Tivemos ceia à portuguesa, com caldo e verde e bacalhau como é devido.
Tivemos companhia portuguesa durante a noite com Arnaldo e Irene, membros da AJA de Santarém que quigérom estar connosco neste dia tam especial e que tivérom umhas emotivas palavras de camaradagem; e companhia virtual dos amigos a amigas do Projeto Amigos Maiores, do Porto, com um vídeo que gravárom para nós o Paulo Esperança e a CatarinaT.
Tivemos exposiçom de cartazes do 25 de abril.
Tivemos lançamento do disco duplo "25 de abril sempre!", um fantástico trabalho que compila os temas mais emblemáticos da revoluçom portuguesa e, ainda, algumhas esquisitezes pouco conhecidas.
Tivemos concerto galego com o espectáculo inesquecível de Taghaitaí!, uns autênticos profissionais que pugérom a dançar absolutamente todo o mundo com a sua energia e força desbordante.
E tivemos a esperada estreia do coro da Gaita Armada, que nos deleitárom com o Grândola, o Carro e a Rama.
Para o ano, mais!!

Com este novo mapa poderemos localizar mais facilmente os negócios que se vam incorporando ao Projeto Pontos. Nom duvidedes em fazer-nos chegar as vossas sugestons:

AQUI podedes consultar o mapa

Festa galego-portuguesa para comemorar o 25 de abril

sábado 28 de abril no C.S O Pichel

21h00
- ceia portuguesa: entradas, caldo verde, bacalhau e papas de arroz. Vinho verde e café.

- apresentaçom do novo disco duplo: 25 de abril Sempre!
(Com temas de discos inéditos e documentaçom surpreendente)

- Saudaçom das companheiras do Projeto "Amigos maiores que o Pensamento"

22h30
- concerto: TAGHAITAÍ!!! TOUR DE BAIXURA + estreia da coral GAITA ARMADA

* É obrigatório ter bono para a ceia (venda antecipada no Pichel e reservas no mail da gentalha ATÉ O 26 DE ABRIL)
. O preço da ceia inclui o concerto: 15€
. Preço do concerto sem ceia: 3€ (4€ para nom sócias)

SOBRE TAGHAITAÍ:


Quatro Portos de mar unidos por um fio musical chamado "Tradiçom". Toda a Costa galega, de Moanha até Burela passando por Ribeira, fai que este grupo navegue musicalmente entre o Atlántico e o Cantábrico para encher-nos de salitre vital.

 Nesta primeira viagem de apresentaçom, Taghaitaí!!! irá descarregando Xarda Sonora em Ribeira, Camarom Harmónico em Moanha e Bonito Batukada em Burela... até chegar o dia 28 de abril a vender o peixe em Compostela, carregadinhos de Bacalhau para celebrar o 25 de abril na Gentalha do Pichel. Enrolades-vos???

Desde a semana passada temos no Pichel fichas sobre alguns apelidos de pessoas que vivem neste bairro.. É um trabalho elaborado por nós que pretende dar-che informaçom sobre a história, a extensom e a forma galega dos mesmos caso fossem castelhanizados com a criaçom dos Registos Civis.

Há alguns que tenhem origem toponímica, identificados nas fichas com um mapa da comarca de Compostela. Outros assentam num ofício ou numha alcunha familiar, identificados com o desenho de um ferreiro. Finalmente, os onomásticos som os mais numerosos, e poderás distingui-los polo brasom da família Castro com que os ilustramos. Nesta notícia penduramos um exemplo de cada um deles e também a lista completa dos que já tenhem ficha. Se aparece o teu, vem buscá-lo quando quigeres. Senom, deixa um comentário dizendo-nos qual é o teu e nós podemos procurar-che informaçom ou explicar-che onde a podes procurar tu mesma.

O Projeto Pontos é umha iniciativa que partiu da Comissom de Língua da Gentalha do Pichel que pretende dar a conhecer os negócios em galego de Compostela. Numha página ligada ao Facebook, som publicados regularmente os nomes dos estabelecimentos com breves informaçons e, também, com umha avaliaçom do seu compromisso com a nossa língua. E assim, a adequaçom a critérios como a atençom em galego, o emprego do galego nos relacionamentos internos e externos ou o compromisso activo com a normalizaçom da língua, determina que cada empresa receba de um a três pontinhos.
Além dos pontos, as empresas a receberem a máxima pontuaçom, podem mesmo ser merecedoras de umha mençom especial «nh» para os lugares que empregam a norma internacional do galego.
Nas próximas semanas, continuaremos a desvelar novos pontos em galego. O último da lista é QUEIXOS PEPE, com 3 pontos!

Leia mais »

GARTXOT
FILME DE ANIMAÇOM BASCO LEGENDADO EM GALEGO

sexta 23 de março nos Cines Compostela: estreia do filme

quinta 22 de março às 20h00 no C.S O Pichel: colóquio com o diretor Asisko Urmeneta

GARTXOT ANIMADO: A DESCONQUISTA DE NAVARRA.
Sobre cinema, animaçom e imaginário colectivo.

