A oferta cultural nom para na Fundaçom Artábria, e este mês de outono vem carregado de atividades no nosso Centro Social.

Full story »

Amanhá, quinta-feira 5 de novembro, às 20.00hs terá lugar a inauguraçom oficial da exposiçom fotográfica da jovem artista ferrolana Esperanza Vázquez.
A exposiçom sob a legenda "Branco e negro" consta de 10 imagens e em palavras de Esperanza Vázquez o projeto é umha materia pendente desde que começou na arte da fotografia.

A exposiçom é umha monstra da "sua visom, dos seus caros detalhes e de vários elementos chaves na sua pessoalidade".

"Branco e Negro" estará disponível no nosso Centro Social até o 30 de novembro, e poderá visitar-se em horário de 10h a 13.30h e de 17.30 a feche do local.

No sábado 31 de outubro a Fundaçom Artábria programa umha completa jornada de atividades que servirá de feche ao nosso XVII aniversário.

Full story »

A iniciativa municipal abertamente antigalega do partido Ciudadanos na nossa cidade, que pretende suprimir o galego da precária cooficialidade reconhecida por essa instituiçom, pom sobre a mesa a necessidade de um compromisso real do Concelho de Ferrol com o nosso idioma.

Som quase duas décadas decorridas desde a aprovaçom unánime da Ordenança Municipal de Normalizaçom Lingüística e, desde aquela, a Fundaçom Artábria e outros setores comprometidos com a nossa língua nom deixamos de reclamar esse verdadeiro compromisso na prática diária dos sucessivos governos.

Em Ferrol já governárom todos os partidos possíveis e nengum deles assumiu esse compromisso. Certamente, nom fôrom igual os governos do PP e IpF que os do BNG, IU ou mesmo PSOE. Porém, o galego nom deixou de ser um recurso retórico, nem muito menos chegou a contar com um plano de atuaçom efetivo em áreas concretas para conseguir dar-lhe o lugar que merece na instituiçom municipal e na sociedade ferrolana.

Todos os recursos de poder, político, económico, laboral, educativo e mediático dam ao espanhol um papel dominante que nengum governo municipal se atreveu a enfrentar.

Tampouco o atual governo apresentou até hoje nengumha medida significativa para mudar a gravíssima situaçom de perda de falantes e sutil, mas implacável, invisibilizaçom social do nosso idioma em Ferrol.

Sabemos que o desafio da recuperaçom do galego vai muito além dos poderes de um governo local, mas também sabemos que no seu ámbito de atuaçom pode fazer muito mais que umha aparente e parcial galeguizaçom administrativa, objetivo máximo dos governos mais ?ambiciosos? na matéria em todos estes anos.

A falta de estratégia galeguizadora, junto à pressom crescente da ideologia espanholizadora dominante, permitem agora que o grupo ultra Ciudadanos ataque frontalmente o direito coletivo do nosso povo à língua própria.

Situamos, por isso, a responsabilidade pola iniciativa lingüicida da concelheira Ana Rodríguez Masafret corresponde nom só a esse partido extremista, mas também ao conjunto do Pleno municipal que até hoje foi incapaz de mudar significativamente o estatuto institucional e social do galego em Ferrol.

A esse labor continuaremos a dedicar-nos na Fundaçom Artábria, denunciando claramente toda agressom à nossa soberania lingüística, como a agora protagonizada pola representante do partido antigalego Ciudadanos.

Fundaçom Artábria
Ferrol, 23 de outubro de 2015

Sábado 24 de outubro, às 22.30h os ferrolanos Kurwa trarám o seu rock ao nosso Centro Social. A entrada é de balde!

Nesta sexta-feira, 23 de outubro, o Séchu Sende apresenta o seu último trabalho "A República das Palavras", na Fundaçom Artábria. O ato dará início às 20.30h e haverá exemplares à venda para ser assinados polo autor.

A República das Palavras? é o segundo volume de Séchu Sende na Através. Neste caso o autor de Animais apresenta-nos um conjunto de relatos que som a continuaçom do anterior Made in Galiza.

Séchu Sende, (Padrom, 1972) é poeta e narrador, sociolinguista, ativista social e domador de pulgas no ?Galiza Pulgas Circus?. A sua obra Made in Galiza foi traduzida ao curdo, ao turco, ao catalão, ao euskera. Os seus textos convertem-se em cançons, obras de teatro, lemas de camisolas, curta-metragens ou campanhas de publicidade social. Também escreve textos de guerrilha da comunicaçom, manifestos da Resistência, listas da compra e palavras como tattoos nas mãos das suas duas filhas.