Com muita intensidade vivemos as perto de 48 horas em grupo decorridas este passado fim de semana no concelho de Noia. A militáncia de AGIR e BRIGA assistente à Escola de Formaçom 2011 regressou cansa, como nom, mas satisfeita do trabalho que mais um ano nos tem permitido desenvolver esta iniciativa única no espaço do independentismo juvenil.

Três dias de sol e ceus azúis, de muitas horas de luz nestas férias de primavera que chegárom tarde este ano. O lugar, a paróquia da Barquinha, um espaço fermoso e acolhedor, tranquilo e apropriado para a juntança nacional de cada ano. Próximos ao lugar de descanso estavam o resto de pontos que visitamos para levar a cabo todas as actividades previstas. Agradecemos antes de mais todas as pessoas que, desde fora das nossas organizaçons, facilitárom e figérom possível o convívio nesta localidade.

Sexta-feira.

Dia de chegada e reencontro entre algumhas pessoas. Jornada para a preparaçom do espaço durante a manhá e parte da tarde. Umha breve saudaçom em nome da Comissom organizadora por parte dumha companheira de AGIR. E grande novidade até esta ediçom nas Escolas de Formaçom: o Trivial Galego organizado por um grupo de companheir@s . Muitas perguntas com respostas conhecidas, difíceis ou controvertidas, tempo para as risas e para activar as neuronas decatando-nos que fica ainda muito por saber de cousas mais ou menos próximas à nossa realidade. Temáticas variadas e agilidade no jogo. Equipas de parelhas. Correcçom das perguntas e debates típicos ou ocorrentes. Passou-se o tempo e nem nos demos conta. Um merecido aplauso à ábritra e árbitro, e proclamaçom do par vencedor. O ano que vem haverá revancha?

A foliada nem deu começado. Acordamos à 01.30 da manhá com a cabeça dando voltas àquelas perguntas que mais nos chamaram a atençom, e a música ficou a um lado para sorte da vizinança mais achegada, numha noite silenciosa na aldeia da Barquinha em que antes e depois do jogo sobre conhecimentos pudemos estar comodamente sentad@s e falando sem frio à beira do caminho em que se acedia ao soto da associaçom Pedra da Loureira.

Sábado

Chegam os raios de sol abrindo-se passo desde o Atlântico à comarca de Muros-Noia. Erguemo-nos com o almorço preparado por um par de companheiros e comemos tranquilamente. Por diante, umha espléndida manhá veraniega em que nos ocultamos um pouco do sol baixo a flora do roteiro polas beiras do Tambre. As trampas para as lampreias, a poça das ras, as fervenças e o surco marcado polo rio nas rochas, umha inclinaçom espectacular das abas a ambas beiras, a vegetaçom em flor. Com as imagens que anexamos poderá-se apreciar em diferido parte do percurso escolhido para esta ocasiom.

Mais de duas horas longas de movimento em colunas atravessando mais umha paragem da Galiza ocidental, dentro dos concelhos de Serra de Outes e Noia. O jantar decorreu numhas instalaçons de descanso situadas num ponto intermédio do caminho, junto à central hidroeléctrica que explora os recursos fluviais naturais da zona.

Recém acabada a comida, marchamos de regresso e decorrem as palestras e obradoiros desta ediçom. Grande ilustraçom elementar das categorias marxistas no presente achegada polo trabalhador e companheiro viguês da Unidade Popular Alberte Moço. Deu pé a numerosas intervençons, conversas e debates dentro e fora do tempo de intervençom do ponente.

Também nos falou com grande espírito pedagógico e concentraçom de conceitos outro jovem surenho. Com Manuel introduzimo-nos no mundo da segurança informática. Liçons importantes sobre um mundo em que estamos tod@s metid@s mas nom controlamos como deveriamos. Liçons, enfim, que haverá que continuar a tratar sem dúvidas com mais tempo e recursos.

E de sul a norte, o trasanquês Carlos expujo num obradoiro prático o interessante mundo do stencil. Um programa de intervençom nas nossas ruas para transladar a mensagem da juventude acalada pola dominaçom mediática. Com melhores e mais fórmulas de projecçom, a qualidade da nossa presença em vilas e cidades aumentará o seu efeito chamada contra a passividade e o atordimento e monopólio da publicidade quotidiana.

