Benqueridos todos/as;
Lembramos-vos que, dentro das Palestras públicas do último trimestre de 2023, o vindeiro dia 21 de novembro o profesor e escritor galego Alberte Blanco Casal impartirá unha palestra baseada no seu ensaio ?Xeopolítica, Pandemia e Pos-capitalismo?.
Data: 21 de novembro, martes
Hora: ás 8 do serán
Lugar: Portas Ártabras - Rúa Sinagoga 22 baixo. Cidade Vella - A Coruña
PARA ESCOITAR, CLIQUE DE SEGUIDO: https://archive.org/download/blanco-casal/BLANCO-CASAL.mp3

Alberte Blanco Casal (Vilaboa-Pontevedra, 1951), é enxeñeiro industrial e foi profesor e director do IES de Verín até 2005. Membro do Consello Nacional do BNG, foi concelleiro en Verín desde 1991 ata 2005 e director xeral de Montes da consellaría do Medio Rural da Xunta de Galicia desde 2005 até 2009.
Conta cunha ampla actividade cultural, sendo fundador da A.C. Monterrei, da súa revista A Tempo e do colectivo de animación cultural Foro Monterrei. Colabora nos diarios dixitais Sermos Galiza, Praza Pública, Terra e Tempo e na revista do Fórum Galaico Transmontano editada en Chaves. Tamén publica unha colaboración semanal en Nós Diario. Prolífico escritor, participou en obras colectivas como Os incendios forestais en Galicia (2006), O monte galego. Caos ou aproveitamento multifuncional? (2017) e Diario de José Casal (2023). É autor das novelas Arcadia. Os gardiáns do segredo (2013), Telumbres de lúa (2014) e o Códice esmeralda (2017). Entre as obras de ensaio se sinalan O conflito de intereses no camiño de ferro de Zamora a Ourense: aproximación histórica ao periodo, 1840-1930 (2015), Memorias da brétema (2019) e a obra sobre a que versará a sua palestra: Xeopolítica, pandemia e poscapitalismo (2021).
Preocupado pola análise dos vellos (e novos) paradigmas do librecambismo e a sua validez para resolver os problemas e retos do mundo actual, o autor sinala a reflexión coma a virtude indispensábel para intentar comprender a clave do arcano sen deixarnos confundir polos ouropeis da modernidade e as luces de cores do politicamente correcto. Por desgraza, e cada vez máis, resulta difícil distinguir entre a opinión propiamente científica, honesta e obxectiva daquela outra fabricada por quen está ao servizo das grandes corporacións bancarias ou empresariais, con intereses, case sempre, non concordantes cos da maioría social. En definitiva, intentaremos enfocar a crise do mundo actual dende unha óptica diferente, achegando datos e opinións que invitan á reflexión crítica e á dúbida intelixente sobre o que nos rodea, deixando en mans dos asistentes a diagnose final.
Agrupación Cultural O Facho. CIF G-15037021
Apartado de Correos nº 46 O.P. A Coruña

Comunicámosvos que, dentro das Palestras públicas do último trimestre de 2023, o vindeiro dia 14 de novembro a bióloga, activista e escritora galega Adela Figueroa Panisse falará sobre Literatura e educación ambiental e presentará o libro ?Gotas: o ciclo da àgua explicado para crianças?, premio de teatro O?Facho 2018.
Data: 14 de novembro, martes
Hora: ás 8 do serán
Lugar: Portas Ártabras - Rúa Sinagoga 22 baixo. Cidade Vella - A Coruña
PARA ESCOITAR, CLIQUE DE SEGUIDO:
https://archive.org/download/adela-figueroa-mp-3cut-mp-3cut.net/Adela%20Figueroa%20%28mp3cut%20%28mp3cut.net%29.mp3
Adela Figueroa Panisse (Lugo 1948) é xubilada do ensino na cátedra de Bioloxía-Xeoloxía no IES Lucus Augusti. Bióloga, escritora e activista. Loitadora pola Terra cun fondo compromiso ambiental, cultural e social.
Foi fundadora e presidenta de ADEGA e participou na fundación da Asociación Socio-Pedagóxica Galega e da revista O Ensino, da que foi directora.
Ten colaboracións con diferentes publicacións entre outras : Cerna, ENCIGA, Agália, Portal Galego da Língua e en xornais: El Progreso, La Voz de Galicia, Praza Pública e Nós Diario.
Ten unha abundante obra en poesía, narrativa, ensaio e literatura infantil e xuvenil. Entre outros premios acadou o de Teatro Infantil O Facho no 2018
Adela nos falará sobre Literatura e educación ambiental e nos presentará a obra gañadora do premio Teatro Infantil O Facho. Gotas: o ciclo da áuga explicado para crianças que tal como ela reseña:
A água é o elemento principal da vida sobre a Terra.
Esta obra trata de ensinar brincando mediante a representaçao teatral. Algo de importáncia fulcral no Planeta , nomeadamente nos momentos atuais de crise ambiental global. Queremos deixar ás nossas crianças um mundo em que possam viver polo menos como nós.
O teatro é um instrumento maravilhoso para fazer vivenciar a importáncia da água e seu ciclo da natureza.Fazer isto de jeito divertido, participativo através dos cantos e da representaçao, parece de grande interesse. A obra está concebida para que todas as crianças possam participar pois o número de atores e atrizes pode ser táo grande como se quiser. Deixamos a mestres/as e afeiçoados ao teatro que marquem eles o número de participantes. Ninguém fica excluído.O fato de ser uma obra bilingue Portugués Castelhano ainda incrementa seu valor educativo.

