O décimo oitavo aniversário do falecimento de Ricardo Carvalho Calero voltou a servir para lembrarmos a sua importáncia na cultura galega do século XX. Um grupo de sócios, sócias e amizades da Fundaçom Artábria concentramo-nos em frente da casa natal de Carvalho, na rua Sam Francisco do bairro de Ferrol Velho, para fazermos um pequeno acto de homenagem.

Continua:

O acto contou com umha oferta floral, a leitura de textos literários de Ricardo Carvalho Calero e umhas palavras de lembrança, nas quais se sublinhou nom só os méritos do escritor e o investigador literário e lingüístico, mas também os do intelectual honesto e comprometido com o seu país e com o seu tempo.

Lembrou-se o seu activismo juvenil republicano e nacionalista, a sua adesom ao bando democrático na Guerra Civil, a prisom, o ostracismo a que foi submetido durante o franquismo. Também a coerência com que sempre mantivo as ideias autodeterministas, republicanas e reintegracionistas, com a língua como facho da sua actividade intelectual durante toda a sua longa vida.

Neste ano, o acto de homenagem também incluiu umha referência à nossa campanha para que a Academia Galega reconheça o valor da obra de Carvalho, dedicando-lhe por fim um Dia das Letras que bem pode ser o próximo, em 2009. Assim, coincidindo com este 25 de Março, apresentamos o novo blogue dedicado à campanha ‘Carvalho Letras Galegas ‘09’, onde iremos informando de todas as iniciativas relacionadas com a mesma.

Ao concluir a concentraçom da rua Sam Francisco, as e os concentrados dirigimo-nos ao Centro Social da Fundaçom Artábria, em Esteiro, onde se oferecêrom uns petiscos e se continuou com umha agradável conversa na noitinha ferrolana.