RECUPERANDO AS NOSSAS RUAS
Mais um ano, o movimento em defesa do idioma e a cultura galega na nossa cidade tem que voltar a reivindicar o evidente: a plena galeguizaçom das nossas ruas e a eliminaçom de denominaçons alheias e impostas que apagam partes importantes da história da cidade.
A Gentalha do Pichel impulsiona este passa-ruas normalizador com o intuito de fazer visível parte desse património imaterial que nos é reiteradamente roubado pola ignoráncia, o desleixo ou a má fe de umha cámara municipal mais preocupada com ocupar a polícia na perseguiçom dos movimentos populares e na colocaçom de obstáculos contra as entidades que nos empenhamos na auto-organizaçom.
Hoje queremos recordar a plena vigência do nosso rueiro original para lembrarmos que também neste terreno a homogeneizaçom espanhola bateu forte. Desde os primeiros anos do século XIX, o nacionalismo do Estado fijo um grande esforço por rebaptizar parte das ruas de Compostela e das principais cidades da Galiza: eliminou denominaçons populares de praças e ruas, normalmente alusivas a feiras e actividades económicas das classes populares, e gravou na pedra os nomes das suas figuras e eventos imperiais: ?Méndez Núñez?, ?2 de Mayo?, ?Lepanto?? com a barbárie de 1936, umha nova camada de falsidade se impujo nas ruas galegas: chegárom os ?generalísimos?, ?Molas?, ?Sanjurjos? e ?calvos sotelos?, que só agora se começam a substituir num importante labor de higiene democrática.
A Gentalha do Pichel começa o seu percurso numha das praças emblemáticas da cidade, tanto pola sua significaçom como centro neurálgico do Santiago velho ao longo dos séculos, como por ser um importante ponto de partida de numerosas iniciativas dos movimentos populares. Falamos da Praça do Pam, em cujas arcadas se vendia este produto fundamental. A homogeneizaçom espanhola conseguiu os seus objectivos em meados do século XIX, quando dedicou o lugar a esse clássico das letras hispanas que é Miguel de Cervantes. O mercado de abastos foi centralizado por volta do ano 1870 e os diferentes mercados que estavam dispersos pola cidade ficárom agrupados na zona em que hoje está. Os principais lugares de venda, além da mencionada Praça do Pam, eram, entre outros, a Rua da Peixaria Velha, que mantém o nome mas na sua forma espanholizada ?pescaderia?, e a Rua das Carniçarias (que sofreu também o golpe eclesiástico; conhecemo-la hoje como ?S. Paio de Antealtares?)
a nossa rota polas ruas do Perguntoiro (onde se liam os pregons municipais na Idade Moderna), passando ao pé da rua do Rego de Água (hoje Arcebisbo Gelmires) e da rua dos Sapateiros (hoje Cardeal Payá); continuaremos pola Caldeiraria (que deve o seu nome aos ofícios que nela se desempenhavam). Antes de seguirmos o nosso percurso, permitiremo-nos umha pequena incursom na Praça do Mercado Velho, hoje Maçarelos: apenas para lembrarmos que lá fica a última parte das muralhas medievais da cidade e a porta por onde entravam ?prévio pagamento de taxas- os vinhos do Ribeiro que consumiam os compostelanos e compostelanas. Mas também e sobretodo para repararmos na estátua de Montero Rios, importante cacique liberal da I Restauraçom, e resgatar umha velha reivindicaçom nacionalista: já as Irmandades da Fala solicitaram na década de 20 o derrubamento deste monumento ao caciquismo (na altura situado na Praça do Obradoiro) e a construçom de umha outra escultura a algumha personagem meritória da história da Galiza. Na Gentalha do Pichel queremos somar-nos a esta reivindicaçom nom conseguida mais de oito décadas depois.
Atravessaremos a rua dos Ferreiros (hoje rua das Orfas, em homenagem ao convento que ali foi recolocado), e finalizamos o nosso passa-ruas de denúncia e reivindicaçom na PRAÇA DA GALIZA: umhas nefastas autoridades municipais derrubaram um magnífico exemplo de arquitectura modernista (o edifício de Castromil) e impugérom a versom deturpada do nome do nosso País. A ver se o que nom fam os políticos ?galeguizar com todas as consequências- o fai o movimento popular?
Escrito em 16-05-2006,
na categoria: Notícias
|