Na Fundaçom Artábria, que desde o momento do seu nascimento situou a defesa do direito colectivo do povo galego à língua que criamos há mais de mil anos, queremos somar a nossa à voz de todos os colectivos e sectores sociais que denunciam a presença dos extremistas antigalego nas ruas da nossa capital.

Continua:

O fenómeno dos grupos ultras que, já sem máscara, defendem abertamente a imposiçom unilateral do espanhol no nosso país, é um verdadeiro desafio que nom pode ser desconsiderado como se nom estivesse aí.

O momento histórico actual, com as menores percentagens de uso social do nosso idioma na Galiza autonómica e supostamente “democrática” representa, sem dúvida, um sério questionamento das políticas bilingüistas aplicadas por todos os governos autonómicos desde 1978. O ressurgimento de sectores ultras que, como o próximo domingo farám em Compostela, exigem acabar com qualquer política em favor do galego e pedem a supressom de qualquer norma legal que o favoreça, é o resultado dessas mesmas políticas bilingüistas.

Por todo o anterior, na Fundaçom Artábria preferimos dirigir as nossas críticas aos responsáveis políticos pola alarmante situaçom social do nosso idioma e pola absoluta falta de respeito aos direitos lingüísticos do nosso povo.

Exigimos a todas as instituiçons públicas instaladas na Galiza umha mudança real na política lingüística, que dê ao galego verdadeiro protagonismo em todos os ámbitos possíveis: dos meios de comunicaçom ao comércio, do cinema à justiça, do ensino aos tempos livres.

Fazemos também um apelo à populaçom galega mais consciente para que se mobilize nessa direcçom, em todas as oportunidades possíveis. A deste domingo dia 8 vai ser umha, daí que apoiemos todas as iniciativas anunciadas para fazer frente à presença antigalega nas ruas de Compostela. Levemos a elas a digna revindicaçom do direito à nossa única língua nacional: o galego.

Fundaçom Artábria
6 de Fevereiro de 2009