O Entruido na Galiza

O Entruido na Galiza

Origem e significado.

O entruido é o momento de relaxar o gesto, de sorrir, de criticar o nom criticável, de satirizar, da inversom dos valores, de ridicularizar o poder; é o momento dos grandes excessos, tanto no comer, no beber como no ámbito sexual. Etimologicamente, Entruido procede de Introitus-?introduçom?, marcando o carácter de prólogo com respecto á Coresma e, em oposiçom a esta, incide no aproveitamento destas datas para libertar-se das pressons sociais e mudar a ordem estabelecida ante a chegada dum periodo de fortes restriçons e sacrificios, de privaçons e abstinência. Neste contexto desenvolvem-se as teorias que assinalam a origem do entruido (co sentido burlesco e paródico que tem hoje) na Idade Meia, etapa histórica na que se configura em contraposiçom festiva aos rigores que introduz a Coresma cristiá. No entanto, alguns autores assinalam a pervivência de ritos mais antigos de origem pagám que se mantenhem, embora desprovistos do seu significado originário de carácter agrário e fertilizante.

Devido ao seu espírito crítico, em diferentes momentos da história, foi objecto de perseguiçom e submetimento por parte das autoridades. Desde meiados do século XIX, celebra-se na Galiza um entruido urbám paralelo ao rural, introduzido e organizado polas elites económicas e sociais das cidades e vilas,de forte componhente classista, no que prevalecem os criterios estéticos e de obstentaçom; um entruido de casino e de desfile de carrozas sem a base crítica e subversiva do entruido tradicional. Também durante o franquismo foi proibido sob o pretexto de salvaguardar a moral cristiá e impôr um férreo control sob qualquer acto ou celebraçom que puidese molestar ao regime, sobrevivindo de maneira clandestina. É a partir dos anos 80 quando se unificam esforços para revitalizar umha festa tradicional que cumpria umha dupla funçom: como festa, servia para reafirmar os lazos de identidade colectiva; como entruido oferecia-lhe á populaçom mecanismos de evassom ás obrigas cotiás, a posibilidade de questionar o estabelecido, de mudar a personalidade graças ao anonimato que as máscaras proporcionavam e, sobretudo, muito divertimento. No entanto, neste processo de recuperaçom no que mediarom os organismos institucionais, foi-se perdendo o que o entruido tinha de espontáneo, de subversivo, de crítico, de jogo para encadrar-se num programa de festas onde se estabelece um horário para cada acto, onde se elimina case por completo a falcatruada, o ingénio ou o jogo e onde se premia especialmente o valor estético.
É por isso que recuperar umha festa tradicional como o entruido nom é aferrar-se ao passado com a única finalidade de manter umha tradiçom, senom que recuperamos umha tradiçom para fazer hoje umha crítica da sociedade actual usando todos os meios que a própria cultura nos proporciona.

Calendário

O entruido formava parte do ciclo de festividades do inverno quando o tempo era medido em ciclos que guardavam relaçom com o elemento natural o qual determinava a vida cotiá das pessoas. Esta conceiçom do tempo, tradicional ou cíclica, responde a umha conceiçom circular, de permanente repetiçom, onde hoje se mesturam elementos da natureza e dos antigos calendários solar e lunar co calendário litúrxico. O ano dividia-se assim em dous grandes ciclos: o inverno (Defuntos, Natal, Entruido e Coresma) e o verám (desde os maios e Sam Joam até as festas do outono). O entruido subsistiu no calendário como festa lunar que depende do primeiro plenilunio de primavera. Trata-se dumha festa movível e anda com a Páscoa: o Domingo de Entruido é 49 dias antes do da Páscoa de Resurreçom. A duraçom tradicional vem sendo de duas semana e meia, aínda que actualmente já nom se cumpram. Empezam com o domingo fareleiro, passa à quinta feira de compadres, ao domingo corredoiro, à quinta feira de comadres, e ao domingo de Entruido, e já seguido, a segunda e terça feira de entruido de entruido. Na quarta de cinza tem lugar o enterro do meco ou do Entruido.

Domingo fareleiro_ precede em quinze dias ao domingo de entruido e o seu ámbito reduce-se practicamente ao sul de Ourense. Principalmente a mocidade, participa numha luta de farelos (farinha dos porcos) onde o principal objectivo era branquejar toda pessoa que atoparam. Faciam-se acompanhar dos sons musicais próprios destas datas, coma os toques de cornos ou buguinas, de ferranchos, de latas ou potas velhas dando os primeiros anúncios da chegada da festa. Ademais da farinha, nalgumhas zonas usam a borralha ou ferrugem dos potes polo que também se lhe conhece como Domingo borralheiro.

