« Inaugurada exposiçom fotográfica sobre a Palestina | Semana de solidariedade com a Palestina de 14 a 19 de novembro » |
No próximo dia 10 deste mês fai-se o primeiro ano do falecimento do companheiro Martinho, destacado militante da causa lingüística e cultural da Galiza e do projeto representado pola Fundaçom Artábria.
Na nossa entidade nom queremos deixar passar este mês sem dedicarmos umha jornada a lembrar José Manuel Sanmartim Bouça, Martinho, como pequena mostra do agradecimento pola sua entrega e de homenagem merecida a um compatriota que deu o melhor da sua vida à luita e à construçom de umha Galiza livre e em galego.
A jornada escolhida é o dia 26 de novembro e, sendo um motivo tam especial, nom queremos deixar de fazer público um convite aberto a todo o tecido associativo de Ferrol, Trasancos e Galiza, para participar nos atos previstos, no cemitério de Baralhobre, onde repousam os seus restos, e no próprio Centro Social da Fundaçom Artábria. Contaremos com poesia, música e um jantar de confraternizaçom como tantos em que o próprio Martinho participou junto aos companheiros e companheiras da Fundaçom Artábria. Também projetaremos o documentário "Martinho: O sorriso insubornável dum guerrilheiro galego", da autoria de Augusto Fontám.
Para além das propostas de atividades que vamos apresentar, a jornada estará aberta às intervençons das pessoas que quigerem intervir na homenagem tomando a palavra ou com qualquer outra iniciativa de lembrança do companheiro homenageado.
Nos próximos dias concretizaremos os horários, colaboraçons e outras informaçons sobre esta jornada, na qual a Fundaçom Artábria vem trabalhando nas últimas semanas.
Quem compartilhou com Martinho a defesa da nossa língua e da Galiza e quem viu como era sempre o primeiro em trabalhar, o primeiro em achegar as suas capacidades nunca esquecerá a liçom que dava sem ele pretendê-lo; a sua humildade e a sua entrega eram, som e serám sempre um recordo que infunde um grande respeito e que levaremos sempre gravado.
Obrigado, Martinho!