A pequena peça de vídeo-criaçom que apresentamos hoje parte dumha ideia que, segundo consta na minha caderneta, me ocorreu no domingo 11 de abril do ano passado quando regressava, de carro, da Ilha de Arouça, trazendo comigo o meu amigo José Ramom Pichel.

Mas nom seria até um ano depois quando, no passado 23 de abril, sábado, nalgum lugar indefinido da estrada entre o Porto e Avintes (Portugal), gravei o vídeo que precisava para a sua realizaçom.

Esse vídeo editei-no, por fim, na passada sexta-feira, 10 de junho, Dia de Portugal, de Camões e das Comunidades Portuguesas, terminando às oito em ponto da tarde (hora espanhola).

Obrigado ao meu tocaio Suso Irago e a sua filha Catuxa por dar-me a conhecer a bonita cançom que serve de banda/trilha sonora original a esta minha pecinha e por porem-ma indefetivelmente sempre que vou polo Avante.

Ainda que suponho que nom o farám por mim (por mim, de fato, dispensavam de pôr música espanhola ), se nom tivesse sido por eles e pola sua maçadora insistência no tema (España huele a culo, Fat Fish), provavelmente nunca me teria ocorrido esta ridi-culista piada.

A diferença dos dous vídeos enviados a concurso nas duas edições anteriores o vídeo que neste ano enviei a Umha Imagem Para O Galego foi concebido e realizado para a ocasiom.

Nas duas edições anteriores o concurso de Vieiros servira-me de pretexto para a realizaçom de duas velhas ideias (Perigo Zona Escolar e The Invisible Man) que doutro jeito teria realizado ou nom.

Mas neste ano nom. Neste ano o processo criativo foi diferente. Como já digem, neste ano o vídeo nom foi apenas “realizado para” senom que a ideia, o roteiro, foi também “concebido para” o certame.

Making Of

O momento e o lugar da concepçom do mesmo fica muito claro na minha mente (e na minha caderneta): Praia das Sinas (Conc. Vila Nova d'Arouça), sábado 20 de junho de 2009, entre 19 e 19h30 (GMT+2).

Há dous fins-de-semana fum fazer umha visita ao meu querido amigo Eugénio Outeiro a Vila Garcia. Mas em vez de ir direto para a sua morada passei antes pola Praia das Sinas, no vizinho concelho de Vila Nova d'Arouça, para dar um mergulho (o Eugeniote dixo que tinha trabalho na casa e que nom vinha). Após umha hora de carro desde Compostela e um relaxante mergulho no Mar d'Arouça, deitei-me na toalha e, enquanto me secava ao Sol, pugem-me a dar-lhe voltas ao assunto. Assim foi como me chegou a inspiraçom. Bom, nesta ocasiom seria melhor dizer que fum eu quem foi à sua procura.

Umha vez que tínhamos a ideia agora só restava pôr-se maos à obra na sua realizaçom.

Cinco dias depois de ter a ideia, na quinta-feira 25 de junho, e desde o Café-Bar Devagar (WiFi), baixei do YouTube o vídeo da demoliçom dum modernista Café Español que polos vistos havia na valenciana vila de Aiora e do Google imagens as fotografias de diferentes Cafés Espanhois que polo mundo adiante há.

No dia a seguir (sexta-feira 26 de junho), após o almoço na esplanada da cafetaria do Burgo das Nações e com a inestimável ajuda do Heitor (que me emprestou a sua câmara, melhor do que a minha) e do José Ramom (a mão que mexe a colher), gravei o segundo plano que aparece no vídeo (1/2). Editei o vídeo ao serao (primeira ediçom).

Na noite do domingo 28 figem algumhas mudanças no vídeo (mudei o primeiro plano que aparecia no vídeo, um zoom sobre esta foto fixa que nom me convencia, e o barulho de fundo também) e (por volta das 00h30-45, GMT+2, da segunda-feira 29) dei-no por terminado.

Há hoje umha semana, na segunda-feira 29 de junho (penúltimo dia em que era possível fazê-lo antes da prorrogaçom) enviei o meu vídeo para o concurso Umha Imagem Para O Galego de Vieiros.com. Acompanhei-no da seguinte descriçom:

"Como torrom (ou pacote) de açúcar num café com leite -¿con leche?- a doce e melodiosa fala galega vai-se dissolvendo a pouco a pouco no espanhol".

