
Continua funcionando esta original campanha da Comissom de Memória Histórica. Lembramos que consiste na ediçom duns autocolantes onde se aclara a história das pessoas que baptizam algumha rua compostela. Neste caso tocou à rua Quiroga Palacios e aí vai o relato:
O nome de avenida pode que fique um pouco grande para esta rua que vem desde Belvis até a Avenida de Lugo circundando o monte da Trisca.
A Avenida de Quiroga Palácios assenta no traçado dumha antiga corredoira que discorria entre os terrenos que havia no espaço existente entre o monte da Trisca e os caminhos de ferro entre Compostela e Corunha.
A urbanizaçom desta zona começou por volta da segunda metade do século XX, no tempo em que a velha Compostela começava o seu serôdio desenvolvimento urbano, ficando como umha área periférica a respeito do chamado ensanche.
O nome que o concelho destinou a esta rua é precisamente o de umha das personagens de maior peso na sociedade compostelana das décadas de 50 e 60, o Cardeal Fernando Quiroga Palácios, nascido em Maceda nos inícios do Século XX.
É esta umha personagem controvertida já que na sua condiçom de cardeal da igreja católica e primeiro presidente da Conferência Episcopal espanhola foi um dos grandes dirigentes do aparelho ideológico da ditadura franquista; no entanto, é conhecida a sua acçom como protector de numerosas pessoas repressaliadas e das suas famílias durante a guerra e o imediato pós-guerra, com umha atitude que o honra e que o mesmo Castelao reconheceu.
Assimesmo, deve-se à sua teima pessoal a consecuçom do reconhecimento por parte do Vaticano da nossa língua como língua litúrgica, e som de sobra conhecidas as suas ligaçons com o núcleo ourensano da geraçom NÓS mantendo umha longa amizade com algum dos seus mais destacados membros, caso de Outeiro Pedraio.
Escrito em 12-10-2007,
na categoria: Comissons, memória histórica
|