O colectivo, situado na órbita do PP para fazer frente a qualquer avanço para o galego no ensino, tinha convocado umha concentraçom no Obelisco da Corunha para as 20 horas de ontem

PGL – Havia dias que a chamada ‘Mesa contra la imposición lingüística’ convocara umha concentraçom no centro da Corunha, dentro da campanha que o colectivo vem desenvolvendo contra o aumento das horas lectivas que a legislaçom prevê para o ensino em galego.
[+...]

Os telemóveis e a Internet figérom circular pola Corunha nos últimos dias umha auto-convocatória contra a concentraçom do colectivo antigalego, que finalmente juntou meia centena de pessoas, incluindo conhecidos militantes da direita e a extrema-direita local corunhesa. A faixa que seguravam dizia ‘Por la libertad lingüística. No a la imposición’, junto a um grande laço com as cores da bandeira de Espanha.

Em frente, por volta das 150 pessoas concentrárom-se atrás de umha faixa mais pequena, feita à mao, com a histórica legenda ‘Na Galiza em galego’, escrita com ortografia reintegrada. A média de idade da concentraçom em defesa do idioma foi bem mais baixa, contando com a presença de numerosas pessoas novas que dérom à concentraçom normalizadora um ambiente festivo.

‘Carga policial injustificada’ e distorsom mediática

Mas, logo aos 10 minutos de começada, a concentraçom mais numerosa foi atacada polos polícias interpostos entre os dous grupos. Várias pessoas sofrêrom contussons e narrárom o acontecido como ‘brutal e injustificada carga’, enquanto o grupo defensor do espanhol aplaudia e dava gritos de ‘libertad’ e ‘democracia’.

Depois da violenta irrupçom policial, reagrupou-se a concentraçom pró-galego, e um grupo de pessoas deu em dançar ao som das gaitas e as pandeiretas, e perante a incredulidade policial.

Umha hora depois de começadas as concentraçons, os da ‘Mesa’ abandonárom o lugar e só entom se deu por finalizado o acto em defesa dos direitos lingüísticos galegos.

Os primeiros meios electrónicos a informar dos factos distorcêrom gravemente o acontecido, quadriplicando a participaçom na convocatória da ‘Mesa contra la imposición lingüística’ e reduzindo quase em 50% a dos corunheses e corunhesas favoráveis a umha ‘Galiza em Galego’.

Instantánea do pessoal autoconvado em favor do galego

---