Atentamente,
Agrupación Cultural O Facho. CIF G-15037021
Apartado de Correos nº 46 O.P. A Coruña

Damos conta do inicio do ciclo de palestras do outono 2023, retomando a programación prevista para este ano. O vindeiro dia 10 de outubro o profesor e
escritor Ramón Nicolás Rodríguez falará sobre:

Del Riego: unha vida, unha época

Para escoitar, clique de seguido: https://archive.org/download/ramon-nicolas-mp-3cut.net/RAMON-NICOLAS%20%28mp3cut.net%29.mp3

Data: 10 de outubro, martes
Hora: ás 8 do serán
Lugar: Portas Ártabras - Rúa Sinagoga 22 baixo. Cidade Vella - A Coruña

Ramón Nicolás Rodríguez exerce a docencia no IES Castelao (O Calvario-Vigo). Realiza crítica literaria desde o ano 1990 en diversas revistas e publicacións e, desde hai anos, no suplemento ?Fugas? de La Voz de Galicia. Mantén, desde 2010, o "Caderno da crítica. Literatura galega": un dos blogs literarios máis veteranos e activos de Galicia.
Desde o ano 2021 é membro correspondente da Real Academia Galega. En 2011 ingresou como padroeiro na Fundación Celso Emilio Ferreiro e dirixe a colección Biblioteca das Letras Galegas de Edicións Xerais de Galicia. É tamén ensaísta e tradutor e pertence á Asociación de Escritoras e Escritores en Lingua Galega, á Asociación Española de Críticos Literarios e á Asociación Galega da Crítica. Recibiu diversos galardóns como o Premio Antón Losada Diéguez de ensaio no 2013, por Onde o mundo se chama Celso Emilio Ferreiro (2012). Publicou dúas novelas - O espello no mundo (2016) e Lapis na noite (2018)- e asinou diversas traducións e ensaios, ademais de editar e estudar a obra de autores como Manuel Luís Acuña, Manuel Lueiro Rey, Álvaro Cunqueiro, Ramón Cabanillas, Lugrís Freire, Xesús Alonso Montero, Francisco Fernández del Riego ou Celso Emilio Ferreiro.
A palestra que impartirá leva por título ?Del Riego: unha vida, unha época? e centrarase na súa monografía divulgativa Francisco Fernández del Riego. Vida e obra dun obreiro do galeguismo (Xerais, 2022) na que sintetiza o perfil biográfico do escritor de Vilanova de Lourenzá e realiza un achegamento
á súa oceánica obra literaria.

Agrupación Cultural O Facho

A Agrupación Cultural O Facho da Coruña convídate a asistir aos seus ciclos de palestras públicas do segundo trimestre de 2023.

O vindeiro mércores 19 de abril o dramaturgo e actor Manuel Lourenzo falará sobre a figura do seu compañeiro e amigo Francisco Pillado Mayor na palestra-homenaxe á súa figura que leva por título:

Pancho Pillado na lembranza: unha vida dedicada ao teatro.

