Umha selecçom de petiscos cataláns foi o preámbulo de umha noite de música de autor catalá no nosso Centro Social. Música de intervençom, com mensagem e de qualidade, com Cesk Freixas, que com a sua guitarra e a sua voz fijo desfrutar as pessoas que nos achegamos à Artábria apesar do mau tempo e os apagons que ainda duravam do forte temporal da sexta-feira.

Cesk Freixas apresentou-nos o seu segundo trabalho discográfico, 'El camí cap a nosaltres', mostrando-nos em todo o momento a simpatia catalá polas causas que nos unem, desde a luita pola língua até a libertaçom da mulher, atravessando esse caminho em direcçom a nós própri@s que é a autodeterminaçom nacional.

Além das belas músicas do seu novo disco, como 'Ovidi', 'Vaixells de llibertat', 'Dies i nits d'amor i de guerra' ou a que dá nome ao disco, 'El camí cap a nosaltres', Cesk cantou clássicos da música de intervençom catalá, como 'Al vent', de Raimón, com que começou e findou o concerto, ou a versom em catalám da grande 'A desalambrar' ('Traieu els filats'), popularizada polo imortal Víctor Jara e versionada polo jovem autor catalám.

Como sempre, mostramos-vos umha pequena reportagem gráfica da presença deste novo amigo e companheiro catalám da Galiza, que antes de estar em Ferrol já cantou no Centro Social do Pichel, em Compostela, e proximamente concluirá a sua turné galega na Esmorga de Ourense, no dia 26.

E concluímos gabando-nos do autógrafo de Cesk Freixas à Fundaçom Artábria, no interior da caixa do novo disco, e que partilhamos aqui convosco...