Gartxot, o filme de animaçom basco, estreia-se legendado em galego.
Nesta história medieval, umha mestura de tragédia romántica e filme de
aventuras, o Abade de Roncesvales desterra o bardo Gartxot e rapta o
seu filho Mikelot para que cante em latim ao serviço da Igreja.
Mikelot consegue escapar do convento e é perseguido polos temíveis
monjes guerreiros.
A história de Gartxot converteu-se com o tempo num símbolo que
proclama a liberdade para criar em euskera.

PORQUE TEMOS OS APELIDOS QUE TEMOS?
Leis, Moure, Calvinho, Rico, Campo, Outeiro..

Vem consultar a origem dos teus com GONZALO NAVAZA
Sábado 17 às 20h00 no Pichel

Atividade pensada para resolver dúvidas sobre a origem dos nossos apelidos e sobre qual seria a sua forma correta em galego. Para isso contamos com um dos estudiosos que mais tempo tem dedicado à toponímia e antroponímia nos últimos anos na Galiza: Gonzalo Navaza.

Durante a atividade serám distribuídas fichas com explicaçons sobre a origem e forma galega dos apelidos da vizinhança de Santa Clara, bairro onde se encontra sediado o Pichel. Também será disponibilizadas informaçons, para quem as precisar, sobre como podem ser galeguizados os apelidos.

Se queres visitar a exposiçom "Compostella Dicitur" na recentemente reformada Casa do Cabido, podes aproveitar a visita guiada que temos concertada para o próximo sábado 25 de fevereiro. O encontro será nas Pratarias às 16h45.

Como sabedes, a visita será um complemento do roteiro toponímico celebrado na passada semana, já que a exposiçom inclui planos, mapas e ruas da compostela do século XIII.

Temos um limite de 20 lugares para a visita, portanto se queres vir inscreve-te o antes possível no nosso correio: gentalha [arroba] agal-gz [ponto] org

O povo galego tem demonstrado, mais umha vez, que gosta, quer e defende o nosso património. As mais de 70 pessoas que se reunirom na Gentalha do Pichel para participar da palestra dirigidas por Antón Malde e Manuel Gago assim o demostram. Forom duas horas dumha exposiçom brilhante em que os eixos básicos da intervençom forom o conhecimento dos enigmas da Arqueologia galega em geral, e da jazida de Penafurada em particular, e umha defesa ativa e rotunda do nosso património.

Leia mais »

Cerca de um cento de pessoas acompanhárom este segundo roteiro toponímico pola cidade. Nesta ocasiom, como sabedes, o percurso escolhido foi o traçado da antiga muralha, fazendo diferentes paragens que nos permitírom conhecer o sentido e a origem dos nomes das portas -Maçarelos, Pena, Vale de Deus, Faxeira...- e de muitas emblemáticas ruas e praças da nossa cidade que nem sempre tinham explicaçons tam evidentes: Solóvio, Algálias, Preguntoiro, Praça do Campo ou do Pam, Atalaia, Toural (ou Toral?), Esterqueira, Castro...

Esperamos poder continuar a desvendar de que falam as nossas ruas num próximo roteiro que oxalá conte com tanta participaçom com este!

de que falam as ruas de compostela?
um passeio polos nomes dos lugares da zona velha seguindo o traçado da antiga muralha
visitaremos a exposiçom "compostela dicitur" na casa do cabido e saberemos como era a nossa cidade no século XIII

com o especialista em toponímia Xosé Ramón López Boullón

domingo 5 de fevereiro
16h30 na porta de maçarelos

No próximo domingo 5 de fevereiro às 16h30 a Gentalha do Pichel organiza o segundo roteiro toponímico, nesta ocasiom pola zona velha de Compostela .

Depois da primeira visita polo bairro de Sam Pedro, agora continuamos a conhecer compostela pola sua zona mais emblemática: o casco histórico.

A ideia é darmos um passeio seguindo o antigo traçado da muralha e conhecer um pouco mais a história da cidade através dos nomes das suas ruas e lugares actuais e passados. Acompanhará-nos o especialista em toponímia compostelana Xosé Ramón López Boullón.

Saberemos de onde vem o nome de Belvis, do Castrom D'ouro, da Mámoa, do Val de Deus, Atalaia, Entremuros, Pexigos, Trompas, Loureiros...

E para conhecermos melhor a compostela medieval, visitaremos a exposiçom da Casa do Cabido "Compostela Dicitur", onde poderemos visitar as ruas, nomes e lugares do século XIII.

Queríamos convidar-vos a participar do passeio e também perguntar-vos se conhecedes alguém que queira informar dos nomes "nom oficiais" (os nomes tradicionais que nom aparecem no mapa).

Esperamos ver-vos!
Abraços

Ficam aqui algumhas das imagens que deixam constáncia do interesse que este roteiro levantou entre picheleiras e corunhesas. O amigo Xúlio Cuba orientou maravilhosamente um percurso que se prolongou durante quase 3 horas e que todas e todos desfrutamos imensamente. Aprendemos da nossa história comum através da cidade da Corunha numha manhá de domingo que esperamos que se repita!

O roteiro foi gravado integralmente e consta de 24 partes. Deixamos-vos aqui a primeira, que se corresponde com a paragem no monumento a Curros: