o esbanjamento da cámara municipal em luzes e renas

o esbanjamento da cámara municipal em luzes e renas

As ruas de Compostela exibem desde 2 de Dezembro a tradicional iluminaçom de Natal. E dizemos tradicional nom por o ser, senom porque já está tam normalizada a presença dela que quase ninguém a questiona. Ao contrário, a maior parte da populaçom afirma que lhe presta e que teria saudades se faltasse: ?sem luzes nom parece Natal?. No entanto, em A Gentalha do Pichel pensamos que deve haver consenso na revisom e discussom de vários aspectos:


- A duraçom:
as duas semanas das festas (mais ou menos de 22 de Dezembro a 6 de Janeiro), ficam transformadas em quase mês e meio de luzes. E isto, para algumha cousa além de lembrar constantemente às pessoas que estamos em época de consumismo desenfreado?
- O excesso em número de lámpadas e intensidade: mesmo se concordarmos com dar à cidade um certo ?ar natalício?, nom achamos necessário cobrir umha praça ou todo o percurso dumha rua com fios luminosos, como acontece no Toural ou em Sam Pedro.
- O gasto que implica: só na compra da decoraçom, a Cámara investiu 115.000 ?, segundo informaçom aparecida na imprensa. Isto sem contar o enorme incremento na factura eléctrica da iluminaçom pública que sempre se produz no mês de Dezembro...
- A adequaçom cultural: em primeiro lugar, haveria que rever o facto de as instituiçons públicas investirem dinheiro na celebraçom de festas com tam marcado conteúdo religioso; mesmo se entendêssemos que o Natal perdeu tal conteúdo religioso e que agora é simplesmente um evento da cultura autóctone, perguntamo-nos se tenhem algo a ver com o Natal galego os leques da zona velha ou essa nova espécie invasora (agora, culturalmente) que som as renas luminosas do Ensanche...
- O imoral esbanjamento de electricidade: este é o exemplo dumhas autoridades que se proponhen convencer a cidadania (com toda a razom) da necessidade de poupar energia em nome da sustentabilidade e do uso racional dos recursos?
No contexto de espólio energético da Galiza, este estrago de dinheiro é especialmente sangrante: será que é para acender campainhas e trenós fluorescentes que estamos entregando às empresas eléctricas os nossos rios destruídos por encoros e minicentrais, os nossos montes cheios de parques eólicos, o nosso ar sujado polas centrais térmicas mais poluentes da UE? E será que há direito a que a cidade tenha tal excesso de iluminaçom enquanto noutras zonas da comarca existem deficiências no serviço básico como as de Negreira? Mas já sabemos que vivemos no país das contradiçons: nas Pontes de Garcia Rodrigues, o concelho que mais electricidade produz do Estado espanhol, havia casas rurais sem rede eléctrica no ano 2003...
Enquanto as companhias eléctricas destruem o nosso país e ainda falam de encarecer o recibo, entontecem-nos com luzes de cores. Isso sim, de baixo consumo, que é mais moderno, para nom termos remorsos por gostarmos delas (se tal for o caso) e sobretodo para nom podermos queixar-nos da incoerência da classe política. Porque, que importa que as lámpadas (algumhas) sejam de baixo consumo, se cada vez se ponhem mais e mais? Nom é claro que estamos perante outra lavagem de cara, perante outra manipulaçom dos discursos alternativos (neste caso, do ecologismo) por parte do poder para aproveitar-se deles melhorando a súa imagem pública?
Numha sociedade culturalmente diversa e, polo menos na teoria, respeitosa com a diversidade, devia haver cuidado com nom discriminar umhas manifestaçons culturais e religiosas para beneficiar outras.
Mesmo se finalmente se decidir enfeitar a cidade no Natal, como noutras festas, haverá que fazê-lo de umha maneira mais racional e sustentável, tendo em conta os costumes tradicionais da Galiza.
E, mesmo que nos prestasse muito este tipo de ornamentos, nom teríamos suficiente consciência e generosidade como para renunciar a eles em favor do ambiente, em favor e benefício das pessoas? É um compromisso bem pequeno para começarmos a transformar o mundo que temos por aquele que desejamos...

Escrito em 29-12-2006, na categoria: Notícias, Comissons
Chuza!

Sem comentários ainda

    SEMENTE

      Somos um grupo de compostelanas e compostelanos decididos a fazer activismo cultural na nossa cidade e comarca. A língua e cultura galegas, a vontade de aprender, de difundir e recuperar os nossos costumes, a nossa história, a nossa música... som os nossos eixos de trabalho.

      Documentário Quatro anos de Gentalha já na rede!

      A Gentalha do Pichel Centro Social O Pichel Loja da Gentalha

        AGENDA DE EVENTOS

          Busca

          O blogue do Apalpador

          powered by b2evolution free blog software