Desde a Agrupación Cultural O Facho comunicámosvos a celebración do seguinte acto, dentro das Palestras públicas do segundo trimestre de 2026.

O vindeiro dia 14 de abril terá lugar unha actuación musical dos compoñentes do grupo A Quenlla Paloma Suanzes, Leire Barbadillo, Manuel Dopico e Baldomero Iglesias (Mero)

Data: 14 de abril, martes

Hora: ás 8 do serán

Lugar: Portas Ártabras - Rúa Sinagoga 22 baixo. Cidade Vella - A Coruña

Actuación de catro compoñentes de A Quenlla --Paloma Suanzes, Leire Barbadillo, Manuel Dopico e Baldomero Iglesias Dobarrio, coñecido artisticamente como Mero, profesor, cantante e escritor galego-- para dar entidade ao tema da importancia da nosa música no relato da identidade, de calquera identidade, pero neste caso concreto e particular, da nosa.

Desde a música tradicional á música de autor: Farémolo no exercicio de pezas que configuran a conciencia dun todo cultural, de nación que abre horizontes e dá luces a unha xeografía propia, máis humana e en propiedade. Todo iso relatado desde cantigas de poetas de limpo verso e de pezas populares, mesmo históricas e de amor, clarificadoras e cheas da lírica emoción e do sentimento que nos move.

A.C. O Facho

Desde a Agrupación Cultural O Facho comunicámosvos a celebración do seguinte acto, dentro das Palestras públicas do primeiro trimestre de 2026.

O vindeiro dia 7 de abril o historiador Diego Rodríguez González impartirá unha palestra co título: "Manuel Murguía: un folclorista atípico"

Data: 7 de abril, martes

Hora: ás 8 do serán

Lugar: Portas Ártabras - Rúa Sinagoga 22 baixo. Cidade Vella - A Coruña

Diego Rodríguez González licenciouse en Xeografía e Historia, especializándose en Historia Contemporánea e Biblioteconomía e Arquivística. Ocupou diversos postos como bolseiro, destacando na Biblioteca Nodal de Ourense, como profesor no Centro Bibliográfico Superior de Galicia e como técnico superior na Biblioteca Xeral da Universidade de Santiago. Responsable de Cultura na Barrié e académico correspondente da Real Academia Galega. Publicou numerosos artigos sobre Murguía e Rosalía e un libro que é unha edición do material das Rimas.

Desde 2011 colabora coa Real Academia Galega na renovación tecnolóxica do seu diccionario e a creación do Portal das Palabras, plataforma dixital iniciativa da Real Academia Galega e a Fundación Barrié para a promoción do léxico e do aprecio social pola riqueza lingüística de Galicia.

?Murguía achégase ao folclore cun método e uns obxectivos diferentes de case todos os outros colectores. As súas recollas son sempre mediadas e o seu interese histórico, antropolóxico e de construción nacional. Pero isto non significa un desleixo na transmisión dos valores lingüísticos e artísticos que as rimas que recolleu portaban e que hoxe son probablemente o máis relevante do seu legado como folclorista malgré lui?.

Agrupación Cultural O Facho

Desde a Agrupación Cultural O Facho comunicámosvos a celebración do seguinte acto, dentro das Palestras públicas do primeiro trimestre de 2026.

O vindeiro dia 24 de marzo o licenciado en Dereito e Ciencias Económicas Enrique Sáez Ponte impartirá unha palestra co título: ?O mundo e nós?

Data: 24 de marzo, martes

Hora: ás 8 do serán

Lugar: Portas Ártabras ? Rúa Sinagoga 22 baixo. Cidade Vella ? A Coruña. Ver mapa

Enrique Sáez Ponte (A Coruña, 1947) é licenciado en Dereito e en Ciencias Económicas pola Universidade de Santiago de Compostela e MBA do IESE (Barcelona).

Profesional da empresa privada, traballou durante trinta anos no Banco Pastor (orixinado en 1776), e ocupou postos de alta dirección nos derradeiros 14 anos desta etapa, que rematou no 2003 cando era Director Xeral Comercial. Asistiu a cursos de especialización sobre temas financeiros na Northwestern University (Illinois, USA) e na Cambridge University no Reino Unido.

Desde 2003 preside a Fundación Juana de Vega (1872) e o grupo Torres & Sáez (1894). Foi tamén presidente, dende 2009 ata 2014, da Unión de Almacenistas de Hierros de España (1910).

A actividade profesional, que o levou a dirixir ou presidir catro organizacións privadas de máis de 100 anos de antigüidade, ten reforzado o seu interese polos temas económicos e sociais, especialmente polos que teñen que ver co desenvolvemento, a organización dos estados modernos, a economía mergullada e a situación de Galiza. Intervén acotío en cursos e seminarios. Ten publicados numerosos artigos e tres ensaios: O mundo e nós (Xerais, 1999), La energía oscura del dinero (Netbiblo, 2007, Ediciones Europa 2021)e A liberdade no século XXI (Galaxia, 2017).

