ovnis e isoglossas

Responde hoje no Diário de Leom umha no Berzo desconhecida "Plataforma pro-identidad leonesa", de certa actividade na cidade de Leom, ao artigo publicado, em espanhol, no próprio Diário de Leom o 1 de Setembro passado, e, em galego, neste blog e noutras webs galegas (PGL, Primeira Linha em Rede, Vieiros,...). Sob o título "El Bierzo es leonés", pretendem nom só negar as históricas relaçons entre a comarca berziana e o resto da naçom galega, mas mesmo negar ao conjunto da populaçom berziana o direito a decidirem o seu futuro.

Evidentemente, quando no próprio título tenhem que deixar constáncia dos seus desejos, confundindo-os com a realidade, eles mesmos estam a reconhecer que um evidente problema de identidade leonesa existe no Berzo, pois de nom estar em dúvida esse "leonesismo" ou "leonesidade" do Berzo, nom teriam necessidade de deixar constáncia disso no próprio título.

Sabem bem eles, os autores do artigo, que, nom será casualidade, nom dam os seus nomes e se agacham sob essa pretendida associaçom pro-identidade leonesa, que o discurso leonesista nom tem demassiados adeptos no Berzo. Nom os tivo historicamente, e nom os tem na actualidade. Será por isso polo que nem os seus nomes aparecem: possivelmente a Plataforma pro-identidade leonesa conte com bem poucos membros do Berzo.

Nos próximos dias, e se os meios de comunicaçom o permitem (isto é: se o publicam), algumhas pessoas que assinavam o artigo "Tira por ela Galiza, mas Castela nom a solta", responderam a este texto leonesista, cheio dos ráncios argumentos supostamente historicistas, que colocam as decissons politico-administrativas dos poderosos de épocas passadas, por riba da vontade dumha comarca inteira.