Quinta feira de compadres_ tal data as protagonistas som as raparigas, as quais confeccionam bonecos de palha que levam espetados num pau. Os mozos luitam por lhos quitar e, nessa luita, intervenhem o relom, a borralha e mesmo a água. Trata-se dumha luita simbólica entre homens e mulheres. Quando chega a noite, aqueles bonecos que seguem no poder das mozas som queimados entre berros, aturujos e cantigas. Nalgúns lugares fai-se um boneco grande de palha que lhe chamam o Lardeiro e que acaba do mesmo jeito que os pequenos.

Domingo oleiro_ neste dia celebrava-se o jogo das olas o qual ainda se practica em Ginço da Limia. O jogo consiste em que @s participantes (que podiam ser mixtos, só mulheres ou só homens), colocados em rolda ou em dous bandos, tenhem que passar-se os uns a outros umhas olas de barro que a gente guardava ao longo do ano quando estas se deterioravam. No jogo podiam estar cheias de vinho, farinha, terra ou água e a quem lhe caese e escachase, ademais do inconveniente de se manchar, devia pagar umha prenda, que normalmente era umha rolda de vinho ou dinheiro para umha merenda. Outras manifestaçons deste jogo recolhem-se em Alhariz onde era conhecido com o nome de Domingo Cacheleiro (de cachelas, olas rotas), mas já nom se practica, e em Portugal festeja-se o Jogo da Pucarinha (vasilha pequena) ou Caqueirada. Este nom era um jogo privativo do Entruido e nalgúns lugares celebrava-se o Domingo de Resurreiçom. Em tal data tinha lugar em Compostela um jogo que se chamava vasifrágio e no que intervinham duas ou quatro parelhas de mulheres que botavam entre si as vasilhas velhas a jeito de bolas.

Domingo corredoiro_ é o anterior ao entruido. Dava pé às primeiras brincadeiras, as primeiras máscaras e determinados jogos com farinha, cinça, água e também formigas que apanhavam vivas nos formigueiros e que depois guindavam aos espectadores ou mesmo a outras máscaras. O festejo com formigas mais conhecido na Galiza é aquel que se celebra na vila ourensá de Laça mas há que destacar que neste lugar é na segunda de entruido quando tem lugar. O domingo corredoiro recebe o nome da tradicional corrida do galo, hoje em processo de desapariçom devido á crueldade com a que se tratava o animal. Na corrida do galo pendurava-se um galo dumha corda tendida e os mozos tinham que lhe arrincar a cabeça com a mau ou com um pau. Este animal é um dos símbolos da lujúria exacerbada, do excesso carnal e do insaciável apetito sexual e o seu sacrifício punha fim a um tempo de toleráncia e permisividade. Em terras do Bolo, na parte oriental da provincia de Ourense, conhece-se este dia como Domingo gordo, pois havia costume de entrar nas cozinhas e levar algúns chouriços, ou um anaco de cachucha ou de lacom para formar parte dumha merenda colectiva que se fazia no final com o material roubado.

Quinta feira de comadres_ desenvolve-se do mesmo jeito que o de compadres só que agora som os moços os que andam com bonecas que lhes querem sacar as mozas. Se nom som recuperadas, á noitinha também se queiman. Naqueles lugares onde fam umha soa chamam-lhe Lardeira.

Domingo, segunda e terça de entruido_ som os dias grandes e nom faltam as máscaras e disfrazes, as comparsas e os cortejos. Destaca outro dos aspectos mais relevantes do entruido: a gastronomia. O protagonisto absoluto tem-no o porco e, em particular, a cacheira, o lacom ou o botelo, sempre em grande abundância para soportar melhor a abstinência da Coresma. Também as sobremesas tradicionais ganham presença: filhoas, chulas, orelhas, flores ou vincha (espécie de doze que se faz com leite, ovos, manteiga e pam, que se mete na vincha do porco e se deija curar no caínzo o mesmo que os chouriços. Come-se cozida, mas cozinhada com muito cuidado com o objecto de que nom revente) som alguns dos mais extendidos. Á fim destes dias, na quarta de cinça, começa a Coresma e, com este motivo, cantava-se:
?Adeus martes de entruido,/ adeus meu amiguinho/ até o domingo de Páscoa/ nom comeremos toucinho?.