Na palestra, Enrique Sáez fará unha reflexión sobre a complexa situación socioeconómica e política internacional actual e o comportamento dunha Galiza máis aberta nese contexto.

Palestra:?Os lumes de 2025 e os que han vir. Sen defensa fronte á inacción política?. Pedro Alonso Iglesias
por O equipo do Facho.com|Publicado 28 de Febreiro de 2026
Desde a Agrupación Cultural O Facho comunicámosvos a celebración do seguinte acto, dentro das Palestras públicas do primer trimestre de 2026.

O vindeiro día 3 de marzo o naturalista, ecoloxista e licenciado en Ciencias Biolóxicas Pedro Alonso Iglesias pronunciará unha palestra co título:?Os lumes de 2025 e os que han vir. Sen defensa fronte á inacción política?.

Data: 3 de marzo, martes

Hora: ás 8 do serán

Lugar: Espazo Cultural Portas Ártabras- sito na Rúa Sinagoga nº 22-baixo 15001 A Coruña. Ver mapa

O noso convidado é Pedro Alonso Iglesias (Vigo, 1966). Socio da Sociedade Galega de Historia Natural en 1981, impulsa xunto con varios compañeiros e compañeiras a creación en 1983 da asociación ecoloxista e naturalista ERVA, que permaneceu activa na cidade olívica até 2006 e en Santiago de Compostela desde 2001 até 2010, data na que se disolve. Foi un dos dous representantes ecoloxistas que en 1991 participaron nas reunións da Mesa Forestal organizada pola Dirección Xeral de Montes da Consellería de Agricultura de Tomás Pérez Vidal, encarregada do seguimento institucional da elaboración do Plan Forestal de 1992, e da que se retirarían en protesta pola censura das propostas conservacionistas.

Profisionalmente, en 1993 foi un dos fundadores da empresa de consultoría ambiental Arcea Xestión de Recursos Naturais S.L., coa que desenvolveu diferentes estudos e traballos descritivos e de xestión de especies da fauna e de espazos naturais. Ten unha longa traxectoria na avaliación e seguimento do impacto ambiental de proxectos de enerxías renovábeis, desenvolvendo numerosos traballos dentro da empresa EMAT, S.L., na que tamén impulsou proxectos para a Xunta de Galiza de caracterización da poboación galega de toupeira de agua Galemys pyrenaicus ou de asesoramento na xestión do lobo.

En 2025 publicou o libro A fraga esborrallada. Crónicas naturalistas dacabalo de dous séculos, na Editorial Toxosoutos. Forma parte do colectivo que impulsa o blog de opinión e divulgación sobre incendios e xestión multifuncional do monte IncenDiario.

Desde a Agrupación Cultural O Facho comunicámosvos a celebración do seguinte acto, dentro das Palestras públicas do primeiro trimestre de 2026.

O vindeiro día 24 de febreiro o biólogo Orlando Gregorio Álvarez Álvarez pronunciará unha palestra co título:

O Courel, o Parque Natural que non foi.

Data: 24 de febreiro, martes

Hora: ás 8 do serán

Lugar: Portas Ártabras - Rúa Sinagoga 22 baixo. Cidade Vella - A Coruña

Orlando Gregorio Álvarez é veciño do Courel, defensor da vida da montaña e dos seus soutos, experimentado castañicultor e xubilado do ensino.

A.C. O Facho

Comunicámosvos a celebración do seguinte acto:

O xoves 5 de febreiro, ás 19:30 horas terá lugar na Real Academia Galega de Belas Artes (Praza do Pintor Álvarez de Sotomayor, 1) unha homenaxe á poeta Ánxeles Penas García.

No acto participarán: Xavier Seoane, Soledad Penalta, Carlos Pereira, Pedro Abeledo, Marta Pardo de Vera, Felipe -Senén e a homenaxeada; Ánxeles Penas.

O acto contará co acompañamento musical de Mijail Moriatov.

A.C. O Facho

CONCURSO DE TEATRO INFANTIL MANUEL LOURENZO 2026 CONVOCADO POLA AGRUPACIÓN CULTURAL O FACHO

Con Manuel Lourenzo na nosa memoria e asumindo un ano máis como propias as palabras de Juan Ramón Jiménez cando afirmaba que ?teatro infantil é
aquel que tamén lle gusta aos nenos?, a Agrupación Cultural O FACHO acordou convocar o Concurso de Teatro Infantil que levará a partir de agora o
nome de ?Manuel Lourenzo?, que se rexerá polas seguintes bases:
1º) Poderá optar ao devandito premio calquera persoa, sen restrición, sempre que a obra sexa inédita e escrita en lingua galega, -en calquera norma
ortográfica (AGAL, PADRÓN, RAG)- non representada, nin premiada noutros certames.

