O Centro Social Henriqueta Outeiro acolhe o próximo sábado 29 de Março às 14.30h um novo jantar revolucionário. Nesta ocasiom umha refeiçom irlandesa dedicada a James Connolly.

A ementa consistirá em:
Creme de mexilhons
Porco assado com mel e "colcannon"
Tarte de maçá
Café irlandês e cerveja irlandesa

Para assistir ao VI Jantar Revolucionário organizado pola Assembleia Aberta do CS Henriqueta Outeiro podes conseguir o cartom no balcom do local ou ligando para o nosso endereço electrónico cshenriquetaouteirogz@gmail.com
Como é habitual o preço som 9 euros.

James Connolly nasceu em Edimburgo em 1868, no seio de umha família emigrante irlandesa. Com tam só onze anos deixou a escola para trabalhar e poucos anso depois, possivelmente com catorze, entrou no Exército británico, sendo destinado a Dublin.
Em 1892, já era umha figura destacada da Federaçom Socialista Escocesa, convertendo-se em Secretário-Geral três anos mais tarde.
Em 1896, abandonou o Exército e formou o Partido Republicano Socialista Irlandês publicando o seu primeiro ensaio político de importáncia: Irlanda para os irlandeses. Foi um dos fundadores do Partido Laborista Socialista, que se separou da Federaçom Social-Democrata em 1903, sendo a mao direita de James Larkin no Sindicato de Trabalhadores Transportistas. Em 1913, em resposta ao lockout, formou o Exército Cidadao Irlandês, um grupo de trabalhadores treinados e armados que luitavam por defender os trabalhadores e organizavam greves. O seu objectivo estratégico era o estabelecimento de umha naçom irlandesa socialista e independente, livre da ocupaçom británica.

Connolly considerava a organizaçom de Voluntários Irlandeses excessivamente burguesa, e pouco preocupada pola independência económica da Irlanda. Em 1915, na tentativa de adoptar umha acçom decisiva contra as forças británicas, estava disposto a assumir acçons imediatas. Tal acçom alarmou os membros da Irmandade Republicana Irlandesa, que tinha realizado um labor de infiltraçom dentro dos Voluntários, e planeava umha insurrecçom em vários anos. Os líderes da Irmandade, incluindo Tom Clarke e Patrick Pearse, reunírom-se com Connolly com vistas a atingir um acordo.
Em 1916, James Connolly já era comandante da Brigada de Dublin, participando no alçamento de Páscoa contra as forças británicas. 24 de Abril é nomeado Vice-Presidente do Governo Provisório da República Irlandesa e Comandante Geral do seu exército. Foi gravemente ferido na batalha, e posteriormente executado polos ingleses.

O seu legado na Irlanda é de grande relevo, polo seu contributo para a causa nacional. A sua obra escrita está fundamentalmente baseada em artigos e discursos, nos quais sintetiza o nacionalismo irlandês com o marxismo, e a necessidade de que a classe operária encabece a luita de libertaçom nacional.
Connolly, como representante da esquerda revolucionária, opujo-se à Primeira Guerra Mundial, o qual provocou o ódio do reformismo.
Lenine foi um grande admirador de Connolly, embora nunca chegassem a conhecer-se pessoalmente.