ovnis e isoglossas

A verdade é que nem eu tenho, nem penso que ninguém na minha família mais próxima tenha, nengum documento de Lugris Freire.
Mas no 2006, quando se lhe dedicou o Dia das Letras, um seu neto, Manuel Lugris Rodríguez, tivo a bem desculpar a sua ausência ao acto que para esse dia celebrava Fala Ceive em Ponferrada, com umha carta sua e um poema de Manuel Lugris Freire que é este que aqui transcrevo.

COLON

¿Que foi galego Colón?
Nin o afirmo, nin o nego.
Por mim pode ser galego
ou ser chino de Cantón.

Non pasan pouco trabalho
furgando en velhos papés
catro sabios do revés
cô mais pedante arruallo.

El nada quixo falar,
encol do seu nacimento;
nen sinal nen documento
se poido ainda atopar.

Mais s'en Galicia foi nado
e adrede o caso calou,
o bon senso o designou
Gran Patrón do Renegado.

O poema, segum explicava Lugris Rodríguez, é completamente inédito, nom publicado em sítio nengum, nem recitado nem conhecido por ninguém. Ele, atopou-no num envelope com outros escritos de Lugris Freire, com a indicaçom por ele mesmo escrita, de que se tratava de inéditos.
A carta de Manuel Lugris Rodríguez, que tinha que ter sido lida por mim nesse acto de Fala Ceive, que se desenvolveu no Campus Universitário do Bierzo, foi finalmente lido por Noélia Fernández, galega de Ponferrada, porque justo nessa semana eu comecei a trabalhar também às tardes e nom cheguei a tempo ao acto. Isso sim, Noélia fijo referência a que naquel recinto havia um outro Lugris, Xende, só que tam pequeno ainda que nom podia nem falar. Se Lugris Freire era tio do meu avó, Xende e Aldám som bisnetos do sobrinho de Lugris Freire, se nom estou errado.

Manuel Lugris Rodríguez enviava também um saudo para essa celebraçom berziana do Dia das Letras que sigue tendo sentido hoje em dia. Neste país nosso, onde, como dizia aquel, todo é porvir e nunca chega, e onde muitas veces parece que só avançamos cara tras, as palavras daquela carta parecem estar escritas pensando em cousas destes dias.

Dizia Manuel Lugris Rodríguez:
"Cando está a celebrarse un día mais das Letras Galegas, desta festa da cultura que cada Ano proclamamos con orgullo e arruallo como umha manifestación pública do que todos e cada un de nós levamos agochado interiormente no que atinxe as nosas angueiras de dignidade, é o momento de facer unha fonda reflexión no que significa a pervivencia desta lingua inmorrente que a pesares de persecucións, incomprensións e a indeferenza de moitos, está viva na musa dos poetas, no verde dos campos e na naturalidade de comunicación dun pobo que proclama no seu uso cotían a solidariedade con todalas culturas do mundo.
Hoxe estades a homenaxear a Manuel Lugris Freire, o meu avó, e na sua memoria quero dicirvos de que estou seguro que non haberia motivo mais doce de ledicia e alegría para el que dirixirse a vosoutros, amigos e compañeiros desa incomparable terra do Bierzo para darvos un saudo irmán e unha aperta de permanencia na ilusión dun idioma común que non poderán afastar todas as forzas negativas deste mundo.
Neste día un saudo e unha lembranza dende este curruncho da Fisterra europea e universal no recordo emocionado de Lugris e da sua obra.
Viva a nosa lingua!!

Manuel Lugris Rodríguez."