Domingo de pinhata_ celebra-se já no domingo de Coresma. Trata-se dumha festa moderna de origem urbana na que há de rachar umha pinhata (do italiano ?pignatta?- ola) com um pau e com os olhos tapados.

Enterro do Meco ou Entruido_ com el acava o entruido. Ao longo de todo este periodo eregiu-se como o rei ou rainha da festa , em autoridade da inversom dos valores e da risa, num processo de personificaçom do entruido. No seu enterro, representa-se umha paródia fúnebre (de tradiçom anterior ao conhecido enterro da sardinha) cum carro do entruido, que era o cortejo com o boneco montado num burro ou subido num carro do pais. Representa a sua fim simbólica mas cum carácter dual: por um lado fai-se-lhe responsável de todos os ?males? que se cometeram nestas datas de permisividade e, com a sua queima, liberta-se a populaçom de toda responsabilidade e, por outro, lamenta-se a sua morte como representante dos dias de alegria e desenfreo.

Expressons

Na Galiza existe umha grande diversidade expressiva própria do entruido. Ginço, Laça e Verim som quizais as mais conhecidas, junto com Viana do Bolo, Vilarinho de Conso ou os Generais da Ulha. No entanto, por toda a geografía galega se extende o espírito do entruido. Dalgumhas manifestaçons nom queda mais que a sua constáncia a través de recolhidas e estudos etnográficos ou da memória colectiva daquelas pessoas que as vivirom nalgum tempo; outras oponhem maior resistência a desaparecerem bem porque a dinamizaçom turística neste caso as mantém como atractivo (mas incorporando traços próprios do entruido urbano), bem porque o issolamento de certos núcleos poboacionais as ajuda a conservar. Certamente, o paso do tempo deixou a sua pegada e devemos ter em conta que o entruido foi mudando, incorporando novidades e transformando o modelo inicial, o que dificulta o seu estudo e reconhecimento.
Por contra, há certos elementos que se repetem em diferentes manifestaçons, tanto na Galiza como em muitas zonas de Europa, cumha significaçom simbólica semelhante em muitos casos, ainda que expressadas de jeitos diversos: a festa da convivência, as cheias, o humor sem censuras; a música, o baile, o canto, a bebida; a presença de disfrazes de personagens ?feias?, a tradiçom das visitas em diferentes pontos da geografía galega.

O entruido é um mundo amplo, diverso, complexo, e com muito atractivo; a seguinte exposiçom das diferentes formas de expressom na Galiza pretende dar a conhecer algumhas das suas características, espertar o interese pola tradiçom e animar-vos a desfruta-lo como melhor se pode: vivindo-o.

Os Generais da Ulha.

Estas personagens situam-se no val do Ulha, onde se festeja o entruido cumha mascarada composta de gente vestida com trajes de corte militar. A comitiva está composta por: correio, general, coro principal e velhos, seguidos de comparsas e disfrazados das mais variadas maneiras. O correio, também chamado lanceiro, vai diante da comitiva para anunciar a chegada do pequeno exército parroquial que vem detrás, ao mando dos generais. Viajam de a cabalo que também se engalanam com o motivo do entruido. Por trás colocam-se o coro principal e os velhos, composto polos adultos da paróquia ou aldeia principal que forma a comparsa e que gostam de cantar cantigas satíricas e picarescas, e os disfrazados por livre onde abundam os disfrazes de oficios. Nalgumhas aldeias é também tradicional a presença dum velho dos cornos, resto de máscara ancestral coa cara cuberta por umha máscara de lá, roupas farragentas e um rudimentário bodente na mao (um pau cuns cornos de vaca). A este grupo heterogéneo de disfrazados chama-se-lhe comunmente a parranda. O proceder desta parranda segue os seguintes passos: o objectivo da comparsa liderada polos generais é visitar todas as casas dos vizinhos para os agasalhar, reafirmar a unidade da paróquia e obter umha contribuçom económica para o desenvolvimento da festa. Assim, bem desde o centro da praça, bem indo de casa em casa, a comitiva detém-se e o general, de pé sobre os estribos, pronuncia umha frase ritual ao que todos respondem cum viva!. Som os altos. O mais chamativo deste entruido som o que se conhecem como atranques ou enfrontamentos: um choque pura e intensamente verbal e rimado. A regueifa é seguida polo público que sublinha com ovaçom as melhores ocorrências. Abordam-se temas variados da vida local, da política local ou nacional ou feitos históricos, sempre com muita ironia e fazendo umha paródia do militarismo mais essagerado. Afinal, depois da dureza dialéctica, chegara-se a um amanho pacífico que acaba com vivas á paz e á uniom entre paróquias.

