Já rematou mais umha Festa da Língua na nossa cidade, e foi com grande sucesso.

Continua:

As actividades começarom na tardinha do dezasseis, com umha palestra sobre o galego com Domingos Antom Garcia Fernandes e Maurício Castro. Perto de duas horas nas que se analisarom muitos e variados temas relacionados com o conflito lingüístico que padecemos na Galiza. Aproveitamos também para a apresentaçom do Manual Galego de Lígua e Estilo, do que temos que anunciar com enorme satisfaçom, que esgotamos todos os exemplares que tinha o centro social para a sua venda.

Já no dezassete o tempo ameaçava com molhar a festa, mas ao final nom houvo queixa, tam só umha pequena enxurrada fixo que as crianças e maiores que desfrutavam da actuaçom de Miro Magarinhos, tivéramos que resguardar-nos sob os arcos da Casa da Lus durante meia hora. Depóis voltámos ocupar a praça da Verdura como vem sendo tradicional nos últimos treze anos.
A praça foi tomando forma desde bem cedo...bandeiras da pátria, faixas, posto de material com um espaço adicado a campanha Carvalho Calero' 09, mais dum cento de livros para a actividade de Livros Viageiros, etc.

Perto do meio-dia um grupo de associad@s junto com o grupo de música tradicional Estraperlo, percorrérom as ruas da zona velha repartindo centos de programas da festa e do manifesto que editamos para o Dia das Letras.

À volta do mesmo, o actor e contacontos Miro Magarinhos entretivo a cativ@s e nom tam cativ@s com umha das suas trepidantes histórias.

Repartirom-se dúzias de livros entre a gente presente, e achegando-nos a hora do jantar, tivemos duas actuaçons musicais: o hipe-hope de Boel e Odín, da comarca de Ponte Caldelas, e o heavy dos From Hell de Ponte Vedra.

As 14:30 deu começo o jantar que juntou a volta das 60 pessoas, e como vem sendo habitual, rematou bem entrada a tarde, com poesia ao vivo e música de gaita.

Este ano a programaçom da Festa da Língua contava com mais actividades. Às 20 da tarde tivo lugar um genial leilom de grande qualidade polos objectos ofertados. Umha das pujas mais concorridas foi a que envolveu a três exemplares da revista Teima do ano 1977, as quais rematárom bem repartidas entre as pessoas associadas. Intrumentos musicais, cámaras digitais, equipas de campismo, quebra-cabeças, etc figerom-nos passar umha divertida tardinha.

Perto já da meia noite o grupo compostelá SOM DO GALPOM, animou e fixo desfrutar às muitas pessoas que lotavam o local social. Com a sua original proposta de funky-reaggee-rap, pugérom umha estupenda chave final à jornada.

E isto foi todo por este ano, mas nom gostariamos de despedir-nos sem amossar o nosso agradecimento a todas aquelas pessoas que colaborarom, dum jeito ou outro, com a Revira para fazer possível mais um ano a celebraçom desta importante data. Até o vindouro!