29-05-2009

  19:25:10, por Lugris   , 438 palavras  
Categorias: Cousas por aí, Cousas por cá, Gz é bem pequena

Eleiçons e intranscendências.

Há um par de semanas, lim o resultado dumha enquisa num diário que dizia que dous de cada três subditos (à força) do Reino de Espanha nom sabia quê dia eram as eleiçons ao Parlamento Europeu.

Pensei que tal vez o resultado fose um bocadinho exagerado. Mas depois, com o passo dos dias, decatei-me de que nom. A verdade é que pouca gente sabe quando som a eleiçons, e a campanha eleitoral passa por diante de nós com escasso sucesso. Isso fai prever que a participaçom nesse dia nom vai ser muito elevada. Mas aos grandes partidos, aos tertulianos, aos colunistas da imprensa séria nom lhes importa isso. Melhor, pensam. O Parlamento Europeu está considerado como um retiro dourado, umhas férias, ou umha saida digna para aqueles e aquelas que já nom tenhem lugar nas outras instituiçons: cobrar muito, muito, trabalhar pouco, pouco, e nunca, nunca ter que rendir sobre o trabalho feito ou deixado de fazer.

Hoje no trabalho derom-nos os horários para o próximo mês (nom foi sem tempo). A novidade é que começamos a trabalhar nas fins de semana, cousa que o grupo no que estou inserido nom vinha fazendo desde que começou a funcionar (há um mes e meio, mais ou menos). Tocou-me trabalhar a fim de semana das eleiçons. Tivem que avisar entom de que o dia 7 nom poderia acudir ao trabalho, porque som membro dumha Mesa Eleitoral no concelho onde resido: som Presidente Suplente, e tenho a obriga, que cumprirei por imperativo legal, de me apresentar para realizar a constituiçom da Mesa. Aguardo, isso sim, que se apresente o Presidente Titular, e nom ter que fazer parte efectiva da Mesa. E quando comuniquei este facto, nom forom poucas as pessoas que me perguntarom quê dia eram as eleiçons. E ainda algumha me perguntou que quais eleiçons eram as que se celebravam esse dia.

E é que a gente bem sabe que é em Europa onde se tomam umha grande parte das decissons que nos afectam na vida diária; mas também sabe que nom é o Parlamento Europeu (que já padece grandes défices de democracia) a entidade na que realmente se decide: é noutras entidades, algumhas delas bem opacas.
(E quando digo "decissons que nos afectam na vida diária", estou a empregar a quarta definiçom que o e-Estraviz dá ao termo "afectar": (4) Produzir doença, causar padecimento...

De todas as formas já sabem: a escolha é sua. O 7 de Junho, se vas ir votar, quando menos emprega a tua papeleta para dar-lhes umha boa pancada nos fuzinhos.

Sem comentários ainda