Laça

Sita na comarca de Monte Rei, em Laça conserva-se um dos entruidos que, sendo dos mais conhecidos, mantem muitos aspectos tradicionais. As figuras mais representativas deste lugar som: o peliqueiro (que recibe o nome da pelica ou pel seca dum animal com a que se confecciona a parte posterior da careta)a Morena (que é a representaçom dumha vaca feita com careta de madeira e os cornos próprios do animal) que arremete contra a gente, especialmente contra as mulheres com saia que tenta levantar com os cornos; os moços e moças que a escoltam levam farinha e formigas excitadas para botar-lhas aos participantes e a lectura do testamento do burro a cargo dumha pessoa do lugar que repassa os aconteceres da vila desde o entruido anterior e somete a burlas aos vizinhos que as protagonizarom.

Verim

Também situada na comarca de Monte Rei, em Verim compartilhando cenário com o entruido urbano caracterizado polos desfiles e as comparsas, tem como protagonista das festas umha figura tradicional, o cigarrón que coincide co peliqueiro na apariencia e actitude.

Maceda

Em Maceda, na comarca de Arnoia, há umha figura semelhante aos peliqueiros e cigarrons ainda que menos estilizada: chama-se felo, e so vistem os moços solteiros do lugar.

Entre estas máscaras de Ourense há certas características comuns que se repetem, podendo resumir-se do seguinte jeito: por um lado, todas elas som intocáveis; podem ser insultadas mas nom podem tocar-se nim se pode desvelar o seu nome; tam só podem descubrir o seu rosto em lugares fechados; exercem de guardians do entruido, atacando preferentemente aquelas pessoas que nom vam disfrazadas; quando visitam umha casa, o anfitriom deve oferecer-lhes vinho e bica e, se agarram na rua, há a obriga de convidar a umha ronda no bar.

Ginço da Limia

Geograficamente, ubicamo-la na comarca da Límia. A máscara própria desta zona é a Pantalha, umha máscara considerada de porte elegante que arma grande estrondo com a música das campaínhas e cascabeis que colgam do seu traje acompanhado do incesante bater das vexigas entre si, umha contra a outra. A presenza das vexigas foi muito mais frequente tempos atrás nos entruidos galegos mas agora já só se conservam em Ginço. Também é de destacar a careta desta figura pois está toda ela feita dumha soa peça, confeccionada artesanalmente.
Viana do Bolo e Vilarinho de Conso
Comarca de Viana. Som característicos os boteiros, máscaras que lhe abrem passo ao foliom, dançando, bailando e dando choutos ao compás da música.
Em Viana do Bolo também é tradicional a presenza na rúa dumha mula couceadora. O animal adica-se a perseguir a juventude que acurralam e a dar couces a todos quantos agarra e pode. Umhas vezes a mula buscava senhores acaudalados da vila para dirigi-los á taberna mais próxima e que convidasem a umha ronda. Outras vezes a mula deixava-se caer ao cham e era preciso reconforta-la com chouriços ou com sopa borracha (vinho, sucre e pam de trigo).

Bande
Comarca da Baixa Límia. Desta vila som originais os troteiros, personagens desaparecidas alá polos anos 50 mas que na actualidade estam sendo recuperados. Como detalhe interessante, destacar que no lugar de levar umha careta ou máscara, cubriam o rosto com um tapete de mesa que lhe permitia facilidade para ver mas nom para ser reconhecido. Outra curiosidade desta máscara é o seu chapeu: levava postais de ?temas amorosos?: parelhas de namorados, corazons ou calquera outra alussom á relaçons de parelha.

Chantada
Comarca de Chantada. Próprio desta zona som os volantes, destacados polo seu pucho que chega a acadar um metro de alto e vários quilos de peso. Este pucho consiste numha estrutura de arame e vimbio revestida com fitas e flores de papel de todas as cores.
Manzaneda
Comarca de Terra de Trives. O protagonismo aqui é dos folións: embaixadas músico-carnavalescas que se enviam reciprocamente as paróquias a outras durante o tempo de entruido, dentro da mais xenuina tradiçom de afirmaçom da identidade colectiva. Este folióm integra-no bombos, cornas (substitutos de metal no que num tempo foram cornos de vaca) e instrumentos feitos de apeiros de labranza: sachos, gadanha, aixada? acompanhados de máscaras que dançavam nos lugares que lhe indicava o director.

