CONSULTA:

Segundo o Manual de iniciaçom à língua galega, os verbos em -azer ou -uzir perdem a vogal temática na terceira pessoa do presente do indicativo: ele produz/praz/etc. Estas formas verbais dam-se na Galiza? Acontece o mesmo com querer e valer (ele quer/val)?

Ivám

RESPOSTA DA COMISSOM LINGÜÍSTICA:

Conforme o Guia Prático de Verbos Galegos Conjugados da Comissom Lingüística da AGAL, a terceira pessoa do singular do presente do indicativo dos verbos findos em -azer e -uzir perde, com efeito, a vogal temática (jazer > jaz, conduzir > conduz), embora a conservem quando seguidos do pronome de complemento direto o, a, os, as (conduze-o(s), conduze-a(s)). É verdade que no galego espontáneo contemporáneo nom se registam estas formas, mas tal tem ficado a dever-se à postergaçom sociocultural que o galego padece desde o século XVI (início dos Séculos Obscuros), o que nuns casos determinou a erosom de unidades lexicais de cariz formal já existentes na fase medieval (como jazer > jaz) e, noutros, a estagnaçom e suplência castelhanizante (nunca chegárom a cristalizar de forma autónoma na Galiza conjugaçons de verbos «modernos» como os findos em -duzir: aduzir, conduzir, produzir, etc.).

Quanto aos verbos querer e valer, diga-se que as formas patrocinadas pola Comissom Lingüística da AGAL para a terceira pessoa do singular do presente do indicativo som, respetivamente, quer e vale. No galego espontáneo contemporáneo, as formas quer e val estám registadas, com efeito, em diversos pontos da geografia galega.