Nom demoramos em marchar cara a vila. Noia ofereceu-nos um serám e noitinha numha vila a pé de praia. Chegamos quando ainda brilhava o sol, e marchamos várias horas depois no que foi a primeira saída nocturna na zona para a maioria, após um concerto boicotado à metade da sua duraçom polas ameaças policiais, que escusárom a obriga de paralisarmos a música polo ruído. Comando Robalisa deu trégua por força maior, mas continua na comarca do Barbança ensaiando próximas actuaçons em diferentes eventos musicais, oxalá que mais pronto que tarde também com nós em melhores condiçons e sem polícia por meio. Malia o inicial descontentamento pola paralisaçom da música ao vivo, reagimos com ganas de aproveitar a pouca noite que tínhamos por diante antes de regressar ao local. Umha volta por Noia e a dormir.

Domingo

Erguemo-nos algo mais tarde que o dia anterior, com o propósito de descansar algo mais os corpos após umha noite de troula. Mas erguemo-nos com ganas de continuar activ@s.

Caminhamos cara a pista desportiva da aldeia e ocupamo-la um domingo de manhá para dar-lhe vida. Nela introduzimos jogos populares galegos, cuja explicaçom vinha contida no caderno especialmente editado para esta cita: o brilé, a chave, o turra-soga, a bilharda. O sol já nom caía tam forte graças a umha ligeira camada de nuvens altas, e permanecemos mais de duas horas aprendendo alguns detalhes dos jogos e praticando-os em equipas que acabariam a competiçom decidindo o triunfo num desigual desempate turrando da soga.

Antes de jantar por última vez, quigemos praticar o aprendido o dia anterior no seminário de stencils. Onde? Que melhor lugar que umha imensa parede caleada ao efeito, a poucos metros da ria, que ficou algo irregular como podedes apreciar na imagem. Mas, em definito, estávamos ensaiando...

Umha manhá intensa, como em geral a Escola toda. Jantar e, combatendo com o sono para permanecer em pé a digestiom, avaliamos o funcionamento e decurso desta ediçom em assembleia para posteriormente encerrar com umha pequena alocuçom de despedida a cargo de BRIGA.

Até 2012

E assim em 2011, como nos 7 anos anteriores, a juventude trabalhadora e estudante do Movimento de Libertaçom Nacional Galego continuamos afortalando laços e tecendo história juntos e juntas. Criando memória positiva que afiançará a coesom nas jornadas de luita que o presente e o futuro nos estám a demandar.

Construindo um futuro nosso que necessariamente exige tombar o presente. A Escola de Formaçom fecha portas até 2012, um ano inteiro por diante para que as nossas organizaçons BRIGA e AGIR continuem de maos dadas a oferecer umha alternativa organizada à juventude galega independentista, socialista, e feminista.

Já falta menos dumha semana para congregar a juventude da esquerda independentista convocada polas entidades estudantil AGIR e juvenil BRIGA na Escola de Formaçom 2011.

Após fazer público o horário de actividades no anterior post, fazemos este último chamamento à participaçom de todas e todos quem podam assistir. Temos 3 dias por diante para falar do presente e futuro da nossa luita, e dos objectivos imediatos que a juventude rebelde galega deve assumir para coesionar as suas estruturas organizativas.

O fim-de-semana prévio às férias de primavera é sempre um bom momento para passar uns dias com boas companhias e esperanças compartidas. Oxalá o bom tempo também nos acompanhe!

Com a formaçom e o encontro construiremos os mecanismos para tombar o presente, para construir o futuro.

De novo escrevemos no blogue da Escola de Formaçom. A Comissom criada polas entidades convocantes, AGIR e BRIGA, quer fazer público agora o horário de actividades para este ano.

Animamos-vos a tomar parte em futuros eventos como este organizando a juventude rebelde nas vossas cidades, vilas e comarcas. Em citas nacionais como a da Escola de Formaçom encontramo-nos procedentes de diversos pontos do País.

SEXTA-FEIRA

18,30 horas: Início da chegada e instalaçom.
19,30 horas: Jogo do Trívial galego.
22 horas: Acto inaugural de bem-vinda a cargo dum/ha companheir@ de AGIR.
22,30 horas: Ceia com petiscos
Posteriormente desfrutaremos dumha foliada com música ao vivo!

