG (Asociación de Escritoras e Escritores en Língua Galega) dentro dos atos da Gala das Letras 2013 decorridos na cidade da Corunha.

Com este prémio a AELG quer fazer um reconhecimento às associaçons culturais de base criadas na Galiza nas décadas de 60 e 70 e que continuam a dia de hoje com a sua atividade de defesa da língua e cultura nacionais, sendo também difusoras da obra das e dos escritores galegos durante as últimas décadas.

Assim, junto com Amig@s da Cultura foi reconhecido o trabalho e a luita no eido cultural de associaçons como O Facho, Alexandre Bóveda, Auriense, O Galo, Valle Inclán, Avantar, Francisco Lanza, Medulio e Lumieira.

De Amig@s da Cultura queremos agradecer este reconhecimento por parte da AELG, que para nós é um estímulo para continuar a trabalhar com mais força polo País e polo nosso idioma numha obra coletiva na que é precisa a aportaçom de todas as pessoas comprometidas com um futuro de liberdade para a Galiza.

De Amig@s da Cultura, em colaboraçom com a Fundaçom Meendinho, convidamos-vos à apresentaçom na nossa cidade do MIL (Movimento Internacional Lusófono). Será a segunda-feira, 8 de abril, a partir das 20:20h na Casa das Campás.

Teremos a oportunidade de escuitar Lúcia Helena Alves de Sá e Loryel Rocha a falar dos laços entre a Galiza, o Brasil e o Espaço Lusófono. Celeste Natário falará sobre Outeiro Pedraio e Teixeira de Pascuaes. E Renato Epifânio apresentará o número 11 da revista Nova Águia.

É tam ridículo pensar que a rotulaçom só em galego pode causar “confusons” que parece claro que a única motivaçom da administraçom de justiça espanhola é limitar mais ainda os espaços públicos para a nossa língua. E isto nom é casual, é o resultado da renovada estratégia desgaleguizadora do Estado espanhol, um novo ataque planificado à cultura e identidade nacionais que busca converter-nos a tod@s em perfeitos cidadaos espanhóis, erradicando a pluralidade lingüística que existe no Estado espanhol. O discurso oficial fala de convivência, mas a prática demonstra que o objetivo é a assimilaçom.

A sentença também é o resultado de um marco jurídico-político que a permite, o emanado da Constituiçom espanhola e do Estatuto de autonomia, que impom umha hierarquia entre línguas, assegurando a supremacia do espanhol (obrigatório) e o caráter dependente do galego (optativo). Igual que para defender os serviços públicos e os direitos laborais e sociais, necessitamos soberania e instituiçons próprias para garantir o futuro do galego.

Somamo-nos, pois, às associaçons e coletivos que se estám a manifestar em contra desta sentença e em defesa do galego, e instamos o governo municipal a manter a rotulaçom monolíngüe passar o que passar.

Ponte Vedra 100% em galego!

Ponte Vedra, 22 de março de 2013

Amig@s da Cultura apoia e fai um apelo à participaçom nesta manifestaçom que, este sábado 23, partirá da Praça do Concelho às 18h.

Aproveitando o debate público sobre as possíveis denominaçons para o Sexto Edifício do Museu de Ponte Vedra, a nossa associaçom quer expressar as seguintes consideraçons:

Em primeiro lugar, e em relaçom ao novo nome do Sexto Edifício, reiteramos a nossa ideia de que este resulte de umha eleiçom popular. Independentemente dos nomes, para Amig@s da Cultura está claro que devera ser umha pessoa comprometida com a cultura galega, e achamos que seria positivo que fosse umha mulher para racharmos com o silenciamento do papel das mulheres na nossa história. O que também queremos destacar é que nom concordamos com a proposta de Filgueira Valverde (ainda que fosse um dos fundadores da nossa associaçom), entre outras cousas pola sua implicaçom na desgraçada instalaçom de ENCE em Louriçám.

Dito isto, pensamos que o do nome é o menor dos assuntos em importáncia à hora de reflexionarmos sobre a situaçom do Museu. Amig@s da Cultura nom aceita nem considera positiva a perda de autonomia do Museu e o seu controlo político direto pola Deputaçom do PP de Louzán. Um controlo político que já se está a manifestar na pressom sobre o pessoal que nom se prega totalmente às diretrizes do PP.

Umha outra questom importante é a da situaçom dos fundos arqueológicos que o Museu deve costodiar. Sobre isto é bem sabido que existe um escurantismo que enche de suspeitas a atuaçom da instituiçom que deve velar polo nosso património histórico. É necessário pôr luz e taquígrafos sobre este tema, deve facilitar-se um inventário público e oficial dos fundos do Museu, atualizado permanentemente e, no seu caso, respostar por possíveis desapariçons ou estragos.

Também devem ser dadas facilidades às e aos investigadores, por exemplo nos horários de acesso à Biblioteca e demais serviços (que só abrem de terças e sexta pola manhá), isso sim, mantendo o controlo sobre os fundos que se utilizam ou emprestam.