PARA ESCOITAR, CLIQUE DE SEGUIDO:

https://archive.org/download/Lourenzo/Lourenzo.mp3

Manuel Lourenzo crea na cidade da Coruña xunto a Francisco Pillado o Grupo de Teatro O Facho, que supón o inicio do Teatro Independente Galego.
En 1967 funda o Grupo Teatro Circo, un fito dentro da Historia do Teatro Galego. En 1978 constituíu con Francisco Pillado a Escola Dramática Galega, e
co-dirixe co autor, motivo da homenaxe de hoxe, os Cadernos da Escola Dramática Galega. En 1979 publica, igualmente en co-autoría con Pillado Mayor, o monográfico O Teatro Galego, libro pioneiro e aínda hoxe de referencia dentro do ámbito do estudo da dramaturxia.
Por outra parte, en 1980 forma a Compañía Teatral Luís Seoane, en 1981 recibe con Pillado un premio outorgado pola Aula de Teatro da USC. Tamén en
1981, e xunto a Francisco Pillado, funda a editorial Castrodouro. No ano 1998 xunto con Santiago Fernández crea a escola teatral Casahamlet.
Manuel Lourenzo ten unha longa traxectoria como actor sobre as táboas e tamén ten participado en diferentes series de televisión (Fariña, Mareas Vivas,
Matalobos, As Leis de Celavella...) e tamén no cinema (Entre Bateas).
Como autor teatral ten unha importante achega ao teatro galego que acaba de ser publicada na súa totalidade en sete volumes.Obtivo numerosos premios e galardóns. No ano 2018 recibiu O Facho de Ouro como mostra de recoñecemento a toda unha vida dedicada á cultura do País e ao pobo galego.
Pancho Pillado e Manolo Lourenzo veñen a simbolizar a recuperación do Teatro Galego nos anos da longa noite de pedra.

Agrupación Cultural O Facho

Full story »

A Agrupación Cultural O Facho da Coruña convidate a asistir aos seus ciclos de palestras públicas do primeiro trimestre de 2023.

O dia 28 de marzo o historiador Anselmo López Carreira falará, dentro do ciclo ?Terra e Futuro? sobre: ?O REINO MEDIEVAL DE GALIZA ?.

Data: 28 de marzo, martes
Hora: ás 8 do serán
Lugar: Portas Ártabras - Rúa Sinagoga 22 baixo. Cidade Vella - A Coruña

PARA ESCOITAR, CLIQUE DE SEGUIDO: https://archive.org/download/anselmo_202304/Anselmo.mp3

Anselmo López Carreira naceu en Vigo en 1951, vivindo en Ourense desde a nenez e sendo, como el mesmo indica ?moi ourensán, sen por iso deixar de ser doutros lugares?. Licenciouse en Xeografía e Historia na Universidade de Santiago de Compostela e doutorouse na mesma universidade cun traballo sobre a cidade de Ourense no século XV. Foi Catedrático de Historia no ensino secundario, profesor titor da UNED no Centro Asociado de Ourense e doutor vinculado do Instituto de Estudos Galegos Padre Sarmiento É un investigador recoñecido da Galiza urbana medieval e das súas dinámicas
sociais e políticas. Xunto cos ensaios históricos, na súa obra acada tamén presenza a edición de fontes documentais, en particular as relacionadas coa cidade de Ourense. No seu traballo predomina o esforzo de renovación historiográfica destinado a presentar un enfoque da nosa Historia observada desde nós mesmos,libre das manipulacións impostas polas directrices dominantes estatais.
Os seus campos de investigación, sempre sobre a Galicia medieval, centráronse na edición de fontes documentais, o mundo urbano e o reino medieval, con publicacións como Documentos do arquivo da catedral de Ourense. 1289-1399 (2016), ?Caderno de actas de Santa María do Campo da Coruña, 1372-1417? (2017), Ourense no século XV (tese de doutoramento, 1998), A cidade medieval galega (1999), O reino medieval de Galicia (2005), con X. M. Andrade O Reino medieval de Galicia. Crónica dunha desmemoria (2020) e con H. Picallo Galicia.Reis e Reino (2021).

Nos últimos tempos os seus traballos entran, ademais, na historia política, na que aborda os vellos temas desde novas perspectivas. Moi relevante é, así mesmo, a súa vocación divulgadora, que se concreta non só na súa participación en charlas e coloquios organizados polas máis diversas entidades do país, senón tamén nun nutrido número de achegas que abren as portas da nosa historia ao público xeral.
Ademais de numerosos artigos e relatorios en revistas, cursos e congresos, e colaboración en programas divulgativos da radio e televisión galegas, coordinou cursos universitarios da UNED e da Universidade de Vigo, e os Io e IIo Simposio de Historia en Terra de Lemos (Monforte de Lemos, 2007 e 2008), comisariou a exposición Da Terra de Lemos ao Reino de Galicia, inaugurada en Ourense en febreiro de 2009. O pasado ano 2022 dirixiu en Compostela un congreso internacional sobre o Reino Medieval.