SÁBADO

9,00 horas: Almorço.
10,30 horas: Roteiro (duraçom aprox. 2/3 horas)
14 horas: Jantar
16 horas: Início das palestras e obradoiros
20,30 horas: Ducha
21,30 horas: Ceia
00.00 – 03.00 horas: Concerto e festa nocturna

DOMINGO

10,00 horas: Almorço.
11,00 horas: Jogos populares
13,30 horas: Mural
15,00 horas: Jantar
16,30 horas: Assembleia valorativa da EF '11
17,30 horas: Despedida a cargo dum/ha companheir@ de Briga

Os preparativos para a Escola de Formaçom 2011 começárom lá vai um bom tempo. As organizaçons convocantes deste evento, AGIR e BRIGA, dispugemos o pessoal e os recursos necessários para que estas semanas tivessem lugar os trabalhos oportunos para chegarmos a este mês com o programa de actividades listo.

A Escola de Formaçom é um encontro juvenil consolidado ao longo de mais de 7 anos de desenho e esforços, que se tem saldado com 7 citas consecutivas desde o ano 2004, e que alcança 2011 com plena utilidade para o convívio e a formaçom entre jovens vinculad@s à esquerda independentista, de prática e pensamento emancipador.

Agora que a Escola de Formaçom forma parte da pequena história do nosso Movimento de Libertaçom Nacional, e particularmente das suas organizaçons estudantil e juvenil, agora que dúzias de anedotas, de histórias e de conhecimentos circulárom no nosso pequeno universo de acçom e pensamento, as e os herdeir@s das pessoas que começárom com esta iniciativa recolhemos o testemunho seguindo o exemplo: passar um fim-de-semana divertido, de camaradagem e conhecimento mútuo, com várias e distintas actividades de lazer e aprendizagem.

Ainda nom podemos revelar-vos muitas das linhas que marcarám esta ediçom, mas sim podemos convidar-vos a conhecer mais de perto a autoorganizaçom juvenil polo País adiante para construir umha Galiza independente, socialista e antipatriarcal.

Em breves continuaremos informando. Desde já, damos por inaugurado o blogue da Escola neste ano 2011!

www.agir-galiza.org
nacional@agir-galiza.org

www.briga-galiza.org
nacional@briga-galiza.org

Após um primeiro anexo de imagens da Escola de Formaçom, oferecemos a seguir este segundo dedicado expressamente ao roteiro.

Agradecemos de novo o nosso guia, membro da Sociedade Galega de História Natural, que se moveu polo lugar como se estivesse na casa e agradeceu poder mostrar-nos este lugar do País para conhecermo-lo melhor.

Bacia do rio afectada no seu caudal polos aproveitamentos hidráulicos de Unión Fenosa

Panorámica do abrente nas fragas

"Fugindo" monte arriba

Colunas de jovens independentistas

Cruçando umha das pontes

A "Pena dos Maquis"

Escuitando Manolo, o nosso guia

O leito do rio Eume

Subimos a seguir mais imagens da Escola, como complemento à crónica anterior:

Vista desde a casa. Ao fundo, concelho de Cabanas

Imagens da ceia no Local do Centro Social mais veterano: a Fundaçom Artábria! Comida para nom esquecer

Mesa de material

A GC fazendo o seu trabalho: incordiar para encher os seus ficheiros

AGIR e BRIGA organizárom pola sétima ocasiom a Escola de Formaçom, finalizada este Domingo ao longo da tarde no concelho eumês de Pontedeume. Como a primeira vez, em 2004, um nutrido grupo de jovens preparárom e desenvolvêrom um intenso fim-de-semana de convivência e actividade formativa e lúdica.

A Escola de Formaçom 2010 deu continuidade a um evento inusual dentro da esquerda independentista galega, organizado por e para moços e moças, e que vai de ano em ano constituindo-se como ferramenta útil e aperfeiçoada de coesom interna entre pessoas militantes de diversas comarcas do País, com distintos graus e formas de experiência e milhares de matizes que aportar para a obra colectiva dumha Galiza livre, vermelha e lilás.