Cobres (Vila boa)
Na comarca do Morraço temos as madamas e os galáns, personagens todas vestidas de branco engalanadas com multidom de abalorios e outros adereços. A força deste disfraze reside no sombreiro, de palha alto ao que lhe cosem um grande número de flores naturais ou artificiais, plumas, colgantes, espelhos e algumha pequena boneca, polo que pode chegar a pesar de 3 a 4 quilos. Visitavam as casas dos vizinhos e ali dançavam para recadar dinheiro para a festa.
A Fonsagrada e os Ancares
Nesta zona conserva-se um interessante rito agrário, o rito de correr a rela. A terça pola noite ou o mércores de Cinça de madrugada, os vizinhos davam voltas ao redor das fincas com fachas acessas, com o obxectivo de preservar as plantaçons da rela, misterioso animal ou espírito que danava o pam.
Outro rito relacionado com a fertilidade realizado pola gente moça consistia em subir a um monte próximo com duas cestas de labores cheias de palhas. Umha vez ali, unia-nas de tal jeito que formasem umha só e prendiam-lhe lume lançando-a monte para baixo procurando boas colheitas á vizinhanza.

Salcedo
Comarca de Terra de Lemos. Osos, galos, vacas, bois, mulas e outros animais das mascaradas rurais eram representantes das almas dos mortos, personificaçons do espírito da vegetaçom, personificaçons do próprio entruido e signos do cambio da estaçom inverno-primavera. Em Salcedo, umha pessoa disfrazada de oso mancha as pessoas atrapadas polos seus criados com borralha.

As mascaradas rurais
Tradicionalmente, as máscaras do entruido podiam sair já desde o aninovo mas na actualidade, ainda que há sitios onde se conserva este calendário, o habitual é reduzi-lo as datas sinaladas com anterioridade. No final, fazia-se um meco ou entruido, que se ponhia num sitio destacado durante todo o dia para ser enterrado ou queimado.
Os vizinhos disfrazavam-se com roupas velhas e esfarrapadas e tapavam a cara com caretas artesanais de carbom, com antefazes ou com emborralhamentos de cinça, ferruje dos potes e tinta, recibindo diferentes nomes: merdeiros, choqueiros, marafois, zarampallos, farricoques,? Definitórios deste entruido eram:
-o bo comer: aproveitando a proximidade da matanza; bo beber e música de gaiteiros ou bem bombos, latas e aveiros de labranza.
-embromar os vizinhos: mudar os carros de sitio, nenos provistos de latas e cornos para fazer barulho?
-emporcalhamento com farinha, cinça ou borralha
-roubar comida
-corrida do galo
-comitivas de entruido para visitar as aldeias vizinhas e festejar festas de confraternizaçom
-leitura de sermons sarcásticos, com muita ironia
-presenza de chocas e cencerros que imponhiam a lei do entruido
-os disfrazes mais socorridos eram: velhos, animais ou oficios
OU O QUE TU QUEIRAS, QUE É TEMPO DE ENTRUIDO!!!!

Escrito em 01-02-2008, na categoria: Comissons
Chuza!

2 comentários

Comentário de: duarte [Visitante]  
duarte

Quremos as fotos da festa do entrudo no Pichellllll!!!

04-02-2008 @ 16:34
Comentário de: oleiros70 [Visitante]
oleiros70

Muitos parabéns… por isto, polo tríptico dos petróglifos… por todo o vosso labor.
http://www.youtube.com/watch?v=yB7r1ox0bUQ
Saúde

05-02-2013 @ 05:18

    SEMENTE

      Somos um grupo de compostelanas e compostelanos decididos a fazer activismo cultural na nossa cidade e comarca. A língua e cultura galegas, a vontade de aprender, de difundir e recuperar os nossos costumes, a nossa história, a nossa música... som os nossos eixos de trabalho.

      Documentário Quatro anos de Gentalha já na rede!

      A Gentalha do Pichel Centro Social O Pichel Loja da Gentalha

        AGENDA DE EVENTOS

          Busca

          O blogue do Apalpador

          multiple blogs