1.- Da ARTÁBRIA expressamos a nossa surpresa e indignaçom pola decisom judiciária que resolveu fechar o jornal EGUNKARIA. Tal decisom ataca e vulnera liberdades e direitos elementares, mesmo constitucionais, como a liberdade de imprensa e informaçom.

Da ARTÁBRIA expressamos o nosso rejeitamento ao encerramento do jornal Euskaldunon Egunkaria, único jornal editado integramente em eusquera, pois achamos que é umha medida que, longe de penalizar unicamente presumíveis condutas delictivas individuais, viola e impede o fulcral direito da comunidade lingüística euskalduna a terem e receberem informaçom escrita na sua língua.

Cabe lembrar que, até este feito, eram doze os anos ininterruptos de labor normalizador, de jornalismo por e para os bascos e as bascas, e escrito integramente na sua língua nacional, os que vinha desenvolvendo o periódico EGUNKARIA.

Da ARTÁBRIA solidarizamo-nos com o quadro de pessoal das trabalhadoras e trabalhadores de Egunkaria. Apoiamos a demanda destes, dos colectivos em defensa da língua e cultura euskalduna, do governo basco e do sentir unánime da cidadania basca para a iminente reabertura deste necessário projecto de normalizaçom da língua própria de Euskal Herria.

2.- Da ARTÁBRIA, ademais, expresssamos o nosso incondicional apoio às demandas e mobilizaçons que desenvolvem as Plataformas Nunca Máis, e a Plataforma pola Paz e contra a Guerra, nas que a Fundaçom Artábria participa.

Queremos assim mesmo felicitar a ambas Plataformas polo uso sistemático e defensa da nossa língua, e tamém a cidadania polo massivo respaldo que estám a dar as convocatórias de Nunca Máis e contra a agressom militar a Iraque. Aliás, congratulamo-nos do entendimento e trabalho em comum que algumhas entidades culturais da cidade iniciamos para trabalharmos em contra da Guerra e pola Paz. Neste senso, parabenizamos a associaçom Fuco Buxán polo êxito do acto pola Paz que tivo lugar antonte no Centro Cultural Carvalho Calero.