A partir de já, as pessoas que, por diferentes motivos, nom tenham tido oportunidade de adquirir o idioma de modo natural, poderám inscrever-se no Voluntariado pola Língua que, como no ano passado, volta a organizar a Gentalha do Pichel. A inscriçom poderá fazer-se em vários locais compostelanos ou através do correio electrónico ou dos telefones disponibilizados.

Continua:

Naturalmente, também som necessárias as adesons de pessoas que, sabendo galego (da Galiza ou de qualquer país lusófono) queiram pôr à disposiçom dos novos falantes umha hora por semana do seu tempo.

Lembramos-vos que o voluntariado é um programa gratuito que pretende pôr em contacto pessoas que falam galego habitualmente com pessoas que por diversas razons nom tenhem maneira de treinar a língua oralmente para avançar na sua aquisiçom. Proporcionar um ámbito de comunicaçom galegófona a estas pessoas é o principal objectivo do voluntariado.

QUEM PARTICIPA?

No programa Voluntariado pola Língua participam pares de voluntários ou voluntárias e aprendentes:

Os voluntários e voluntárias tenhem a oportunidade de introduzir outra pessoa no uso da língua oral, dando-lhe um ámbito de comunicaçom do qual o aprendente nom dispom. Para ser voluntário ou voluntária só precisas de te expressares em galego fluentemente e certa responsabilidade para falares com a máxima qualidade de galego possível perante umha pessoa que está a dar os primeiros passos.

Poderám ser aprendentes todas aquelas pessoas que por diversas razons nom usem a língua oralmente e queiram avançar na sua aquisiçom. Principalmente serám pessoas vindas de fora que estejam a morar na Galiza e muitos galegos e galegas que nom dominem a língua falada porque carecem de um ámbito comunicativo para darem os primeiros passos. Para ser aprendente só é necessário que entendas o galego minimamente.