Agrupación Cultural O Facho

A Agrupación Cultural O Facho da Coruña convídao a asistir aos seus ciclos de palestras públicas do primeiro trimestre de 2023.

O dia 14 de marzo a autora teatral Carme Varela falará, dentro do ciclo ?Terra e Futuro? sobre a obra: ?DESTERRADAS. A PELEXA DAS MONXAS BIEITAS GALEGAS NO XVI ?.
Data: 14 de marzo, martes
Hora: ás 8 do serán
Lugar: Portas Ártabras - Rúa Sinagoga 22 baixo. Cidade Vella - A Coruña

PARA ESCOITAR, CLIQUE DE SEGUIDO: https://archive.org/download/carme-varela/Carme-Varela.mp3

Carme Varela (Duomes, A Baña, 1970) é Licenciada en Filoloxía galega, completando a sua formación cun máster en xestión cultural na Universidade de
Barcelona. A sua conexión co teatro comezou na época de estudante no grupo universitario EIS e na compañía Os Quinquilláns. Rematada a carreira, compaxinou traballos na Fundación Castelao como Secretaria Técnica con outros no campo da produción e distribución teatral coas compañías Ollomoltranvía e Mofa e Befa. Tamén traballou na empresa de servizos técnicos teatrais RTA. Foi Directora de Produción no Centro Dramático Galego e dende o ano 2007 a sua vida laboral estivo ligada á empresa de comunicación Atlantis Multimedia onde participou en proxectos de publicidade e na
produción de películas documentais como A Palabra Xusta dirixida por Miguel Piñeiro.

A sua obra ?As desterradas?, premiada no XXV Premio Álvaro Cunqueiro e Premio Follas novas 2021, foi o seu primeiro texto teatral e foi creado como unha actividade para desenvolver no seo da asociación de patrimonio medieval O Sorriso de Daniel da que é secretaria e que axudou a fundar en 2010. No ano 2022 recibíu o premio Selic concedido polo Concello de Santiago de Compostela polo texto teatral ?Faise o escuro?, aínda non estreado.

Na obra ?As desterradas? Carme Varela relata unha loita histórica en chave de muller onde as protagonistas son as monxas bieitas. Os mosteiros medievais
galegos marcaron a vida do país durante longos séculos, pero unha reforma iniciada polos Reis Católicos veu poñer fin a aqueles días. As monxas bieitas galegas enfrontáronse a tres Papas diferentes e dúas raíñas para conservar o poder que tiñan. Un episodio da nosa historia poucas veces relatado e nunca cuestionado.
Quince mosteiros coas súas abadesas foron protagonistas dun gran confllito no que se mesturaba a relixión e a política. Da man da súa autora achegarémonos a esta páxina esquecida da nosa historia e recuperaremos os nomes dunhas mulleres ás que a historiagrafía oficial virou as costas.

Agrupación Cultural O Facho

A Agrupación Cultural O Facho da Coruña convida a vostede a asistir aos seus ciclos de palestras públicas do primeiro trimestre de 2023.

O dia 7 de marzo a profesora e numeraria da Real Academia Galega María López Sández falará, dentro do ciclo ?Terra e Futuro? sobre: ?Terra, paisaxe e mundo rural na tradición literaria galega?.
Data: 7 de marzo, martes
Hora: ás 8 do serán
Lugar: Portas Ártabras - Rúa Sinagoga 22 baixo. Cidade Vella - A Coruña
PARA ESCOITAR, CLIQUE DE SEGUIDO: https://archive.org/download/lopez-sandez/LopezSandez.mp3

Continuando o ciclo de palestras sobre terra e futuro da Agrupación Cultural O Facho, a profesora María López Sández abordará na súa charla un dos temas recorrentes da nosa tradición literaria, terra, paisaxe e mundo rural.
Baixo a etiqueta de paisaxismo, ruralismo ou simplemente temática telúrica ou da terra, moitos dos nosos escritores e escritoras reflicten nas súas obras á nai terra, Galicia, un espazo simbólico e mítico en ocasións, mais tamén de tradicións e traballo, onde o animismo se percibe como esencia da comuñón do
home coa súa contorna. Fauna e flora, lingua e tradición, realidade histórica e imaxinismo están presentes en autores como Rosalía de Castro, Eduardo
Pondal, Ramón Otero Pedrayo ou Xosé Luís Méndez Ferrín, entre outros, conformando unha idea de nación que moitas das nosas autoras actuais
reivindican coa denominación de MATRIA.

