A Comissom de Meio da Gentalha do Pichel acabou de publicar umha nota de imprensa em que denuncia que a Cámara Municipal continua a minimizar a difusom do Plano Especial das Branhas do Sar: a consulta deste documento custa 26 €. A seguir podedes consultar o texto completo.

Continua:

Cámara Municipal cobra 26 euros pola consulta do Plano Especial das Branhas

A Gentalha denuncia que Rajói continua a minimizar a difusom do Plano

Já há tempo que a Cámara Municipal de Compostela assumiu o projecto do Mausoléu da Cidade da Cultura, iniciado pola Junta de Fraga, um burato negro no orçamento da conselharia de Cultura que devora mais de 40% do mesmo cada ano.

A necessidade de ligar Compostela com o Gaiás tem dado lugar a iniciativas esperpênticas como a proposta de unir a Cidade da Cultura com a Zona Velha mediante um teleférico. A ideia foi descartada após ameaçar a UNESCO com retirar a Compostela o título de cidade Património da Humanidade.

Agora, a proposta da Cámara Municipal é outra: fazer crescer Compostela em direçom ao Gaiás; só um problema se interpom nesse caminho: a existência dum hábitat de grande importáncia biológica, hidrológica, cultural, patrimonial e produtiva: as Branhas do Sar. As únicas Branhas urbanas da Galiza, onde se prevê a construçom de 65.000 m2 de equipamentos desportivos e universitários e umha estrada que seccionará o ecossistema, para a construçom dum jardim por onde os turistas podam transitar sem enlamar-se a caminho do Mausoléu fraguista.

Para isto, a Cámara Municipal elaborou um Plano Especial que se encontra nestes momentos em processo de consulta e que foi apresentado por Bugalho a 16 de Julho, no começo das férias de verao, época especialmente propícia, como é sabido, para a apresentaçom de planos especiais, reformas laborais e leis de educaçom. Um plano que, em contra da legislaçom, nom tem Avaliaçom Ambiental Estratégica.

Às queixas pola falta de informaçom e a pouca precisom da que é fornecida pola Cámara Municipal, une-se agora o preço proibitivo que a instituiçom municipal cobra por disponibilizar o Plano Especial das Branhas. Nada menos que 26 euros por um documento em formato digital. A comparaçom do preço deste documento com o de, por exemplo, o PGOM (só 6 euros), fai pensar numha vontade de que o Plano se publicite o menos possível.

A Gentalha do Pichel tem desenvolvido um labor de informaçom sobre este plano. Roteiros, textos informativos, palestras, exposiçons fotográficas... A última, umha conversa com vizinhos e vizinhas do Sar sobre a história das Branhas. Será a vindoura sexta feira, às 20h30 no bar Marmolo, na rua de Sar.

Continuamos a reivindicar a paralisaçom deste Plano, e a elaboraçom de um outro que potencie as funçons produtiva e hidrológica, proteja a cultura e património ligados a este espaço e assegure a pervivência da diversidade biológica deste ecossistema.