Há já umha década que a Fundaçom Artábria conheceu em primeira mao a experiência de auto-organizaçom popular em defesa da língua e da cultura basca que os companheiros e as companheiras de Zenbat Gara e do Kafé Antzokia representam. Desde aquela altura, figemos vários intercámbios entre Trasancos e Bilbo, entre a Galiza e Euskal Herria, baseadas na irmandade entre povos que luitam pola autoconstruçom como tais.

Continua:

Delegaçons da Fundaçom Artábria viajárom em várias ocasions ao País Basco, e delegaçons da Zenbat Gara visitárom Ferrol e Narom, participando em conferências, concertos e no Festival da Terra e da Língua.

Agora, temos notícias da clausura temporária imposta pola Cámara Municipal de Bilbo ao velho cinema transformado em grande sede da cultura popular basca em pleno centro da cidade biscainha. Umha sançom, acompanhada de multa, obriga a paralisar a contínua actividade do Antzokia por um suposto excesso de lotaçom durante o desenvolvimento de um acto.

É nestes momentos que da Galiza queremos transmitir a nossa solidariedade a toda a massa social que sustenta esse projecto, que a própria entidade define como “oásis de euskara” numha cidade hegemonizada polo espanhol. É lamentável que, em lugar de procurar soluçons de consenso que favoreçam e dinamizem a actividade de quem com tanto empenhamento defende a produçom cultural basca, as instituiçons públicas optem pola via repressiva e pola puniçom económica.

Na Fundaçom Artábria, apesar da nossa conhecida modéstia de meios materiais, oferecemos a nossa colaboraçom aos companheiros e companheiras da Zenbat Gara e do Kafé Antzokia, um projecto imprescindível para Bilbo e um espelho em que sempre nos olhamos aqueles e aquelas que defendemos os direitos lingüísticos colectivos de outros povos, no nosso caso o galego.

Fundaçom Artábria
Ferrol (Galiza), 15 de Janeiro de 2009