Ao que parece "problemas ténicos" estám a impedir a sua visualizaçom. Esperemos que as/os amigas/os de Vieiros encontrem logo umha soluçom.

Atualizado QUA, 08-JUL-09, 13h15 (GMT+2). Os "problemas ténicos" aos que fazíamos referência estám felizmente solucionados ao menos desde anteontem (segunda-feira, 6 de julho) à noite.

Atualizado QUA, 15-JUL-09, 19h55 (GMT+2). Esquecim dizê-lo mas, feliz ou infelizmente, na Galiza nom existe já nengum Café Español. De existir ainda lá teria ido eu câmara em riste gravar uns planos e fazer umhas fotografias em vez de baixá-l@s da internet. Nom existe nengum na atualidade mas em tempos sim que existiu. Segundo podemos ler na Galipédia (no verbete dedicado ao pintor Carlos Maside, concretamente) em tempos da II República Espanhola houvo em Santiago de Compostela um movimentado Café Español (nom sei se tanto quanto o Café Español de México D.F. que aparece no conto de Max Aub (podedes escolher: livro ou filme?), mas bom):

En 1932, na vida intelectual compostelana, conviven dúas tertulias , a do “café Derby” e a do “Español”. Na primeira xúntanse os galeguistas, profesionais de procedencia universitaria, a esta cita acude D. Ramón del Valle Inclán nas súas estadias temporais en Santiago, e ten acollida Carlos Maside que disfruta da amistade de varios contertulios e do escritor, de quen realiza varios apuntes e retratos do natural. A outra tertulia, a do “café Español”, caracterízase polo interese artístico e literario. Está formada por artesáns, empregados, estudiantes e artistas. Moitos son republicanos e de pensamento filomarxista. No eido da plástica Maside exerce unha especial influencia, e Luis Seoane destaca como futura promesa. No “Español” xéstase a constitución dun grupo local do Comité Cooperación Intelectual. Convídase a varios poetas para pronunciar conferencias. Un dos escritores invitados é García Lorca.

Estes som os vídeos que enviei ao concurso Umha Imagem Para O Galego nas suas duas anteriores edições:

Apresentamos hoje um pequeno vídeo que começou a gestar-se há quase um ano.

Segundo consta na caderneta em que anoto as paridas (nem todas) que me vam ocorrendo, a primeira ideia para este vídeo ocorreu-me em 21 de julho de 2008, segunda-feira, enquanto passava pola Rua de Sam Roque:

-“Rua Sam Roque, pode passar” (dixo o semáforo)
- Como que “pode passar”?!? Tampouco está tam mal! (pensei eu)

Neste passado 17 de Maio, domingo, indo pola Rua da Porta da Pena de regresso à casa depois de passar a tarde inteira cuns amigos tentando tirar (a base de polvo à feira, churrasco, vinho com gasosa, licor café, 3 gin tônicos, 1 vinho de Aragom e várias cervejas) o mau sabor de boca que me tinha deixado a manifestaçom reintegracionista da manhã, olhei para a pétrea placa da rua e digem em voz alta:

“Rua da Porta, dá pena” [gargalhadas].

Liguei esta parida com aqueloutra que me tinha ocorrido dez meses antes e decidim fazer com as duas um pequeno vídeo que levaria ao início a seguinte questom:

“Porque a sinalética urbana compostelana, em vez de limitar-se a informar @ viandante sobre o objeto assinalado, se dedica a emitir sobre este juízos de valor?”

Anteontem, segunda-feira 29 de junho, por volta das 20h30 (GMT+2), gravei o vídeo na Rua da Porta da Pena. Comochoconto, da Rádio Kalimera, que por acaso naquela hora passava por alí, está de testemunha.

Ontem, terça-feira 30 de junho, por volta das 11h15 (GMT+2), gravei o vídeo na Rua de Sam Roque e vim para a casa editar. Quando às duas da tarde (GMT+2) terminei de editar o vídeo, cheguei-me a Sam Caetano para dar o meu apoio aos Companheiros do Metal.

Et voilà!

Ontem, 21 de Julho de 2008, segunda-feira, tivem o privilégio de assistir o concerto que o Caetano Veloso, com a única companhia do seu violão, deu na Quintana dos Mortos, emblemática praça da capital da Galiza.

