Adriam Argibai, em representaçom da Assembleia Aberta do Centro Social Henriqueta Outeiro, participou em representaçom da nosso Centro Social no acto de encerramento da IV Assembleia Nacional de NÓS-Unidade Popular decorrida no passado sábado 1 de Dezembro no Concelho de Teio, Comarca de Compostela.

Junto ao Henriqueta Outeiro, no acto de encerramento intervinhérom representantes de outras entidades culturais e Centros Sociais do País: a Baiuca Vermelha de Ponte Areias, A Revira de Ponte Vedra, A Gentalha do Pichel de Compostela, Fundaçom Artábria de Trasancos, Roi Soga de Noia e Gomes Gaioso da Corunha.

Reproduzimos integramente as palavras do nosso representante:

Caras companheiras e companheiros:
Parabens e muito obrigado polo convite a esta IV Assembleia Nacional em nome da Assembleia Aberta do Centro Social Henriqueta Outeiro.

Em primeiro lugar queremos transmitir o nosso agradecimento e reconhecimento a NÓS-Unidade Popular pola sua aposta na criaçom de Centros Sociais da nossa corrente na nova esquerda independentista.

Umha aposta por Centros Sociais concebidos com umha mentalidade aberta e plural, dando lugar também a diferentes modelos, e estando este projecto muito longe de qualquer ideia patrimonialista, e com o ambicioso objetivo de criar toda umha rede de Centros Sociais no nosso País.
Som umha peça chave à hora de ter um espaço fisico e social onde poder realizar um redescubrimento da nossa cultura e história, na tomada de consciência, na denúncia social, no carácter combativo da nossa classe operária contra o Estado opressor e o sistema capitalista, difundindo o projecto do Movimento de Libertaçom Nacional Social e de Gênero nas nossas respectivas comarcas, compactando assim umha massa social das pessoas mais conscientes e luitadoras do nosso contorno.

Além disto os Centros Sociais som um espaço dinamizado pola actividade que as diferentes organizaçons da esquerda independentista realizam neles, permitindo assim a organizaçom de palestras, discussons, debates, seminários, o qual contribui na melhora da formaçom e no incremento dos conhecimentos teóricos, que junto com os conhecimentos práticos som peças chave para a realizaçom da Revoluçom.

Também destacar o carácter humano dos Centros Sociais que permitem a convivência dos militantes, permitindo assim a confraternizaçom entre camaradas.

Já por último destacar e agradecer o esforço e trabalho diário dos e das militantes que fam possivel a continuidade do projecto.

Saúde e Revoluçom!