A Comissom de Língua da Fundaçom Artábria acaba de apresentar, mais umha vez, umha proposta para que a Cámara Municipal de Ferrol assuma já a restauraçom da casa natal de Ricardo Carvalho Calero. Sendo esta umha velha demanda da nossa entidade, neste momento tem umha urgência quase dramática, pois o prédio está a ponto de desabar, inclusive acordoado pola Polícia municipal polo risco iminente.

Apresentamos-vos a nossa iniciativa municipal e algumhas imagens que ilustram a situaçom da casa natal de Carvalho, situada no bairro de Ferrol Velho.

Continua:

Iniciativa municipal pola imediata restauraçom da casa natal de Ricardo Carvalho Calero

A Fundaçom Artábria, inscrita como Fundaçom de Interesse Galego na Conselharia da Presidência da Junta da Galiza com o número de inscriçom 54, e na lista de entidades culturais do concelho de Ferrol,

EXPOM

a) Que neste domingo, dia 25 de Março, se cumprem dezassete anos da morte de Ricardo Carvalho Calero, nomeado no seu dia polo Pleno municipal ferrolano “Filho Predilecto de Ferrol” e polo Parlamento autonómico “Filho Ilustre da Galiza”.

b) Dezassete anos marcados, no referente à figura de Carvalho Calero, polo injustificável silenciamento institucional de um dos maiores intelectuais galegos do Século XX; um silêncio institucional roto unicamente polo digno de mençom Prémio público anual instituído em Ferrol para premiar trabalhos literários e de investigaçom em galego, que leva o seu nome.

c) Porém, a maior evidência do esquecimento a que as instituiçons querem condenar a figura do intelectual reintegracionista é a renúncia sistemática a recuperar a casa natal de Carvalho Calero, localizada na rua Sam Francisco, e que está a ponto de desabar polo grave estado de deterioraçom e abandono em que se encontra.

d) De facto, a própria Policia Municipal já sinalizou o lugar como perigoso, impedindo a aproximaçom das pessoas, polo iminente risco de desabamento.

e) A nossa entidade tem reclamado em diferentes ocasions a diferentes governos municipais de Ferrol durante os últimos quinze anos a reabilitaçom da casa natal de Carvalho Calero. Há que lembrar que existem dous acordos plenários que exigem a compra da casa pola Cámara Municipal de Ferrol, que até hoje nom se cumprírom. Nesta ocasiom, e diante do lamentável estado de ruína em que o prédio se encontra, e tendo em conta as consideraçons anteriores,

PROPOM

1º) Que a Comissom de Governo, quer directamente, quer mediante consulta prévia ao Pleno Municipal, tome as medidas de urgência necessárias para evitar que, em poucas semanas ou meses, o edifício poda cair.

2º) Que, a continuaçom, seja desenvolvida umha actuaçom institucional para que a casa seja adquirida pola instituiçom municipal e integralmente restaurada como espaço de valor histórico e cultural, e dedicada a arquivo, biblioteca e casa museu com o nome do ferrolano e galego ilustre que nela nasceu.

A nossa entidade consideraria imperdoável que a Cámara Municipal de Ferrol deixasse cair o edifício e renunciasse assim à dignidade e homenagem que ao povo de Ferrol merece a figura do seu filho ilustre, Ricardo Carvalho Calero.

À espera de comunicaçom formal em resposta à nossa proposta,

Despedimo-nos anteciosamente,

Fundaçom Artábria,
Travessa de Batalhons, nº 7 rés-do-chao, Esteiro, Ferrol (Galiza)

AO CUIDADO DO PRESIDENTE DA CÁMARA MUNICIPAL DE FERROL, JUAN JUNCAL