María López Sández (Lugo, 1973) é catedrática en excedencia de ensino secundario e profesora na área de Didáctica da Lingua e a Literatura
na Facultade de Ciencias da Educación da Universidade de Santiago de Compostela. Na súa traxectoria académica, foi galardoada co Premio Fin
de Carreira da Comunidade Autónoma de Galicia e o II Premio Nacional de Terminación de Estudios Universitarios de Filoloxía. É doutora en
Teoría da Literatura e Literatura Comparada pola Universidade de Santiago de Compostela. No ano 2007 obtivo o Premio Ramón Piñeiro de Ensaio
pola obra Paisaxe e nación. A creación discursiva do territorio, publicada en 2008 pola editorial Galaxia. No mesmo xénero ensaístico
escribiu Movendo os marcos do patriarcado. O pensamento feminista de Emilia Pardo Bazán xunto a Marilar Aleixandre; Illados. Diario da
pandemia (2020) , xunto co fotoxornalista Miguel Muñiz e Nasín cando as prantas nasen. Herbario de Rosalía de Castro (2022), con Ma Isabel Fraga
Vila e Miguel Fraga Vila.
No campo da narrativa obtivo o Premio Repsol de Narrativa breve pola novela A forma das nubes (2012) e foi finalista do Premio Novela por
Entregas da Voz de Galicia en 2014 con O faro escuro (2015), así como do Raíña Lupa con A noite da deusa (2020).
O seu campo de investigación céntrase especialmente na natureza na literatura, a obra de Rosalía de Castro, o uso das Humanidades Dixitais e os
Sistemas de Información Xeográfica para a xeración de mapas literarios, cun foco posto na dimensión sociolingüística e literaria con atención ao seu
tratamento educativo.
O 9 de xullo de 2022 foi escollida Académica Electa de Número pola Real Academia Galega.

Agrupación Cultural O Facho
CIF G-15037021
Apartado de Correos no 46 O.P. A Coruña

A Agrupación Cultural O? Facho de A Coruña o convida a asistir aos seus ciclos de palestras públicas do primeiro trimestre de 2023.
O dia 7 de febreiro o museólogo, arqueólogo e escritor Felipe-Senén López Gómez falará, dentro do ciclo ?Terra e Futuro? sobre ?Entroido en Galiza: tradicións e máscaras?.
Data e hora: martes, 7 de febreiro de 2023 ás 8 do serán
Lugar: Portas Ártabras - Rúa Sinagoga 22 baixo. Cidade Vella - A Coruña

