O Centro Social Gomes Gaioso foi cenário na noite do dia 25 de Outubro do “Furacám de Solidariedade” com Cuba, que tivo umha resposta massiva por parte de sóci@s, amig@s do Centro e vizinh@s do bairro.

Continua:

Os actos programados para este acto festivo e multidisciplinar sofrerom certo retardo no começo por coincidirem com o recebemento de Carlos Cela Seoane, no bairro das Conchinhas. Este evento solidário com o povo cubano fora programado muito antes de sabermos que a fiança do Carlos Cela fora paga e que sairia em liberdade.

Sobre as nove e um quarto da noite, Moncho Leal, da Associaçom de Amizade galego-cubana Francisco Villaamil abria fogo com umha conversa sobre a Cuba da actualidade, os seus logros, os seus reptos, os seus problemas. A seguir, num recital poético que contou com a presença de Alberte Momán Noval e Xavier Vásquez Freire, soarom versos de poetas cuban@s contemporáne@s como Rafael Alcides Pérez ou Damaris Calderón, intercalados com textos do pai da pátria cubana, José Martí e do genial poeta galego Curros Enríquez.

A noite continuou com a parte musical, da que se encarregarom A Morrinha Sound Antisistema e Xoán Curiel. A Morrinha combinou sons jamaicanos com música cubana e o Curiel deleitou à concorrência com o seu habitual repertório com reminiscências brasileiras. No meio da actuaçom de Xoán Curiel, recebemos a emotiva visita do Carlos Cela.

O Centro Social Gomes Gaioso quer agradecer a massiva e calurosa resposta recebida e também a colaboraçom entusiasta das nossas amigas do bar de dosses Cúrcuma, que se encarregarom de dar de comer aos artistas, para além da participaçom desinteressada do Moncho, o Xavier, o Alberte, o Xoán e o Heitor da Morrinha, que já passam à nossa nómina de amizades de maneira definitiva.

Os cartos recadados serám ingressados na conta de solidariedade com as vítimas dos furacáns aberta pola associaçom Francisco Villaamil

Aguardamos pôr mais fotos quando seja possível.