SEXTA-FEIRA

Como noutras citas, a tarde e noite toda fôrom cenário da progressiva chegada de companheir@s que atopárom no Centro Social Ocupado A Casa da Estaçom um lugar cómodo, acessível, e autogestionado por jovens da comarca nortenha. Os e as companheiras do Eume dérom prova do seu sacrifício para levar adiante nas melhores condiçons possíveis este Centro, permitindo um fácil acomodo de tod@s malia as dificuldades que envolve ao tratar-se dum prédio abandonado.

A música ao vivo, incorporada com instrumentos tradicionais e cánticos vários, procedeu a umha ceia de petiscos e o discurso de boas-vindas que ofereceu o Aarom, companheiro da comarca. Referindo-se às históricas luitas irmandinhas havidas nas redondezas, e como nom à ilusiom pola oportunidade deste encontro nacional para conhecermos aquele lugar.

Sem permitirmos que demorasse muito a jornada de recebimento, procuramos deitar-nos cedo para estar prestes na hora de saír à manhá seguinte de roteiro, de acordo com o calendário de actividades previsto para este ano.

SÁBADO

Manhá

A manhá do sábado foi umha fortuna: ceus quase totalmente despejados e umha temperatura morna agradável, figérom possível um roteiro polas fragas do Eume inesquecível. Um bosque atlántico autóctone, conservado malia a sede insaciável de Union Fenosa, que gere no lugar umha central produtiva tremendamente impactante para a natureza do lugar. Um espaço com umha virginidade assombrosa na maioria da extensom das fragas.

O roteiro começou bem cedo à manhá, acompanhados dum guia que se ganhou a admiraçom, os aplausos e o carinho de tod@s graças a um esforço e um amor imenso pola natureza que nos transmitiu ao longo de três horas caminhando por estreitos sendeiros e terra lamacenta polas chuvas dos dias prévios. Vimos a Pedra dos Maquis, o leito do rio Eume, a flora imortal legada desde a época dos dinossauros, os tubos metálicos utilizados na 2ª Grande Guerra polos nazis, a infinita massa arvórea do terreno, os motivos e as conseqüências da exploraçom dos recursos hidráulicos por parte do grande capital, a desembocadura do Rio da Laje, os restos de cinças das "foias", etcétera...

Dentro do horário previsto, e em companhia dum guia que nos regalou umhas fermosas e emotivas palavras como sobre-mesa, jantamos recolhidos no ár puro que nos acompanhou toda a manhá, justo antes de que as nuvens volvessem cobrir os ceus e nos tivessem dado portanto umha trégua no melhor momento.

Tarde

Após encher o bandulho para calmar as ganas de comer que nos deixou o percurso polas fragas, arrumamos o lugar para receber na Casa da Estaçom as ponências dos convidados à sessom vespertina de palestras. Esta começou com a intervençom de dous militantes do sindicalismo nacional e de classe, dous trabalhadores com anos de preparaçom no campo da intervençom política de massas orientada especificamente à defesa desde a CIG comarcal de Trasancos dos interesses de classe do Povo Trabalhador Galego. Dumha óptica revolucionária, Rodolfo e Óscar transmitírom-nos o sentido que fai como comunistas patriotas o sindicalismo, a dialéctica entre as demandas economicistas e a política operária abrangente, e outros aspectos analisados ponto por ponto e com a introduçom histórica ao actual panorama sindical nacional, as origens históricas do sindicalismo de classe com destaque para o que se tem gestado nos últimos cem anos dentro das estruturas do Estado. O porquê de intervir como jovens e desde a junvetude dentro dos sindicatos conseqüentes, e o protagonismo da juventude nas luitas obreiras mais recentes e outras mais distantes, também fôrom motivo de análise e de pedra de toque para chamar-nos a continuar o bom exemplo da corrente da esquerda independentista dentro da CIG.

A seguir fôrom dous companheiros, membros da Mesa Nacional de BRIGA e da Direcçom Nacional de AGIR, Carlos e José respectivamente, quem elaborárom a grandes traços e ajudados por diapositivas e anos de experiência e formaçom, a significaçom da nossa corrente e das nossas estruturas orgánicas juvenis dentro do cenário da esquerda independentista. Saber quem somos, donde vimos, e decidir onde queremos ir. Saber quem nos acompanha nesta viagem cara a independência, o socialismo e o antipatriarcado e como podemos compenetrar-nos. E estudar o desenvolvimento desde começos do sêculo passado de toda a família nacional e de esquerdas. Som questons fulcrais para funcionar e agir como entidades coesas, com um projecto definido que sirva de acreditaçom para a honestidade na luita diária, com nós e com o resto.