Felipe Senén, natural do Carballiño (Ourense), realiza os seus primeiros estudos no Instituto de Ourense, onde se vincula como colaborador do Museo Arqueolóxico, entón dirixido por Ferro Couselo, sumándose ás actividades da agrupación cultural Auriense.
Estuda Filosofía e Letras, especialidade de Historia da Arte, na Universidade de Santiago de Compostela, a un tempo que realiza prácticas de museoloxía e arqueoloxía co historiador Manuel Chamoso Lamas na creación, instalación e posta en funcionamento do Museo das Peregrinacións, e do Museo do Ribeiro e participando igualmente como supervisor de campo en diversas prospeccións arqueolóxicas.
Entre os anos 1975 e 1996 foi director-conservador do Museo Arqueolóxico da Coruña. Preocupado por abrir a institución do museo ao gran público e ás cuestións socioculturais da cidade da Coruña e de Galicia, crea o colectivo de colaboradores Amigos do Museo Arqueolóxico, que foi a base para a formación do colectivo Amigos dos Museos de Galicia , creando un espazo de cultura propio e vida cultural ininterrumpida en ?Portas Ártabras? na Cidade Vella coruñesa. Crea e dirixe desde o museo coruñés o Boletín Brigantium e outras publicacións a un tempo que coordina traballos de prospección arqueolóxica submarina co Grupo de Investigación e rescate Arqueolóxico Subacuático na baía da Coruña e outras áreas da costa da provincia, intervindo en aspectos relativos á sensibilización sobre o patrimonio mergullado. Desde o Museo Arqueolóxico coruñés inicia igualmente o traballo de supervisión e posta en valor do Castro de Elviña, promovendo de 1978 a 1985 a consolidación e limpeza da área escavada a finais dos anos corenta por Luengo Martínez.
Membro do Instituto Pai Sarmiento de Estudos Galegos, en 1987 é nomeado académico numerario da Real Academia Galega de Belas Artes da Nosa Señora do Rosario, na que ingresa cun discurso sobre A auga e as fontes en Galicia. Membro numerario e secretario do Instituto José Cornide de Estudos Coruñeses, foi recibido cunha disertación sobre Cuestións Arqueolóxicas e Museolóxicas: revisión dende o Museo Arqueolóxico da Coruña (1994).
En 1996 solicita a excedencia no Museo Arqueolóxico da Coruña, e ingresa na Deputación Provincial da Coruña, como Técnico de Xestión Cultural, inspirando e coordinando plans de dinamización cultural,museoloxía e recuperación do patrimonio cultural moble, inmoble e ideolóxico, así como a posta en valor dos ecomuseos.
Exerce un importante labor na dinamización cultural galega: entre outras actividades foi fundador da asociación cultural Avantar do Carballiño, de Alexandre Bóveda, do semanario A Nosa Terra e da revista de pedagoxía O Ensino, nas que colabora con artigos de divulgación e sensibilización sobre o patrimonio cultural de Galicia.
Pola sua actividade creadora e animadora a prol dos museos así como pola posta en valor do patrimonio etnográfico e arqueolóxico recibiu en 1994 o Premio Otero Pedrayo, seguido por outros galardóns, entre eles o ser nomeado en diferentes ocasións ?Coruñés do ano? así como ?Chairego de honra? (2010, Irmandade Manuel María, Vilalba), ?Navalla de Manuel María? (2014, Irmandade Manuel María, Outeiro de Rei), ?Bo e Xeneroso? (2014, Fundación Eduardo Pondal, Ponteceso) e ?Medalla do Filandón do Courel? (2017).
Preocupado pola linguaxe simbólica na tradición galega, Felipe Senén é un prolífico e polifacético autor con obra diversa que vai desde a divulgación ao ensaio, participando en múltiples publicacións, artigos en medios de comunicación de Galicia, folletos, guías e programas de radio e TV.
É autor tamén de varios libros, especialmente sobre cuestións relacionadas coa identidade cultural e vinculados á investigación arqueolóxica ou histórica galega, entre os que podemos citar Museos da Coruña (Everest, León 1989); Artesanía de Galicia (Silex, Madrid 1981); Ferro Couselo (Artesa, Coruña, 1996); Ourense Etnográfico (Deputación, Ourense 1998); Os Xogos Tradicionais en Galicia (Proxecto Galicia. Hércules, A Coruña 1999); Festas populares de Galicia (serie con diapositivas); (Baía , A Coruña 1997); Os primeiros galegos: prehistoria e arqueoloxía de Galicia (Lea, Santiago 2003); Memoria do Carballiño (Xerais, Vigo 2003); Xaquín Lorenzo Fernández (Baía ? 2004) e a tradución ao galego de ´As mulleres do monte, memorias dun neno da posguerra´ de X. Antonio Gurriarán López (Galaxia-2015) ente outras obras.
Como nos indica na sua benvida ao seu blog de comunicación, Felipen Senén nos anima ?... a coñecernos e facer país, a afiar a sensibilidade (en todos os sentidos, tamén os da intuición) para enxergar noso tempo, noso espazo, nosa sociedade, o devalar. Así entramos no ´Nós´ que somos, en relación tolerante cos demais: mirando atrás, facendo memoria, cun punto de partida nun camiño de buscas que nos identificará por onde pasemos, a casa e Galiza?.
Agrupación Cultural O? Facho
PARA ESCOITAR, CLIQUE DE SEGUIDO:
https://archive.org/download/felipe-senen/Felipe%20Sen%C3%A9n.mp3

Título: Efectos económicos perversos da burbulla eólica. Palestra do día 24 de xaneiro de 2023

A necesidade urxente que ten a Comunidade Económica Europea de substituír os combustibles fósiles, como consecuencia da guerra de Ucraína e pola necesidade de frear o cambio climático, está provocando unha importante demanda de enerxía de orixe renovable.
Esta demanda está xerando unha burbulla especulativa, provocada polas empresas eléctricas, que choca coas profundas deficiencias lexislativas, normativas e de planificación do Estado Español e das Comunidades Autónomas.
Consecuencia de todo isoo son unha serie de efectos negativos sobre a saúde das poboacións afectadas, sobre o medioe sobre a economía dos territorios afectados.
En termos económicos o impacto negativo directo sobre os dereitos de propiedade e de uso do solo da implantación de parques eólicos non se compensa, nin a curto nin a longo prazo, nin coa creacion de empresas, postos de traballo e impostos sobre a produción eléctrica.

