Como já adiantáramos, umha delegaçom galega estivo presente na Universidade Euromediterrânea das Homossexualidades, um espaço que desde o ano 1979 reúne activistas e LGBTs de toda a Europa e os países do Mediterrâneo.
Reivindicaçom, convívio, divertimento, formaçom, ... Tudo concentrado numha semana em que a diversidade e a liberdade som bandeiras. Centos de participantes encontraram-se num espaço autogerido que tivo como sede central a Faculdade de Belas Artes da Université de la Méditerranée.

No campus de Luminy num espaço natural protegido, lésbicas, gays, bissexuais, trans, queers e intersexo expressaram-se durante umha semana livremente num ambiente despojado de homofobia, de preconceito.

Além das actividades diárias (workshops, exposiçons, conferências, etc) que se desenvolvêrom no espaço da Faculdade de Belas Artes, no Sábado a UEHH transferiu-se à cidade para um colóquio público no Conseil Régional de Provence-Alpes-Côte d'Azur, em que uns centos de pessoas debateram temas candentes da comunidade LGBTQI. A sede do conselho regional da Provença foi ainda o lugar escolhido para desenvolver umha original e emotiva homenagem a quem nos deixou no caminho.

Especial protagonismo este ano para os intersexo, reivindicando a sua letra no acrónimo LGBTQI e a sua visibilidade.

O porto de Marselha albergou ainda umha concorrida concentraçom em protesto polas horríveis execuçons de gays no Irám das últimas semanas.

As noites em Luminy transformavam-se em festa da diversidade, da liberdade sexual: destacamos a iniciativa da Play Party, um espaço de expressom corporal, de prazeres e afectos sem tabus.

Ou a transgressom dos padrons de género por meio da variada e provocadora roupa que os assistentes podiam vestir à vontade nas festas nocturnas.

A noite árabe foi especial polo encontro de colectivos palestinianos e libaneses a quem o Estado de Israel lhes nega o acesso aos respectivos países.

Umha primeira tomada de contacto para os colectivos da Galiza, enriquecedora em todos os sentidos e que abre a porta a umha futura participaçom mais activa.

Avante a UEEH!