Por último, Maurício Castro, professor da EOI de Ferrol, histórico militante comunista galego, amigo de BRIGA e AGIR e colaborador assíduo nas nossas actividades, volveu dar umha liçom, rápida mas pedagógica e compreensível, da situaçom da língua. A ubicaçom temporária e espacial do conflito espanhol-galego no mundo, através doutros exemplos de conflito lingüístico e de noços básicas de sociolingüística e de do binómio política - língua. Como funciona a língua respeito do poder e vice-versa, e como se influem mutuamente as relaçons na sociedade e o papel que joga nesta a língua. Mais umha vez, reintegracionismo sim, e porque sim, fôrom respondidas com eloqüência polo ferrolám.

A todos eles agradecemos o seu esforço por permitir que, mais umha ediçom, a Esola de Formaçom engada ao calendário de actividades formativas e de estudo que incentivamos polo País todo durante o ano todo, mais e mais exposiçom dos assuntos que mais nos interessam e concernem no activismo político.

Noite

Em marcha caminho de Ferrol após tomar umhas duches, em 20 minutos chegamos e instalamo-nos no Local da Fundaçom Artábria, preparado como sempre para receber a visita de dezenas de pessoas.

Um serviço fantástico, conformado pola gente da histórica Fundaçom, ofereceu umha ceia riquíssima que foi digerida com o pincha-discos Heitor, sempre disposto a amenizar-nos as noites quando lho pedimos. O transcurso das horas nom nos moveu de local, que abandonamos para acabar direitamente no Centro Social Ocupado.

DOMINGO

Manhá

Erguendo-nos algo mais tarde por mor da mudança imposta essa noite polo horário oficial de Primavera, fomos rematando as reservas de comida nesta última manhá na Casa da Estaçom.

Finalmente partiriamos para praticar os jogos populares, cousa que se viu interrompida polo segundo controlo consecutivo, em dous dias, colocado pola Guardia Civil sob ordens políticas de identificar todas as pessoas participantes no encontro. Nom só nom o conseguírom por incompetentes, senom que procedêrom a deter umha das pessoas, que se ocupou durante toda a Escola de Formaçom de tirar fotos da mesma e, também, de fazê-lo quando vários veículos eram parados em pleno centro de Pontedeume para testemunhar graficamente a perseguiçom das instituiçons do Estado da dissidência juvenil.

Esse motivo, tirar fotos, foi escusa para proceder à detençom por parte dum dos agentes, decorrida sem mais incidentes devido à calma com que se comportou o conjunto dos e das jovens, que nom quigérom dar o espectáculo que a Guardia Civil pretendia com este excesso imprudente por parte dum dos uniformados.

Cancelados os jogos polo imprevisto, estes fôrom substituídos por um passeio polas redondezas dos concelhos de Pontedeume e Cabanas baixo um céu que aguentou a chuva adentro. A seguir, todos e todas acabamos falando tranquilamente na Casa Ocupada até ao meio-dia ser ceivado o companheiro.

Foi pois um momento para a formaçom antirepressiva, decorrido com a leitura do patético atestado policial de denúncia, onde se relatam uns acontecimentos tam distantes da realidade, que junt@s pudemos observar com incredulidade, raiva e nom sem certo humor, polo facto de ter estado todo o grupo presente no lugar e o momento dos feitos. De todo se aprende e esta circunstáncia nom foi desaproveitada.

Tarde

Após um novo e derradeiro jantar, reuniu-se em pleno a assembleia de valorizaçom da Escola, com críticas, autocríticas, repasso de erros e acertos e compromissos de melhora para a próxima ediçom, que será oitava, em 2011. A assembleia mostrou ser mui útil para compartir ideias em quente, antes de marcharmos cara aos nossos destinos.

Já por último e antes de deixar a casa limpa como estava, fijo-se umha alocuçom de despedida a cargo desta volta do Iago, membro de AGIR, que encerrava assim o que BRIGA abrira com umha semelhante dous dias antes.

