Características geográficas e ambientais.
A zona pola que discorre o roteiro inclui-se dentro da área que em termos geográficos denominamos planalto de Ordes, que vem sendo umha derivaçom cara o oeste da Dorsal Galega. Tras a intervençom dos agentes erosivos ao longo de muito tempo, deu em formar umha superfície de aplanamento que se estende desde os montes de Janceda e Cúrtis, no leste, até as terras do Jalhas e os montes do Castelo polo oeste.

Som terras de relevo suave, localmente crebado por pequenas elevaçons graníticas ou quarcíticas e fendas fluviais que serpenteam entre as chairas. As elevaçons nom superam os 450-500 metros de altitude. Este relevo deu lugar a um povoamento humano elevado e disperso, pois os recursos disponhíveis permitírom o assentamento em numerosos lugares onde se davam as condiçons óptimas para o desenvolvimento da agricultura e gadaria tradicionais, por um lado, mas também para o aproveitamento dos recursos florestais. Este povoamento já vem de muito antigo, sendo prova do mesmo a presença de restos megalíticos, mámoas e mesmo algum dolmem como o de Cavaleiros, situado em Tordoia, nom muito longe da zona caminharemos, ou de numerosos castros que se ubicavam tanto nas partes baixas dos vales como nos cumes e abas que descem estas amplas lombas.
Os rios e regos existentes pertencem maioritariamente à bácia do Tambre. Som salientáveis os rios Samo e Lingoelhe. O primeiro percorre a zona mais oriental deste planalto, por terras de Cúrtis e Janceda, enquanto que o segundo cruza os concelhos de Ordes e Oroso. Tanto o Samo como o Lingoelle e o Tambre constituem o espaço natural protegido incluido na Rede Natura 2000 e denominado Ribeiras do Tambre. Este espaço natural limita-se às ribeiras florestadas destes rios, extendendo-se apenas uns metros cara os prados e bosques que circundam os cursos de água. Um curto tramo do rego Cabrom, tributário do Lingoelhe que também está integrado neste espaço natural, será o que trataremos de percorrer. Os bosques ribeirinhos de amieiros e salgueiros, intercalados com bidoeiras e algumha carvalheira, em um contorno agro-gadeiro e florestal por vezes profundamente alterado e em outras milagrosamente bem conservado, conformam a paisagem que poderemos contemplar em 4 ou 6 horas de percurso.
Este roteiro permitirá compor umha ideia geográfica e ecológica básica desta comarca da Galiza, e aproximará-nos a umha realidade sócio-económica e ambiental que é comum para numerosas comarcas do País que partilham semelhares carácterísticas orográficas. Poderemos compreender o estado de latência no que se encontra este sistema agro-gadeiro e florestal, identificando as eivas estruturais e políticas que perpetuam, polo de agora, umha situaçom de dependência e subalternidade para tantas comarcas dotadas, em troca, de um enorme potencial para um desenvolvimento mais ou menos harmónico nos planos social, económico e ambiental.
Pessonagens da comarca.
As terras de Ordes dérom pessoagens salientáveis para a história contemporánea da Galiza. Quiçá a mais conhecida de todas elas, elevada polo imaginário popular a autêntica lenda, é Benigno Andrade Garcia 'Foucelhas'. Este jornaleiro nado na paróquia de Cabrui (Mesia) compromete-se nos tempos republicanos com a rádio comunista de Cúrtis e refugia-se como fugido nos montes da comarca. Na década de 40 integra-se na disciplina do Exército Guerrilheiro da Galiza, e participa de inúmeras escaramuças que dam fama da sua habilidade proverbial para esquivar a morte. Cai em umha cilada da guarda civil na paróquia de Oça dos Rios (Marinhas) e é executado a garrote vil n'a Crunha em 1952.
O verdadeiro papel dirigente e organizador da guerrilha corresponde a outro ordense, Manuel Ponte Pedreira 'Jastre'. Nado em Abelhá, no concelho de Frades, é enviado a prisom polo franquismo nos primeiros anos de ditadura. Profundamente politizado pola repressom, une-se aos combatentes do monte e chega a dirigir a IV Agrupaçom do EG, a mais activa e agressiva de todas as que actuam no País. Cai em umha cilada da guarda civil no lugar de Fontao, na sua paróquia natal. Ao dirigir-se a cobrar umha multa a um vizinho abastado, as forças repressivas cercam o grupo e impedem toda possibilidade de fuga. Os seus restos repousam no cemitério de Abelhá, junto os de Manuel Díaz Pam e outro guerrilheiro asturiano.
Se retrocedermos mais na história também damos com outro galego célebre e combativo. Em 1779 nasceu no concelho de Mesia o fidalgo António Benito Fandinho. Comprometido com o primeiro liberalismo, padece encadeamento em sucessivas ocasions pola sua denúncia jornalística do papel da Igreja, os juízes e o poder em geral. Em umha das suas primeiras estadias na cadeia, compujo A casamenteira (1812), a primeira peça dramática que conservamos em galego da Galiza. O resto da sua produçom na língua do País inclue-se no Villancico que en la Nochebuena de 1812 cantaron los presos de la cárcel pública de Santiago e a carta Respuesta a T.C.M.B articulista en el 'Observador Constitucional' de esta ciudad del viernes 26 del corriente, escrita no ano de 1820. A sua casa, relativamente conservada, permanece desconhecida para a imensa maioria da cidadania. Trata-se de mais um monumento histórico de importáncia que ao igual que a casa de Foucelhas, na aldeia do mesmo nome- carece de qualquer referência polo mais absoluto desleixo institucional.
Escrito em 05-05-2006,
na categoria: Notícias
|