Mais vale tarde que nunca, e cá está a crónica, redigida polo companheiro Xende, do concerto de Answer e Ofensiva, decorrido no passado 28 de Abril no Local da Fundaçom Artábria. Da Fundaçom Artábria, agradecemos aos organizadores, R e Meixide, o seu compromisso com o projecto que representamos e o seu contributo económico. Muito obrigad@s, companheiros.

Continua:

No passado dia 28 de Abril, o local da Fundaçom acolheu um dos concertos mais contundentes da temporada: o que oferecérom os viguesses Ofensiva junto dos catalans Answer. Música e compromisso de maos dadas.

Abrírom a noite os primeiros, que com a sua mistura de metal e hardcore apresentárom o seu disco ‘A última palavra’ em Ferrol. Temas como Irmaos contra irmaos, Ódio e rencor, Tu mesmo, Resposta, Persistir é vencer... ou umha versom dos clássicos da cena hardcore Sick of it All convertêrom-se em quarenta minutos de brutalidade sem tregua. Os da outra margem da ponte de Rande vinhérom, chegárom e vencérom. E é que estes cinco rapazes de Vigo já som toda umha referência de primeiro nível na cena metalcore e hardcore da Península; algo que já demonstrárom com a apresentaçom do seu primeiro e único trabalho por enquanto, durante boa parte de 2006 e deste 2007, em cidades como Bilbau, Santander, Madrid ou em várias cidades de Portugal.

Após um breve descanso, entrárom em acçom os cataláns Answer. Com o seu hardcore antifascista (como eles próprios o definem), deixárom-se no nosso local coraçom, cérebro e sangue convertidos em amplas doses de mensagem, raiva e consciência de classe. Durante um tempo próximo de umha hora, repassárom temas dos seus já mais de dez anos de trajectória musical; recolhida em três discos: ‘La danza de la calle’, &#8216e la rebel•lia’ (sob o nome de nn33) e o mais recente ‘Reprenem respostes’. Temas como Velocitat, Acció, Resposta, El teu sexe i las meves mans..., som mostras da idelogia da banda, que se declara sem nengum tipo de complexo como marxista-leninista, e servírom como passo prévio a um final apoteósico em que os cataláns versionárom o tema Motí! avalot... dos Inadaptats, encorajados por um público que, na maioria dos casos, tomou os microfones para acompanhar a banda nos coros.

Umha tarde-noite de festa, luita e camaradagem.

Ofensiva - Irmans contra Irmans
[youtube]9paxcewFjB4[/youtube]

Answer - Marionetas
[youtube]axLd5vPy6Es[/youtube]