De maos dadas, BRIGA e AGIR avançamos. Estendemos a nossa intervençom, o nosso campo de acçom, e ratificamos os nossos objectivos concretando detalhes ano trás ano. Somos capazes de fazê-lo porque nom perdemos momento para ver-nos, para falarmos e para formar-nos. E assim o continuaremos a fazer ao longo do ano, até umha nova Escola para que os novos rostos e os nom tam novos de ambas organizaçons apertem mais os laços de geraçom em geraçom.

A Escola de Formaçom 2010 achega-se do seu início. Em poucas jornadas, dezenas de jovens da esquerda independentista reuniremo-nos sob o trabalho em comum e a convivência formativa para gozar de 3 dias de Primavera.

Esta cita, que se repete pola sétima ediçom ininterrompidamente, foi e está a ser um motivo para o trabalho, e será umha alavanca para a coesom do Movimento de Libertaçom Nacional Galego.

A todas e todos @s que ides participar, adiante com a formaçom, o conhecimento do meio e a diversom. A quem nom podedes, garantimos-vos umha crónica que fará com que o ano próximo nom vos queirades perder esta cita.

Em próximos dias iremos pois actualizando com informaçons sobre o decurso deste Escola de Formaçom 2010.

Os preparativos que levamos avante as organizaçons AGIR e BRIGA para organizar a Escola de Formaçom 2010 avançam com jeito.
Nesta altura podemos oferecer no portal na rede especificamente criado para a difussom destas jornadas, o horário de actividades previstas para esta, os vindouros dias 26, 27 e 28 do presente mês.

Sexta-feira 26:

- 17 horas: Chegada e instalaçom.
- 20 horas: Acto inaugural de bem-vinda a cargo d@ Responsável do Grupo de Base de BRIGA.
- 21 horas: Ceia.
Ao longo da tardinha e noite desfrutaremos de música tradicional ao vivo!

Sábado 27:

- 9,00 horas: Almorço.
- 10,30 horas: Roteiro guiado (duraçom aprox. 2/3 horas)
- 14 horas: Jantar
- 16 horas: Início das palestras:

1. Juventude e sindicalismo
2. O nosso projecto juvenil e estudantil
3. A necessidade do monolingüismo reintegracionista

- 21,00 horas: Ceia
- 00.00 horas: Pinchada e troula!!

Domingo 28:

- 9,30 horas: Almorço.
- 10,30 horas: Gincana (conhecimento do meio e provas) / Jogos populares
- 14,30 horas: Jantar
- 16 horas: Assembleia de valorizaçom da EF '10
- 17 horas: Despedida a cargo dum/ha companheir@ de AGIR

Já estamos às portas dumha nova Escola de Formaçom. A sétima desde que AGIR começara a organizar este encontro anual de jovens activistas e amig@s da esquerda independentista, que tivo em distintos pontos do País o seu marco de participaçom. Este ano 2010, com a crise do capitalismo petando às portas do nosso Povo Trabalhador Galego, as organizaçons estudantil e juvenil do Movimento de Libertaçom Nacional volvemos coincidir no objectivo de fomentar mais e mais formaçom, mais e mais conhecimento de quem somos, onde é que luitamos, e como incidir nos nossos objectivos estratégicos para continuar a passar a bandeira vermelha, lilás e da Pátria a novos e novas agentes que desejamos contribuir a umha sociedade melhor, mais justa.

O blogue da Escola de Formaçom actualizará-se proximamente com toda a informaçom relativa aos eventos que este ano decorrerám no fim de semana que compreende os dias 26, 27 e 28 de Março. Durante o tempo que resta, pouco mais dum mês, informaremos a juventude estudante e trabalhadora de todo quanto tenha a ver com o decurso da Escola de Formaçom '10.

Este primeiro comunicado serve para anunciar que as engrenagens se estám a lubricar para que podamos fazer desta cita anual um novo marco de formaçom e experiência, para reunir num mesmo lugar as perspectivas de autoorganizaçom que dezenas de jovens polo País adiante estamos a experimentar e encetar.

Como na primeira cita, o espírito conserva-se: procuraremos oferecer a todas as pessoas que estejades interessadas umha proposta de Escola singular no nosso País. Um experimento juvenil de emancipaçom e suficiência para testar a Galiza que queremos.

Lembramos a todas as pessoas interessadas que desde já podedes obter mais informaçom escrevendo para os correios nacional@briga-galiza.org ou nacional@agir-galiza.org

Organiza-te e luita!