A excursom partiu de Compostela às 8h45, com a distribuiçom e explicaçom do programa entre as assistentes. Chegados a Castro Laboreiro, partimos para a inverneira da Ameijoeira, nom sem antes beber qualquer cousinha num dos cafés da vila de Castro em que tínhamos combinado com o nosso guia, o investigador local Américo Rodrigues. A inverneira da Ameijoeira encontra-se mesmo em cima da fronteira galego-portuguesa e de facto foi de um marco fronteiriço que o nosso guia deu a sua primeira explicaçom. Falou-nos do exilado galego Alonso Rios, o sinhor Afránio, que passou por ali na sua viagem para o exílio, e explicou-nos como os castrejos e castrejas passavam os três meses mais duros do inverno nas inverneiras, situadas nos lugares baixos da serra, e os outros nove nas brandas, os lugares mais altos, com melhores pastos, mas de onde a neve os obriga a fugir no inverno. A seguir, nom sem certa dificuldade para o autocarro, fomos ver duas brandas (Portos de Cima e Portos de Baixo) e conhecemos o Álvaro, um dos poucos vizinhos de Castro que continua a fazer esta migraçom. Voltamos à vila pola umha e meia e comemos o famoso bacalhau com broa do Laboreiro. Depois do jantar, subimos ao castelo, existente desde antes da criaçom do reino de Portugal. A viagem acabou com o visionado de fotos da regiom e com umha visita ao canil da vila, onde nos explicárom muitas cousas sobre a morfologia e o carácter de umha das raças de canídeos mais definidas de Portugal, o cam de Castro Laboreiro.

Vale a pena continuar a fazer viagens assim, para conhecermos mais profundamente um norte de Portugal que nos continua a ficar longe, para tecer redes humanas que o tornem menos estrangeiro. Continuarám.

Um participante na viagem gravou este vídeo que mostra a surpreendente fala de Castro. Qual será a nacionalidae de cada pessoa??: