Como anunciamos há uns dias, a Artábria vai estar a partir do primeiro dia de 2008 "de olho no conflito lingüístico em Trasancos". E vamos fazê-lo graças à iniciativa da Comissom de Língua, que abriu um blogue que reproduz todo o tipo informaçons e oferece documentaçom relativa aos direitos lingüísticos na nossa comarca.

Continua:

O novo espaço na rede é um projecto da Fundaçom Artábria, dedicado a acompanhar a actualidade do conflito lingüístico, com a comarca de Trasancos como alvo, ainda que também inclua informaçons nacionais que tenhem influência na mesma.

Os conteúdos vam ser as notícias aparecidas nos meios de comunicaçom, bem como artigos de opiniom, exactamente como fôrom publicados na fonte de origem, junto a umha ligaçom para poder visitá-la. Além disso, terá conteúdos próprios relacionados com iniciativas e dinámicas comarcais em relaçom ao nosso idioma.

Por outra parte, oferece-se umha secçom chamada «Documentaçom», onde som oferecidos documentos legais e outros trabalhos atinentes à política lingüística na Galiza. Por enquanto, já som disponibilizados textos como a Lei de Normalizaçom Lingüística, de 1983, a Ordenança Municipal de Normalizaçom Lingüística da Cámara de Ferrol, de 1997, o novo Decreto sobre o uso e a promoçom do galego no sistema educativo, de 2007, ou o Plano Geral de Normalizaçom da Língua Galega, entre outros.

As postagens, que darám preferência às notícias sobre os concelhos de Ferrol, Narom, Fene, Neda, Mugardos, Sam Sadurninho, Moeche, Ares e as Somoças, admitem comentários e, segundo se reconhece na definiçom do blogue, «Como qualquer outro meio de comunicaçom, nom somos neutrais. Queremos servir à causa da plena recuperaçom dos direitos lingüísticos galegos. Mas, ao contrário que alguns deles, nós nom manipulamos. »

Encorajamos @s noss@s visitantes habituais a dar um pulo daqui para o novo blogue, para estardes a par da actualidade do nosso idioma com informaçons pontuais e visom crítica.