Para mim era já a quarta ocasiom em que podia desfrutar em direto da arte do meu admirado Caetano (e a terceira em que podia fazê-lo na minha terra, a Galiza, e na companhia da minha Teresa).

Leia mais »

Aproximadamente nove meses e meio após O Grande Salto, continuo com a pubicaçom em Angueira de Suso dos exercícios de animaçom tradicional que, em 1996 e enquanto estudante Erasmus, realizei no Technological Educational Institute of Athens (T.E.I.-Athens). Na Grécia, sim. Mas Sempre em Galiza!!!

Após A Metamorfose (27-MAR-07), Galician Man Walking (02-MAI-07), Galego Corredor (15-JUN-07) e O Grande Salto (24-SET-07), hoje toca-lhe a vez à Caminhada em Perspectiva.

Este exercício de caminhada em perspectiva foi feito ao final da minha estada enquanto estudante Erasmus no país heleno. Nom podo precisar em que dias do mês de Junho exatamente (porque nom o tenho anotado no meu diário) mas, como podedes imaginar, foi em vários.

2ª ediçom, 12 anos depois

Como já contei aqui nas quatro anteriores ocasiões, a fita VHS em que trouxera gravados os trabalhos de animaçom tradicional realizados durante a minha estada na Grécia sumiu misteriosamente poucos anos depois do meu regresso. A versom da caminhada em perspectiva que publicamos hoje é, portanto, umha reediçom digital feita a partir dos desenhos originais que, felizmente, ainda conservo.

Os cinquenta e quatro desenhos diferentes que, se reparades bem, podedes ver neste exercício (54!!!) tinha-os escaneados já desde Novembro do ano passado (escaneei-nos em três sessões: domingo 18, segunda-feira 19 e terça-feira 27 de Novembro de 2007), mas nom foi até esta semana que me animei a reanimá-los digitalmente.

Figem-no na passada segunda-feira (7 de Julho, São Firmino) estando em Bueu e empregando Adobe Photoshop e Adobe Premiere Pro para fazê-lo.

Deixei pendentes apenas o título (Caminhada em Perspectiva / Walk in Perspective) e a banda ou trilha sonora (Foliada da Montanha, primeira faixa de Aires d'a Terra, O Primeiro Disco Galego), cousas ambas as duas que lhe coloquei ontem à noite (quarta-feira, 9 de Julho de 2008) aqui em Compostela.

Hoje (quinta-feira, 10 de Julho) subim-na ao YouTube... et voilá!

Em 30 de Janeiro do ano passado, coincidindo com o 121º aniversário do nascimento em Rianxo de A.R. Castelao, publicávamos aqui, em Angueira de Suso, um post intitulado The Invisible Man.

Nele contava-se a pequena intra-história dumha cousa (cartoon? charge? ilustraçom?) que lá polo ano de 1993(?) eu figera acrescentando o rótulo "The Invisible Man" a umha das mais famosas auto-caricaturas desenhadas por Castelao (esta).

Um ano, cinco meses e dous dias após a publicaçom daquele post publicamos estoutro post intitulado... tacham, tacham...

The Invisible Man (O Vídeo)

Nom podo precisar com exactidom quando foi que me ocorreu a ideia de fazer umha versom animada, em imagem real, do meu Castelao, The Invisible Man (inspirada, obviamente, na famosa cena do homónimo filme de James Whale). Procurei umha anotaçom nas velhas cadernetas que por cá tenho mas nom tivem nengum sucesso. O que sim sei é que a ideia me ocorreu há já vááários anos.

Seja como for, o caso é que nom foi até este passado sábado, 28 de Junho (por acaso Dia do Orgulho LGBT, jornada ludo-reivindicativa que visa a visibilizaçom de Lésbicas, Gays, Bissexuais e Transgéneros), que a minha ideia desceu do mundo das idens e virou umha realidade.

Com a imprescindível ajuda da Teresa e do Breixo no sábado, após o almoço, gravei na sala-cozinha da minha morada o vídeo The Invisible Man. Estivem editando a tarde inteira e à meia-noite (UTC+2) enviei-no ao concurso Umha Imagem Para O Galego de Vieiros.com.

