O Festival da Terra e da Língua atinge a sua VII ediçom com o mesmo cenário de sempre: o Moinho de Pedroso; e com os mesmos objectivos de sempre: promover as manifestaçons culturais galegas na nossa comarca com o idioma como centro das actividades, e partindo da própria auto-organizaçom popular como melhor fórmula para conseguir esses objectivos.

Cultura com memória

Desta vez, o Festival que a Artábria vem organizando desde 2001, é dedicado à recuperaçom da memória histórica com o foco no ámbito cultural: Recuperando a nossa Memória, recuperamos a nossa Cultura. Porque a cultura foi umha das faces menos atendidas no passado Ano da Memória, quando todo o tipo de iniciativas populares e institucionais lembrárom a repressom fascista sofrida pola Galiza a partir do golpe de Estado de 1936.

No entanto, o ámbito cultural é um dos que mais eloqüentemente retratárom o selvagismo fascista, que liquidou fisicamente todo o tipo de iniciativas culturais produzidas ao longo do primeiro quartel do século passado por umha sociedade, a galega, que dava os primeiros passos na necessária construçom nacional.

Editoras fechadas, editores assassinados, mestres e mestras represaliadas e substituídas por falangistas para encaminhar o ensino segundo os principios do nacional-catolicismo espanhol… As manifestaçons, em definitivo, da barbárie franquista contra o nosso idioma e contra a afirmaçom do nosso povo como sujeito de direitos colectivos que se vinha produzindo ao longo dos anos anteriores ao golpe militar.

Umha barbárie que se prolongou durante décadas e da qual ainda temos memória. Este VII Festival da Terra e da Língua servirá para render homenagem a todos os galegos e galegas vítimas do fascismo e para reivindicar as mesmas causas que levárom milhares de compatriotas às prisons, ao exílio e à execuçom arbitrária. Porque nom queremos esquecer, e porque, sem dúvida, recuperando a nossa memória, recuperamos a nossa cultura.

Esperamos contar, mais um ano, com a tua presença em Narom. Actividades para todas as idades e ao longo de todo um fim de semana estám à tua espera, numha nova ediçom do Festival que, como sempre, tentará oferecer um pouco mais que o anterior.

Vemo-nos no Moinho de Pedroso!