BOOKCROSSING
A Associaçom Cultural A Gentalha do Pichel organiza, em colaboraçom com o Movimento Defesa da Língua (MDL), um BOOKCROSSING de livros em galego. Com o motivo da celebraçom do Dia das Letras Galegas, A Gentalha do Pichel, em colaboraçom com o MDL, realizará um BOOKCROSSING em que se libertarám mais de 100 livros em galego. A apresentaçom do bookcrossing terá lugar dentro dos actos da popularmente conhecida Festa do Dezassete que se fai o 13, o sábado 13 de Maio, na praça Irmaos Gomes (Bombeiros), às 18.30 da tarde. Neste acontecimento, participarám escritoras e escritores da literatura galega, como Lucía Aldao, Maria Lado, Teresa Moure, Igor Lugris, Raquel Miragaia e João Guisan Seixas, que lerám fragmentos das suas obras. Esse mesmo dia serám libertados uns 50 livros, e outros tantos serám distribuidos entre o Centro Social O Pichel (Sta. Clara, 21), a Casa Encantada (Betanços, 35) e a cafetaria Rua Nova (Rua Nova, 36). O bookcrossing é umha actividade de fomento da leitura, em que livros livres viajam de umhas maos para as outras, derrubando os muros da cultura.
Se um día encontrares um livro sobre um banco, numha praia, ao pé de umha estátua ou na mesa de um bar, nom te surpreendas. É um livro que alguém que ainda nom conheces deixou com umha intençom: que o leias e que depois o libertes para que outra pessoa tenha a oportunidade de fazer o mesmo.
Segue a norma das três RRR:
· R de "Read": Lê os livros.
· R de "Register": Regista os livros antes de libertá-los gratuitamente na Internet
R de "Release": Libertar os livros é o objectivo, umha vez som lidos.
Escrito em 05-05-2006,
na categoria: Notícias
|