Na manhã da segunda-feira, 30 de Junho, anteontem, o meu vídeo aparecia publicado em destaque na capa de Vieiros. Cum link à seguinte notícia:

CONCURSO EN REDE
CASTELAO, THE INVISIBLE MAN
Suso Sanmartín proponnos este vídeo para 'Unha imaxe para o galego'.
Redacción - 12:30 30/06/2008

O concurso 'Unha imaxe para o galego' está que arde. Xa temos 88 fotografías e nove vídeos. Un dos últimos que nos chegou é este de Suso Sanmartín coa seguinte lenda: “Desenhei Sempre Em Galego, escrevim Sempre Em Galego, e se tirades o que há de galego e de humano na minha obra, nom ficaria nada dela”.

Xa sabedes que ampliamos o prazo até este venres, cando pecharemos definitivamente o concurso. A vindeira semana reunirase o xurado para escoller as mellores fotos e vídeos.

Como diria o outro: Alea jacta est!

Agradecimentos

Muitíssimo obrigado a Teresa Díaz (camerawoman), Breixo Tomé Díaz (Best boy) e Pepe Penabade (vestuário). Sem a sua inestimável ajuda a realizaçom deste vídeo Made in Feito na Casa (na cozinha, concretamente) nom teria sido possível.

Três meses (umha semana e dous dias) depois, continuo com a publicaçom dos exercícios de animaçom tradicional que em 1996, sendo estudante Erasmus, realizei no Technological Educational Institute of Athens (T.E.I.-Athens).

Após A Metamorfose (27-MAR-07), Galician Man Walking (02-MAI-07) e Galego Corredor (15-JUN-07) hoje toca-lhe a vez aO Grande Salto.

Como já contei aqui nas três anteriores ocasiões, a fita VHS em que trouxera gravados os trabalhos de animaçom tradicional realizados durante a minha estada na Grécia sumiu misteriosamente poucos anos depois do meu regresso.

A versom d'O Grande Salto que publicamos hoje é, portanto, umha reediçom digital feita a partir dos desenhos originais que, felizmente, ainda conservo.

Os dezasseis desenhos diferentes que podedes ver, se reparades bem, n'O Grande Salto tinha-os escaneados já desde 29 de Abril (naquela maçadora sessom de escaneado escaneara também os oito desenhos do ciclo de corrida).

Mas nom foi até a semana passada (segunda-feira 17 e terça-feira, 18 de Setembro de 2007) que reeditei digitalmente O Grande Salto empregando Adobe Photoshop e Adobe Premiere Pro.

E na manhã da quarta-feira, 19 de Setembro, subim O Grande Salto ao YouTube.

Há onze anos

Nom encontrei no meu diário de 1996 demasiadas anotações sobre a realização deste exercício em concreto (vê-se que contra o final da minha estada no país heleno fum menos auto-disciplinado na hora de reflectir no meu diário o meu quotidiano).

Sei que na sexta-feira 17 de Maio (Dia das Letras Galegas e Dia Nacional da Noruega também) estivem a trabalhar nele e que daí a duas semanas, na sexta-feira 31, "gravei as provas do salto" assim que Yoannis (colega cretense da turma de Animation I) terminou de gravar o seu.

Super-Eu

Igual que em Galician Man Walking e Galego Corredor o protagonista d'O Grande Salto sou eu, aliás, a minha auto-caricatura. Mas a diferença dos dous exercícios anteriores nom vou vestido de galego senom disfarçado de super-herói (Chana, amiga asturiana e Erasmus como eu, dixo de mim em certa ocasiom: "Susiño es supergallego")

Sob os efeitos super-vitaminantes e mineralizantes do ouzo (leia-se "uso", com esse sonoro, e nom "ouço", que esse esse, apesar do que diga, é surdo) o super-galego Super-Suso (super-eu) dá, dou O Grande Salto.

“(...) As palabras tamén poden ter forma (...) de imaxes en movemento. Hai un ano, Vieiros celebraba o Día das Letras dun xeito diferente (...) Nesta ocasión, o certame dá unha reviravolta e tamén se abre a vídeos (...) Como exemplo, para que sirva de guía, amosamos (...) un curioso vídeo que chama a participar no Albaroque pola lingua.”

http://www.vieiros.com/nova/59180/xa-existe-o-flickr-gal

No concurso que (sob o rótulo de Umha Imagem Para O Galego) Vieiros convocou este ano pola Temporada das Letras havia duas categorias: umha categoria de “fotografia” (igual que em O Galego No Espelho, título da ediçom do ano passado) e mais umha nova categoria de “vídeo”.

