Na noite da passada sexta-feira fum tomar qualquer cousa ao Maria Castanha. Entre as publicaçons que havia no bem sortido revisteiro do famoso cenáculo compostelano encontrei, recém saído a lume, o último número (Nº 113, Outubro de 2006) da Revista Mensal de Informaçom para o Debate Tempos Novos.

Como cada dous números/meses, neste número/mês a ilustraçom dos Dias Soltos do Bieito Iglesias é minha.

De maneira bastante livre, digamos, a minha ilustraçom (pág. 81) fai referência aos seguintes dous dias bieito-eclesiásticos:

Setembro 12
DOSES
O pulso da cidade latexa en Marqués de Larios. Nas marxes deste paseo concéntranse restaurantes caros (por algo as orixes de Málaga se remontan aos fenicios) e de vulgarísimo paladar. As postas ou doses son raquíticas e a ementa tópica: gaspacho, peixe fritido, raxo de porco...Somente na rúa de Chinitas puden remoer un peixe espada saboroso precedido, por desgraza, desa auga-chirla con uvas pasas que chaman allo-branco. Pola noite fruín unha sesión de xazz na terraza dun hotel e fun aloumiñado polo doce clima local. Unha verdadeira beizón pró oído, despois de aturar músicos rueiros de monótona banda sonora: 'Moliendo café' e 'O sole mio', non os quites de aí.

Setembro 24
PANORAMA
O furacán 'Gordon' trouxo tras de si un corroverás de torbós. En frente, nas Hortas que contemplo desde a miña xanela, os bancos dunha 'instalación artística' pagada con diñeiro público din tristísimos sen ninguén que sente neles e ensopados de chuvia. A 'artista' disque quería crear un espazo de discusión sobre os usos ...da Cidade da Cultura! Unhos operarios instaláronos no verao (pra morreren coa raxeira!), e inmediatamente vimos como os escanos eran ocupados por mozotes chimpavasos amigos do 'botellón'. Admitindo, coas tendencias posmodernas, que arte é todo canto se declara como tal, agradezo artisticidade tanta ao pé da porta. Nun deses botellós, certo rapeiro logrou rimar 'rodilla' con 'Sevilla'.