Para finalizar, é necessária umha crítica à programaçom de exposiçons do Museu de Ponte Vedra, onde habitualmente há exposiçons que nada tenhem a ver com a difusom da nossa história e da nossa identidade, mais bem ao contrário (lembramos a penosa exaltaçom do militarismo espanhol numha exposiçom há uns meses). Por nom falar da cessom das suas instalaçons em favor de coletivos reaccionários e anti-galegos como Galicia Bilíngüe.

A nossa alternativa é a sua conversom num museu arqueológico digno de tal nome, onde se exponha de maneira permanente e rigorosa o mais destacado do património histórico que o Museu costodia. Esta seria umha boa forma de fazer do Museu de Ponte Vedra a instituiçom ao serviço do povo galego que devera ser.

Ponte Vedra, 15 de fevereiro de 2013

Da Associaçom Cultural Amig@s da Cultura de Ponte Vedra queremos expressar a nossa dor polo passamento de Manolo Soto, histórico luitador pola causa da Galiza desde a sua vila de Salvaterra, na comarca do Condado.

Manolo Soto foi umha dessas pessoas que generosamente dedicárom os seus esforços a construir umha Galiza livre e justa desde diversos ámbitos, do político ao sindical passando polo cultural. Foi um dos impulsionadores da Sociedade Cultural e Desportiva do Condado e do Festival da Poesia, referentes da autoorganizaçom popular galega desde a década dos 70. Ele próprio participou no projeto de criar umha Federaçom de Associaçons Culturais a nível nacional, projeto que Amig@s da Cultura impulsionou na década de 1980.

Deixou-nos, pois, um companheiro, um galego dos que merecem o título de bom e generoso, um exemplo da Galiza rebelde que nom claudicou nem se integrou no podre regime que padecemos. Graças a pessoas como ele, o facho acesso da naçom continua a arder e a guiar-nos cara a liberdade.

Enviamos à sua família, amizades e companheiros/as todo o nosso carinho e apoio.

Ponte Vedra, 6 de fevereiro de 2013

O espanhol, que já era a língua praticamente única das cidades galegas mais povoadas, também se tornou a língua ambiental de um grande número das nossas vilas médias e até pequenas nos últimos anos. Nestas circunstáncias, também ficárom mui reduzidas as pessoas que tenhem algum tipo de contacto com a nossa língua. Sabia-se que ia acontecer e aconteceu, de maneira que algo tem que estar a falhar. Como tantas outras cousas na nossa sociedade, o movimento normalizador necessita de novos ares, de um novo rumo que nom jogue todas as cartas à açom institucional e ao vitimismo de sermos língua minorizada. A situaçom da língua é delicada, mas nós pensamos que é possível voltar a conectar com a sociedade, voltar a motivar, voltar a somar.
.As sociedades atuais e os comportamentos lingüísticos delas som tam complexos que dificilmente se podem induzir ou alterar apenas através da açom institucional. Tampouco o ensino, nem que fosse maioritariamente em galego, asseguraria grandes avanços por si só. Temos muitos exemplos de que esse rumo nom dá os frutos que esperávamos. Muito menos ainda, claro, quando a estratégia consiste simplesmente em ficar à espera dessa situaçom. Guiarmos noutra direçom nom nos instalaria repentinamente na situaçom oposta. Ora bem, parece claro que continuarmos a bater nas mesmas teclas, a de estar à espera de um ambiente ideológico propício e a de limitar os recursos que pomos ao dispor do processo normalizador, nom gera a motivaçom social polo galego que desejaríamos.
.Os coletivos reintegracionistas que hoje nos reunimos no bloco laranja entendemos que, sem renunciarmos a utilizar o ensino e as instituiçons públicas em prol da nossa língua quando estivermos em condiçons de o fazer, também devemos somar outro tipo de vontades e recursos à margem daquelas. Parece-nos o modo mais interessante de devolver ao movimento normalizador o entusiasmo de que atualmente carece e que julgamos imprescindível para conectar com a sociedade. Um novo rumo em que cada pessoa poda pôr o seu grao de areia para que o galego volte a ser, para além da língua que as pessoas identificam com o uso ritual institucional, umha língua de ambientaçom social. Por isso queremos animar-te a trabalhar conosco:

1. Na promoçom de espaços físicos de socializaçom em galego e polo galego em todas as comarcas do País.
. 2. Na promoçom de redes cooperativas de ensino em galego e polo galego em que o galego nom seja apenas a língua da docência, senom o projeto que aglutine toda a comunidade educativa: direçom, docentes, maes e pais, crianças...
. 3. No aproveitamento de recursos lusófonos em todos os ámbitos em que seja possível, fazendo do intercámbio com os outros países de fala galega a aposta cultural fundamental do movimento normalizador até que se criem condiçons mais favoráveis para a cooperaçom lingüística com os estados de língua portuguesa.

Som medidas simples que já se verificárom eficazes noutros países, porque nom basta fazermos campanhas de promoçom do galego: devemos fazer do galego umha opçom interessante para as pessoas e para isso temos que ter em conta as pessoas.

Galiza, 27 de janeiro de 2013