Leia mais »

Continuo com a publicaçom dos exercícios de animaçom tradicional que em 1996, sendo estudante Erasmus, realicei no Technological Educational Institute of Athens (T.E.I.-Athens).

Após A Metamorfose e Galician Man Walking hoje toca-lhe a vez ao terceiro exercício de animaçom daquela realizado, um simples ciclo de corrida (run-cycle) que, se bem até ante-ontem nom levava título, foi intitulado Galego Corredor para a ocasiom.

Segundo consta no meu diário de 1996, rematei-no na sexta-feira 3 de Maio (ficava pendente apenas o floco da faixa do traje nacional) e com a inestimável ajuda da professora associada Afrodite procedim à sua gravaçom.

Visto que a primeira ediçom analógica se encontra em paradoiro desconhecido, a que publicamos hoje é umha segunda ediçom digital realizada ante-ontem (QUA, 13-JUN-07) empregando Adobe Photoshop e Adobe Premiere Pro. Os oito desenhos originais tinha-os escaneados já desde o passado 29 de Abril.

Um mês e cinco dias depois da publicaçom d’A Metamorfose, primeiro exercício de animaçom tradicional realizado em 1996 enquanto aluno Erasmus da Technological Educational Institute of Athens (T.E.I.-Athens), publico em Angueira de Suso o segundo exercício realizado naqueles tempos e naquele espaço.

Trata-se dum simples ciclo de caminhada que, parodiando o título de certo filme na altura em cartaz, intitulei Galician Man Walking*.

Making Off

Segundo escrevim no meu diário de 1996, na sexta-feira 29 de Março, assistim no T.E.I.-Athens à liçom teórica que, sobre a caminhada e com traduçom simultânea para o inglês, deu a minha professora de Animaçom, Heleni.

À tarde, na livraria Papasotiriu comprei, por 7.400 Dracmas, The Animator’s Workbook (em pesetas saia exactamente a metade de preço, 3.700).

No dia a seguir, sábado, 30 de Março, estivem a ler, dicionário bilingue em mao, o capítulo do The Animator’s Workbook dedicado aos andares.

Entre o domingo, 31 de Março, e a segunda-feira, 1º de Abril, figem a lápis os dezasseis desenhos necessários para completar o ciclo de caminhada. Trabalhei ambos os dous dias até altas horas da madrugada (03h30 e 05h30 respectivamente).

Na segunda-feira, 22 de Abril, com a imprescindível ajuda da professora associada Afrodite, gravei Galician Man Walking (e mais a primeira parte d’A Metamorfose, que terminaria de gravar na segunda-feira seguinte, 29 de Abril).

Na sexta-feira, 26 de Abril, voltei a gravar a limpo o ciclo de caminhada (“master piece”, segundo o amável mas sem dúvida exagerado comentário da Afrodite).

Remake

Como já contei aqui, a fita VHS na trouxera gravados este e o resto dos trabalhos de animaçom tradicional realizados na Grécia enquanto estudante Erasmus, sumiu misteriosamente poucos anos depois do meu regresso.

A versom de Galician Man Walking que publicamos hoje é, portanto, umha reediçom digital feita a partir dos desenhos originais que, felizmente, ainda conservo.

Escaneei-nos na segunda, 26, e na terça-feira, 27 de Março de 2007, enquanto escuitava na Rádio Galega A Boca da Noite.

Trás-anteontem (domingo, 29 de Abril) re-animei-nos combinando Adobe Photoshop e Adobe Premiere Pro e ante-ontem (segunda-feira, 30 de Abril) dei-lhe ao Galician Man Walking os últimos retoques antes de subí-lo ao You Tube.

* Na quarta-feira, 24 de Abril de 1996, fum ao cinema com a Victória, a minha nova colega norueguesa no cêntrico andar (Ipokratous 71) ao que me mudei em 20 de Abril, ao meu regresso das férias da Páscoa pola Turquia. A Victória queria ir ver Dead Man Walking mas por mim (a mim nom me apetecia demasiado) sacrificou o Walking e, em versom original com legendas em grego, fomos ver Dead Man.