Depois de lermos nos meios de comunicaçom as confusas declaraçons do presidente da cámara acidental, José Manuel Vilarinho, sobre umha possível modificaçom que levaria a esvazie de conteúdo a vigente Ordenança Municipal de Normalizaçom Lingüística, a Fundaçom Artábria vai solicitar umha reuniom com José Manuel Rei Varela, presidente da Cámara Municipal de Ferrol.

Nessa reuniom, esperamos ter ocasiom de conhecer diretamente as intençons do novo governo municipal em relaçom à nossa língua e à aplicaçom da referida Ordenança, aprovada por unanimidade de todos os grupos municipais há quase 15 anos e ainda incumprida na sua maior parte na atualidade.

Seria preocupante que, tal como se informou nalguns meios, o atual governo municipal estivesse pensando em retirar os conteúdos mais favoráveis ao único idioma verdadeiramente necessitado de apoio institucional, como é o galego, em lugar de pensar em como conseguir que se cumpram os preceitos incluídos nessa norma municipal.

Queremos por último lembrar que a falta de compromisso dos governos municipais tem impedido até hoje o cumprimento da Ordenança Municipal de Normalizaçom Lingüística, um texto que, se bem é insuficiente para conseguir a plena recuperaçom social do galego, constitui um ponto de partida cuja aplicaçom é necessária para avançarmos nessa tarefa em Ferrol.

Esperamos que José Manuel Rei Varela poda informar-nos de quais som os planos do seu governo em matéria de normalizaçom lingüística, já que até este momento nom se fijo pública nengumha medida nesse ámbito de atuaçom do atual governo.

É com esses objetivos que a Fundaçom Artábria vai solicitar umha reuniom em que transmitiremos a preocupaçom da nossa entidade e pediremos que se nos explique qual será a açom do governo em favor da língua galega no nosso concelho nos próximos quatro anos.

Fundaçom Artábria
Ferrol, 12 de agosto de 2011.