Leandro M. del Río Regos
Arquitecto e urbanista
Dende hai 30 anos exerze como profesional liberal, dos cales leva máis de 20 anos actuando como asesor e perito xudicial en asuntos relacionados coa ordenación do territorio, o urbanismo e o medio, de entidades e persoas particulares afectadas negativamente por proxectos de diverso tipo.
Na actualidade é técnico asesor de varias asociacións e plataformas que loitan por unha implantación racional das enerxías renovable e, en particular, da eólica.

PARA ESCOITAR, CLIQUE DE SEGUIDO

https://archive.org/download/leandro-del-rio/LEANDRO%20DEL%20RIO.mp3

Agrupación Cultural O? Facho

A Agrupación Cultural O? Facho de A Coruña o convida a asistir aos seus ciclos de palestras públicas do primeiro trimestre 2022-2023.

O dia 13 de decembro a gandeira e sindicalista agraria galega Isabel Vilalba falará, dentro do ciclo ?Terra e Futuro? sobre o tema: ?Mundo rural ? Presente e Futuro?.
Data e hora: martes, 13 de decembro de 2022 ás 8 do serán

Lugar: Portas Ártabras - Rúa Sinagoga 22 baixo. Cidade Vella - A Coruña

Isabel Vilalba Seivane, nada en Lourenzá en 1975 é unha gandeira e sindicalista galega. Neta de agricultores e filla de emigrantes en Suíza, co-rexenta unha explotación agro-gandeira en Lourenzá. En xuño de 2012 foi elixida secretaria xeral do Sindicato Labrego Galego, é reelixida como líder da organización ata 2024. Asemade, foi responsable da Secretaría das Mulleres do SLG.

A nivel internacional, como secretaria xeral do Sindicato Labrego Galego forma parte activa da Vía Campesiña (Movemento a nivel mundial de labregos e labregas), da Coordinadora Europea - Vía Campesiña (CE-VC) e da Coordinadora de Organizacións de Agricultores e Gandeiros (COAG).

Como sindicalista agraria reclama unha agricultura labrega, sostible, nun mundo solidario. Considera as explotacións agropecuarias como elementos imprescindíbeis na vertebración do medio rural e como garantes da paisaxe e de do medio natural galego. Unido a isto, esixe o mantemento do emprego na agricultura poñendo freo ao actual proceso de desaparición da explotación agrária familiar ligado á xusta remuneración do traballo de produción garantindo as rendas mínimas para vivir con dignidade do traballo de produción.

As suas acertadas chamadas acerca da vulnerabilidade da cidadanía urbana e consumidora a respecto das variacións da situación xeopolítica e sanitaria mundial e a que estamos no límite do desenvolvemento dun modelo intensivo e globalizado de produción e distribución de alimentos baseado no acceso a fontes de enerxía barata, constitúen a base da sua disertación.

Afrontar este futuro require unha firme aposta polo mantemento dunha produción agropecuaria galega baseada na agricultura familiar e dirixida aos produtos de calidade. Esta agricultura, como indica Isabel Vilalba, debe incorporar a conservación do medio como un custo obrigado na xusta remuneración dos produtos.

Asemade, a conservación da diversidade xenética das especies tradicionais agrícolas e gandeiras como patrimonio da cidadanía galega e mundial; o mantemento de actividades socioeconómicas diversas, a mellora das infraestruturas así como a dotación de servizos sociais adecuados ás necesidades do medio rural galego forman parte das suas demandas, en paralelo ás chamadas a prol da descentralización do poder sobre a política agrária, esixindo unha PAC que recolla a singularidade e diversidade da nosa agricultura.

PARA ESCOITAR, CLIQUE DE SEGUIDO

https://archive.org/download/isabel-vilalba/ISABEL-VILALBA.mp3

Agrupación Cultural O? Facho