Didática

Como se lê um texto reintegrado (AGAL)?

Um texto escrito em reintegrado é um texto escrito em galego; portanto, em termos gerais, nom precisamos dum novo código de leitura. Existem, no entanto, umha série de grafias às quais devemos prestar atençom:

Ortografia Ortografia
galego-portuguesa galego-castelhana Exemplo
nh ñ caminho → camiño
lh ll orelha → orella
ç z força → forza
-m -n nom → non
mh nh umha → unha
ss s possível → posíbel
j x janeiro → xaneiro
ge,gi xe,xi geral → xeral
  • Para além do acento agudo (') existe o acento grave (`) que só se usa na contracçom à (a+a) e o circunflexo (^), que segue as mesmas regras de colocaçom que o primeiro, mas que indica que a vogal é fechada:
    • pé (extremidade) vs pê (nome da letra)
    • pó (partículas) vs pô-lo (de pôr)

Tabela de pronunciaçom completa

Como se lê um texto escrito em padrom lusitano?

Para além de aplicarmos as pautas de leitura estabelecidas na pergunta “como se lê um texto reintegrado (AGAL)?, devemos acrescentar mais algum pormenor relacionado fundamentalmente com as terminaçons “-ão”, “-ões” e “-ães”. Estas terminaçons podem ser lidas sem alterar a nossa fala habitual:

  • como “-om” e “-ons” ou “-ois” no caso de canção/canções;
  • como “-ám”, “-áns” ou “-ais” no caso de capitão/capitães.

A respeito da morfologia verbal, nalguns casos mui diferente da maioritariamente utilizada na Galiza, nom existe um único critério de leitura, havendo pessoas que as adaptam e pessoas que nom (“fez-fijo”, “disse-dixo”…).

Para saber mais

Como se fala "reintegrado"?

O reintegrado nom se fala. Escreve-se. Porém, é verdade que popularmente se ouve às vezes “que alguém fala reintegrado”. A razom é que, em geral, as pessoas reintegracionistas costumam cuidar mais o seu galego, evitando castelhanismos e mesmo usando palavras ou estruturas que, sendo galegas, nom tenhem nos dias de hoje umha grande circulaçom ao nível coloquial:

  1. Infinitivo flexionado: Era bom irmos.
  2. Futuro do conjuntivo: Se tu fores, avisa-me.
  3. Léxico cuidado: autoestrada, espaço, pescada.

Ainda, muitas pessoas reintegracionistas para substituir castelhanismos de recente introduçom na Galiza apoiam-se no português, como nos casos de cartaz1), bolacha2) ou lareira3). Porém, o traço mais caraterístico do 'falar reintegrado' é, sem dúvida, a terminaçom -çom, que nos últimos dous séculos foi substituída massivamente das falas por -ción, e muitos reintegracionistas esforçam-se em restaurá-la. Nom obstante, também há muitas pessoas lusistas que preferem falar igual que sempre, e nom por isso se pode dizer que 'nom falem reintegrado'.

Como se aprende?

A resposta é evidente: usando-o.

Para muitas pessoas, um dos principais motivos para nom avançar para o reintegracionismo é o primeiro impacto. E a verdade é que dá um pouco de medo ver todos esses símbolos novos aplicados ao que sempre escrevemos de outra maneira.


Porém, é muito mais fácil do que se pensa, porque simplesmente chega com aplicar umhas novas regras ortográficas, bastante fáceis de sistematizar, ao nosso galego de sempre, e já estamos a escrever em reintegrado. Para isso, temos muitíssimos materiais de apoio, sobretudo na Internet, desde dicionários e prontuários galegos e portugueses (conforme se se preferir escrever em AGAL ou em padrom lusitano) a guias didáticos mais simples para as pessoas poderem usar o essencial deste modelo da escrita.


Vinheta de Suso Sanmartin tirada do Pasquim, suplemento de Humor do Novas de Galiza

Do nosso ponto de vista, de facto, o importante é isto último: basta as pessoas saberem usar o nh, o lh, o -m final, o g/j/x, o s/ss, o b/v e os acentos, para estarem a empregar um maravilhoso galego. O que a partir daí as pessoas quigerem avançar, à medida que forem entrando em contacto com outros textos, bem-vindo seja.

Os diferentes plurais de -ám -ao e -om

As formas singulares das palavras que nas falas galegas acabam em -ám (cam), -ao/-am (irmao/irmám), e -om (coraçom) tenhem diferentes plurais segundo a zona da Galiza. Na ocidental conservam a nasalidade (cans, irmáns, coraçons) perdida na central (cás, irmaos, coraçôs). Na oriental, apesar de terem perdido a nasalidade em quase todas as comarcas, mantém-se a pronúncia mais conservadora: caes [ájs], irmaos [áws] e coraçoes [ójs]. A atual representaçom escrita destas terminaçons coincide com a medieval galego-portuguesa, isto é, com as formas orientais nasalizadas (cães, irmãos, corações).

Em galego reintegrado, há quem prefira usar as terminaçons ocidentais (por serem as mais usadas no galego literário e institucionalizado actual) e quem prefira usar as comuns com Portugal e Brasil, mais conformes às orientais galegas.

1) cast. cartel
2) cast. galleta
3) cast. chimenea
QR Code
QR Code pt_agal:didatica (generated for current page)