Um dos caminhantes observa os benefícios do "progresso" em Gundiám, ao começo do roteiro. A continuaçom oferecemos-vos o texto elaborado pola gentalha para a ocasiom e o resto das fotos.

Continua:

A saida: a ponte Gundiám
O roteiro começa ao pé da ponte de Gundiám (também chamada de Sam Joám da Cova), que data de 1958 e foi feita para salvar o desnível do caminho-de-ferro Samora-Corunha.

Sobre ela, observa-se umha nova ponte: a do AVE. Já som várias as actividades em que a Gentalha mostrou a oposiçom a este projecto, por diversas razons. A construçom do AVE na Galiza implica o desmantelamento de comboios de proximidade, paragens em vilas pequenas e encerramento de apeadeiros, o qual afectará especialmente o estudantado e a populaçom rural, dando lugar a comarcas marginadas en matéria de infra-estruturas.

Além disto, o AVE ameaça com ampliar a fenda existente entre a regiom costeira metropolitana (eixo Ferrol-Vigo) e o campo, mais fragmentado e inacessível, reduzindo-o cada vez mais a algo decorativo, de segundas residências e turistas do rural.
Todo isto dá lugar a umha cada vez maior dependência do automóvel que implica caminhar para um modelo mais insustentável de transporte.

O AVE une os pontos de interesse para o movimento de capitais, mas nom de pessoas... Planificado na Espanha, prioriza absolutamente a comunicaçom com Madrid em vez de vertebrar o país, e todo isto a preços só acessíveis a empresas e rendas altas: um comboio de luxo para as elites económicas. Por nom falar da insegurança laboral nas obras: 2 pessoas mortas e 8 feridas nos últimos 3 meses.
Do ponto de vista ecológico-ambiental o AVE produzirá um grande impacto; quer polas fendas insalváveis na natureza (desmontes, túneis, pontes), quer polo destroço do património histórico-cultural (jazigos, castros). Ainda, a respeito do consumo, este comboio a 300 km/h gasta em electricidade o equivalente a umha cidade de 25.000 habitantes.

Por todo isto, a Gentalha quer renovar a oposiçom ao AVE, apostando num comboio galego, sustentável e popular.

O caminho: o Ulha
Deixando atrás a Ponte Gundiám baixaremos pola beira direita do Ulha, entre vegetaçom de ribeira, como salgueiros, ameneiros, um ou outro carvalho... A meio do caminho extensos campos de vinhas e um moinho abandonado dam testemunho de actividades tradicionais relacionadas com o rio.

A proximidade desta zona com o concelho de Teio, lugar de actividade da guerrilha antifranquista, levou-nos a perguntar-nos pola sua presença nestas terras. Na regiom entre o Tambre e o Ulha esta presença relacionou-se com a actividade comunista. Em meados dos 40, e como actividade estritamente política, existia um grupo de comunistas em Santiago organizado à volta de Isaac Vázquez e José Manzanares (detidos em 1944, quando a guerrilha começava a organizar-se na IV agrupaçom do Ejército Guerrillero de Galicia, liderada por Manuel Ponte Pedreira "Xastre" e Francisco Rei Balbis "Moncho")

Em 1946, para o EGG safar-se da pressom policial que o assediava na zona norte e centro da Corunha, promove-se a formaçom dumha V Agrupaçom, liderada por Benigno Andrade "Foucelhas". Perto destas terras, em Teio, protagoniza um atraco na paróquia de Lampai, e um enfrentamento com mortos na paróquia de Luou, em Maio de 1948.

Para banir os pontos de apoio desta V Agrupaçom, a guarda civil lança redadas amplas na base social. E aí temos, em Junho desse ano, 63 detidos: três deles, labregos de Vedra, condenados a mais de 20 anos de cadeia cada um:
Antonio Puente, Aurelio Abraldes Fares, Camilo Pena Garcia. Foi este o fim do grupo armado na zona.

O final: o paço
Desviaremo-nos da beira do rio para dirigirmo-nos ao Paço de Ortigueira, na paróquia de Santa Cruz de Ribadulha. Neste, que data do século XV, destaca o jardim, com um passeio de oliveiras em forma de cruz e umha grande diversidade botánica. Arquitectonicamente, a casa apresenta detalhes barrocos, entre os quais chama a atençom a ostentosa fonte.

Foi no século XVI quando a família Mondragom, proprietária do paço e cuja varanda ainda se conserva na fachada do mesmo, se ligou com a família Armada. Actualmente, o dono do paço é Alfonso Armada, conhecido por ser o organizador do golpe de estado do 23-F.

O autogolpe de estado tinha o objectivo de frear o processo de reforma franquista e legitimar a monarquia bourbónica. Na altura, a oficialidade franquista rejeitava a legalizaçom do PCE, a descentralizaçom e a neutralidade de Suárez na política exterior. Além disso, a agitaçom social e as luitas operárias provocavam umha instabilidade que, unida à intensa acividade armada da ETA e, em menor medida dos GRAPO, provocavam grande crispaçom no Exército.

Foi entom quando o general Armada, nomeado dias antes Chefe do Estado Maior, organizou o golpe, que procurava forçar um governo de concentraçom que ele mesmo presidiria, para estabilizar a situaçom. Foi o desconhecimento destes objectivos por parte de Tejero -quem recusou a possibilidade de incorporar socialistas e comunistas ao governo, que provocou a falência do golpe, e nom a mediaçom do Rei, que demorou mais de seis horas a se posicionar (além disso, a estreita relaçom entre Armada e o Rei eviedencia que as suas intençons eram perfeitamente conhecidas pola coroa).

O fracasso do golpe obrigou a utilizar o fascista Armada como bode expiatório, sendo condenado à cadeia, mas indultado só 6 anos depois, quando se retirou a cultivar camélias no Paço de Ortigueira. Mas apesar do fracasso do golpe, chama à atençom como se cumprírom os seus objectivos: legitimaçom do Rei, que se desprendeu da mancha de ser nomeado por Franco, e limitaçom de reformas na “Transiçom”, provocada polo medo a umha nova involuçom democrática, medo que reduziu também a mobilizaçom social e obreira.

Assim pois, desfrutemos do roteiro, e aproveitemos também as oportunidades que nos dá para lembrar a história ligada ao território. Que gostedes!

Na beira do Ulha encontramos um moinho restaurado onde demoramos um bocado

Ao pé do rio, na área recreativa de Agronovo, jantamos para a continuaçom dirigir-nos ao paço de Ortigueira.

Perto do paço já se publicitara a nossa actividade

O grupo, com o Paço de Ortigueira ao fundo.

À volta, tivemos tempo para subir ao Pico Sacro