Neste fim de semana, o centro social da Artábria acolheu actividades, todas gratuitas, diversas e de grande interesse, que conseguírom manter umha boa média de participaçom e avançárom o que será um Outono de muito movimento. Se nom tiveste ocasiom de vir, resumimos-chas e convidamos-te a participar nas próximas...

Continua:

Na sexta-feira, X. Bocixa apresentou-nos o seu documentário "A céu aberto", umha emocionante obra dedicada a lembrar a luita da vizinhança das Encrobas contra as expropriaçons para favorecer os interesses de Fenosa, durante os anos setenta. Umha boa mostra de que sim existe um verdadeiro audiovisual galego, comprometido com a nossa identidade e de fundo conteúdo social.

A projecçom foi seguida de um debate sobre os pormenores da produçom e realizaçom, em que o realizador explicou como foi possível a criaçom de "A céu aberto". Finalmente, uns petiscos pugérom termo a umha velada que se prolongou até passada a umha da manhá.

No dia seguinte, sábado, às 19 horas, a associaçom "A Gaiola" apresentou-nos umha nova jeira da sua publicaçom "Gaiola Aberta", elaborada por um colectivo de profissionais e internos de centros psiquiátricos da Galiza. O que fora secretário geral das Mocidades Galeguistas no exílio, Antom Moreda, foi o primeiro a intervir, seguido do psiquiatra Ramom Muntxaraz e a interna Maria Ameneiro. A situaçom da sanidade nos centros de saúde mental galegos e toda a sua problemática foi criticamente analisada, seguindo-se um debate com participaçom do público.

Finalmente, passadas as 22 horas, começou a representaçom do grupo teatral basco Interruptus, que combinou a música de intervençom com versons de Silvio Rodríguez, Kortatu, La Polla ou Negu Gorriak, com monólogos da consciência de um único personagem interpretado a duas vozes através da narraçom vital de um jovem basco.

Se quigeres adquirir o documentário "A céu aberto" em dvd, é só passares polo centro social. Temos alguns exemplares à vossa disposiçom por 8 euros cada.