No próximo sábado 22 de Dezembro contaremos no nosso Local Social com o Funki-Reagge-Rap do ganhador na categoria livre do nosso II Concurso Musical do Festival da Terra e da Língua o Som do Galpom.
O concerto começará às 22.30 e o bilhete será de 3 euros para o público em geral e de 2,5 para @s sóci@s da Fundaçom Artábria.

Segundo se definem eles próprios:

"Som do Galpom nasce em Dezembro de 2005 numha aldeia (A Moninha) perto de Compostela. A verdade é que todos os integrantes do grupo trazíamos multitude e variadas propostas do tipo de música que queríamos fazer. No entanto, todos coincidíamos em apostar numha formaçom inovadora e original que se apoia nas raízes de três estilos de música diferentes que, ao mesmo tempo, semelhavam mui próximos como som: o funky, o reagge e o rap."

Quanto aos princípios do grupo:

"No projecto é importante a música mas, no nosso caso, dá-se muita importáncia à mensagem, a todo aquilo que queremos e precisamos de transmitir. Neste ponto, também houvo umha clara decisom e era que o nosso idioma seria o galego, a nossa língua mae."

Mais informaçom:
http://www.komunikando.net/