Na próxima quarta-feira dia 7 de novembro o local social acolherá às 21h00 a projeçom do documentário belga "Ama-me enCARNEcidamente" que questiona a indústria cárnica e reflexiona sobre a necessidade de mudar os nossos hábitos alimentícios. A projeçom estará acompanhada de petiscos para os assistentes.

Este sábado dia 3 de novembro às 21h00 haverá umha ceia solidária com a presa e presos independentistas no nosso local social. Com umha aportaçom mínima de 5 ? teremos empada, omelete de batatas, pasta e salada de arroz. Quem quiser achegar mais comida nom tem mais que levá-la consigo no dia e hora indicados. O dinheiro será integramente destinado a paliar os gastos económicos derivados da situaçom repressiva dos patriotas presos.

Como a imensa maioria de vós já sabedes a estas horas, dous compatriotas mais fôrom sequestrados polo estado espanhol, incomunicados e enviados a Madrid sob a "lei antiterrorista". Do Centro Social Revolta nom vamos repetir os dados e as informaçons que nas últimas horas já tenhem facilitado companheiras e companheiros dos projetos comunicativos com os que se dota a nossa comunidade nacional. Só queremos acrescentar que, como muitas e muitos de vós também sabedes, o companheiro Júlio foi durante anos a pessoa sobre a que recaiu a responsabilidade de gestom, mantimento e dinamizaçom deste centro social. Só temos palavras de agradecimento polo trabalho realizado, a sua pegada humana, patriótica e revolucionária ficou marcada a ferro e lume na nossa memória coletiva. Fazemos um chamado público a participar na concentraçom que hoje dia 31 foi convocada às 20h no MARCO da rua do príncipe em solidariedade com Sílvia e Júlio.

FRENTE A REPRESSOM ESPANHOLA, SOLIDARIEDADE GALEGA!!
LIBERDADE INDEPENDENTISTAS!!

ÚLTIMA HORA! Fica desconvocado o roteiro ao Galinheiro com motivo da convocatória de urgência dumha marcha a Teixeiro para mostrar o apoio e solidariedade ao preso independentista galego e sócio deste centro social, Roberto Rodrigues Fialhega "Teto".
Em próximas datas retomamos a convocatória do roteiro.

Se nom for pouca a contínua ameaça dos aerogeradores e autoestradas sobre a serra do Galinheiro, vem-se de conhecer desde fai uns dias que a Junta da Galiza deu permisso à empresa Consulting de Geología y Minería, S.L para fazer prospeçons numha superfície de 100.000 metros quadrados desta serra.

Bem conhecida é a singularidade morfológica e geológica da serra na que esta empresa buscará nestas prospeçons as chamadas terras raras, materiais muito importantes na fabricaçom de tecnologia. O possível achádego seria o ponto de saída para umha nova canteira. Esta extraçom afetaria à serra e terreios encravados na comarca da Lourinha, Gondomar e Vigo sendo outra grande ameaça para a biodiversidade, a conservaçom dos múltiplos restos arqueológicos que ali se atopam e para um dos pulmons verdes que restam numha comarca tam atacada a nível meio ambiental.

Que é o que visitamos?

Este sábado 27 de outubro percorremos a serra num roteiro circular conhecendo o parque florestal do Galinheiro, o recinto onde se celebra o curro do Galinheiro, os numerosos restos arqueológicos como o Petróglifo Água da Lage ou os moinhos neolíticos, o cume dos Arruídos ou Lomba do Raposo (709 m), o que significárom as pequenas canteiras espargidas pola serra, o encoro ou barragem de Zamáns e o moinho das Maquias, e voltaremos ao início atravessando o Bairro da Fraga.

Como combinamos?

Para isto, combinamos às 10h00 ao pé do monte, onde começa o parque florestal do Galinheiro e que conta com umhas mesas de pedra e umha fonte. Este será também o lugar de chegada do roteiro, onde jantaremos depois da caminhada. Para chegarmos desde Vigo apanhamos a estrada PO-330 à altura de Pereiró e sempre em direçom a Gondomar, sobre o km 6 desta estrada estaremos no Alto da Garrida desde onde já podemos ver o imponente Galinheiro, e trás atravessarmos umha zona industrial apanhamos a PO-331 em direçom a Gondomar. Poucos metros mais adiante e imediatamente depois de passar a autoestrada por cima, antes de chegar ao bar Vincios, apanhamos umha pista à esquerda de forte pendente que nos vai levar à entrada do parque florestal após um par de quilómetros.
Dizer também, para quem preferir o transporte público, que Vitrasa tem linhas a parar bem perto da zona.

Que levamos?

Roupa ligeira, calçado cómodo e o que preferires para jantar. Há que ter em consideraçom que nom se esperam chuvas para o sábado de manhá e que o jantar pode-se deixar no lugar de saída-chegada onde ficará gente sem fazer o roteiro e os carros das pessoas que levem.

Esperamos-te!

Galeria fotográfica

Bem conhecemos as dificuldades que, como galego-falantes, temos para poder desenvolver a nossa vida em galego. Esta situaçom vive-se de modo especialmente grave no ensino, com a impossibilidade que tenhem as nossas crianças para poder aprender na nossa língua.
Neste contexto, o caminho iniciado polo projeto Semente abre um horizonte onde o ensino pleno em galego deixa de ser um desejo para se transformar numha realidade.

Conheces este projeto?

A Escola de Ensino Galego Semente constitui umha iniciativa social impulsionada pola associaçom A Gentalha do Pichel, que pretende conformar, junto com outros projetos semelhantes, as bases necessárias para a criaçom da Escola Nacional Galega.
Som espaços de ensino, onde se pom em prática umha pedagogia transformadora e onde se defendem princípios como: a co-educaçom, a laicidade, a integraçom com a natureza, a utilizaçom do galego no dia a dia das crianças...

Um grupo de pessoas da comarca de Vigo pensamos que este projeto seria possível desenvolvê-lo noutras cidades, como o caso da nossa cidade. Por isso, e com o fim de conhecermos mais a fundo esta iniciativa, membros da Semente vam estar em Vigo, falando-nos da sua experiência, de como fôrom as origens do projeto, as dificuldades com as que se encontrárom, etc.

A palestra terá lugar no próximo Sábado 27 de Outubro, a partir das 19h no C.S. A Revolta (Rua Real 12, rés-do-chao).

Contamos com vós! Será umha boa oportunidade para partilharmos a ilusom de que um ensino infantil em galego é possível. Além disso, poderemos partilhar uns minutos de diálogo com a gente da Semente e entre as pessoas que demandamos e cremos em projetos como este.

Anima-te e participa!

Nesta quarta-feira dia 17 de outubro às 20h30 o centro social acolherá umha projeçom do documentário "Capitalismo: umha história de amor" de Michael Moore. A projeçom estará acompanhada duns petiscos para o público assistente.