NOTA DE IMPRENSA SOBRE AS BRANHAS DO SAR

NOTA DE IMPRENSA SOBRE AS BRANHAS DO SAR


Na foto: proposta dum estudo de arquitetura no Concurso para o Instituto de Ciências do Património do CSIC, nas Branhas. 5.250 m2 mais de edificaçom (no conjunto do Plano o terreno roubado às Branhas é de quase 70.000 m2). É esta a recuperaçom do espaço que nos querem vender com o Plano Especial?

A Gentalha vem de enviar aos meios umha nota de imprensa, na que explica dumha maneira resumida os fundamentos das alegaçons ao Plano Especial que apresentou a passada semana.
Ante a pouca difusom que está a ter nos meios este tema, disponibilizamos a continuaçom o texto.

Também podes consultar as alegaçons aqui

A Gentalha do Pichel vem de apresentar as alegaçons ao Plano Especial das Branhas do Sar

A associaçom alega que o documento é ilegal por nom contar com Avaliaçom Ambiental Estratégica.

A oposiçom à construçom de equipamentos desportivos, universitários e estradas neste espaço natural som os principais argumentos da associaçom.

A Gentalha do Pichel vem mantendo umha intensa atividade em favor da preservaçom e recuperaçom das Branhas do Sar, um espaço de grande importáncia biológica, hidráulica, cultural e histórica da nossa cidade. O Plano Especial que a Cámara Municipal preparou para este espaço, que implica na prática a conversom deste ecossistema num jardim urbano, só persegue um objetivo: comunicar Compostela com a Cidade da Cultura. A incomunicaçom entre estes dous espaços já tem dado lugar a outras iniciativas esperpénticas como a do teleférico de Bugalho.

Mas nom só somos nós quem nos opomos a este Plano. O documento "Informe prévio à atuaçom urbanística nas Branhas do Sar em Santiago de Compostela", elaborado por umha equipa de expertos e expertas da Universitat Politècnica de Catalunya, e encarregado pola Cámara Municipal e o Consórcio de Compostela, critica as pretensons urbanizadoras do Plano. Assim, censura os projetos que implicam a construçom de 7 ha para equipamentos desportivos e universitários, as novas estradas, e que o Plano deixe fora dos seus limites zonas de branha (que no PGOM aparecem como solo urbanizável). Este documento aponta um caminho para a recuperaçom deste espaço: recuperaçom da conexom hidráulica Branhas-Belvís e recuperaçom dos espaços construidos nas Branhas, incluido o Multiusos. Nem os estudos que encarregam lhes dam a razom!

O ICOMOS (organismo internacional dependente da UNESCO), no seu documento sobre a proposta de teleférico entre a Zona Velha e a Cidade da Cultura, manifesta a perigosidade dum Plano que pretende eliminar o caráter rural das Branhas. Com efeito, as expropriaçons de terrenos serám massivas, ainda que a informaçom da que dispom a vizinhança é mínima. Trata-se dum projeto urbanístico que se está a realizar sem a mais mínima participaçom cidadá, em períodos pouco dados para o debate (lembremos que o praço de alegaçons tivo lugar só durante o verao), e com informaçom em muitos casos incorreta. O mapa com o que Bugalho apresentou o projeto nom coincidia com o Plano, de modo que incluia zonas que em realidade estám fora do Plano, dispostas para urbanizar.

Por último, mesmo na memória de informaçom que incorpora o documento do Plano Especial, se aceita o facto de que as Branhas estám num estado biológico degradado. É incoerente tencionar fazer-nos crer que essa recuperaçom vai passar por construir mais e reduzir mais o espaço das Branhas. Umha recuperaçom a sério precisaria dum programa de estudo de indicadores biológicos verificáveis no tempo, que nom existe no Plano.

A pesar a retórica conservacionista, os argumentos falam por si próprios. Cada vez fica mais claro que a intençom da Cámara Municipal é fazer um jardim para a Cidade da Cultura. Da Gentalha seguimos a pedir a paralisaçom deste Plano e a elaboraçom de um outro que inclua toda a bacia do rio Sar; que estabeleça um programa de recuperaçom biológica, produtiva, hidráulica e patrimonial deste espaço; e com umha Avaliaçom Ambiental Estratégica.

Escrito em 12-11-2010, na categoria: Comissons
Chuza!

Sem comentários ainda

    SEMENTE

      Somos um grupo de compostelanas e compostelanos decididos a fazer activismo cultural na nossa cidade e comarca. A língua e cultura galegas, a vontade de aprender, de difundir e recuperar os nossos costumes, a nossa história, a nossa música... som os nossos eixos de trabalho.

      Documentário Quatro anos de Gentalha já na rede!

      A Gentalha do Pichel Centro Social O Pichel Loja da Gentalha

        AGENDA DE EVENTOS

          Busca

          O blogue do Apalpador

          CMS software