ovnis e isoglossas

[youtube]8h_srUypCTE[/youtube]

Via Tangaranho primeiro, e Chuza depois, inteiro-me de que hoje há 20 anos que os Kortatu davam o seu último concerto e se disolviam. O 1 de Outubro de 1988 despediam-se em Iruña com aquel estupendo concerto que depois recolheriam em disco: Azken Guda Dantza.
Para este dia 1 de Outubro o próprio Fermin Muguruza anunciara a apresentaçom do seu novo trabalho, Asthmatic Lyon Sound Sistema, mas parece que nom puido ou nom lhe apetecia aguardar tanto, e já está na rede desde há uns dias o clipe do primeiro adianto desse trabalho, Balazalak, que é o video que aparece aqui arriba.

Continua:

Como é que puderom passar já 20 anos! Ainda lembro bem, ou penso que ainda lembro bem (se calhar, é que quero pensar que ainda lembro bem), a raiva ante a notícia da sua disoluçom. E a mágoa por nom poder estar naquel concerto, na sua Última Dança de Guerra. Depois, pouco depois, por suposto comprei o disco. Deveu ser o primeiro disco de Kortatu que comprei, porque a verdade é que toda a colecçom dos discos de Kortatu e doutros grupos do chamado Rock Radikal Basco, circulava em cópias piratas em cassetes. Daquela, ainda nom sabiamos que aquilo se chamava pirataria e era umha táctica de resistência contra a mercantilizaçom da cultura.
Cassetes e mais cassetes de Kortatu, de La Polla Records, de Potato, de Hertzainak, de Ser Bizio, de M.C.D., de Distorsión,... eram gravadas e regravadas.
Umha anedota: umha noite, numha festa na discoteca Apolo, em Compostela, Kortatu fijo-me ganhar umha garrafa de champam. Faziam um concurso, e havia que escrever num papel qual era para ti o melhor grupo de música. Sorteavam três garrafas, e ademais o pincha punha umha cançom do grupo escolhido. Um dos papeis escolhidos foi o meu. Derom-me a garrafa, mas ao pincha foi-lhe impossível pôr umha cançom dos Kortatu. Eu penso que nem os conhecia. As pessoas que conheceram a discoteca Apolo há vinte anos poderám entendê-lo.
Mas nós, os meus colegas e eu, a verdade é que muito muito nom gostavamos da discotecas. Passavamos as tardes das sextas e os sábados entre os bares das galerias da zona nova de Compostela (rua Alferes Provisional e Rua Nova de Abaixo), tomando cervejas. E cantando polas ruas, claro.
Ainda seria o seguinte ano quando trasladamos as nossas vidas, as nossas cervejas e as nossas melodias nocturnas para a zona velha.
Mas a Última Dança de Guerra bailamo-la, cantamo-la, berramo-la, nas galerias.

[youtube]SW2Aut-107c[/youtube]

E tu? Onde estavas aquel dia?