2º) Estabelécese un premio único de 500 ?.

3º) A obra, que non poderá exceder os 80 folios, será presentada por triplicado, en formato DIN A4, a dobre espazo e mecanografados por unha soa cara.
4º) Os orixinais para o Concurso enviaranse por correo ao enderezo:
- Caixa de Correos n.º 46, Oficina Principal da Coruña.
C.P. 15.001
Presentaranse baixo un lema, que figurará na portada dos textos enviados, e virán acompañados dun sobre pechado que conteña no exterior o lema da obra e, no interior, o nome, apelidos e teléfono do autor ou autora.

5º) O prazo de admisión de orixinais remata o día 16 de abril do 2026 ás doce da noite. O fallo do premio farase público no mes de maio.

6º) O/a gañador/a será elixido/a por un xurado nomeado pola Agrupación Cultural O FACHO. Devandito xurado está composto por persoas de recoñecido prestixio no ámbito teatral galego.

7º) O xurado poderá declarar deserto o premio do concurso e será o que deberá resolver aquelas situacións que se presenten e que non estean
contempladas nestas bases, así como as dúbidas que poidan existir na súa interpretación.

8º) A participación neste Certame implica asumir as bases deste.

9º) Os orixinais non premiados poderán ser retirados, no prazo de 30 días, previo correo dirixido ao enderezo postal da agrupación. No caso de que o
autor ou autora non resida na Coruña poderá solicitar que lle sexan enviados por correo postal.

Esta convocatoria entrará en vigor ao día seguinte da súa publicación nos medios.

Agrupación Cultural O Facho
A Coruña, 30 de xaneiro de 2026

CONCURSO DE POESÍA CONVOCADO POLA AGRUPACIÓN CULTURAL O FACHO

 
A Agrupación Cultural O FACHO convoca o Concurso de Poesía O Facho 2026, que se rexerá polas seguintes bases:
 
1º) Ao premio de poesía de O Facho poderá concorrer calquera persoa até os 35 anos de idade e sempre que non publicase ningún libro individual de poesía e a obra sexa inédita e non fose premiada con anterioridade en calquera outro concurso ou certame.

A obra presentada debe estar escrita en lingua galega en calquera das tres normas ortográficas (AGAL, PADROM, RAG) e cun máximo dunha obra por
autor. É responsabilidade do xurado do premio determinar se algún dos traballos presentados posúe ou non as características para ser considerado
?libro?. Xa que logo, recoméndase que teñan unha extensión mínima de 300 versos.

2º) Os orixinais para o Concurso enviaranse por triplicado debidamente encadernados, en formato DIN A4, a dobre espazo e mecanografados por unha
soa cara ao enderezo postal: 

 Caixa de Correos n.º 46, Oficina Principal da Coruña.
Código Postal: 15.001

Presentaranse baixo un lema, que figurará na portada dos textos enviados, e virán acompañados dun sobre pechado que conteña no exterior o lema da obra e, no interior, o nome, apelidos e teléfono do autor ou autora.

3º) Estabelécese como premio único a edición pola Editorial MEDULIA da obra premiada. O Facho fará a entrega ao/à autor/a dun máximo de 15
exemplares.

4º) O prazo de admisión de orixinais remata o día 16 de abril de 2026 ás doce da noite. O fallo do premio farase público no mes de maio.

5º) O/a gañador/a será elixido por un xurado nomeado pola Asociación Cultural O FACHO. Devandito xurado estará composto por persoas de recoñecido
prestixio no ámbito da escrita literaria, da edición ou da crítica.

6º) O xurado poderá declarar deserto o premio do concurso e resolverá aquelas situacións que se presenten e que non estean contempladas nestas
bases, así como as dúbidas que poidan existir na súa interpretación. Así mesmo, o xurado escollerá de entre os traballos presentados un único libro.
Ademais, poderá deixar constancia na acta outros títulos que considere merecedores de ser publicados, non significando isto ningún compromiso por
parte de O Facho. Non se fará referencia na acta ao nome dos autores ou autoras dos libros mencionados.

7º) O Facho disporía do prazo de un ano para editar o libro. Transcorrido ese tempo, o autor ou autora poderá dispor da obra coa única condición de que
deberá deixar constancia do galardón en sucesivas edicións do libro.

8º) A participación neste Certame implica asumir as súas bases.

9º) Os orixinais non premiados poderán ser retirados, no prazo de 30 días, previo correo dirixido ao enderezo postal da Agrupación. No caso de que o
autor ou autora non resida na Coruña, poderá solicitar que lle sexan enviados por correo postal.

10º) Esta convocatoria entrará en vigor ao día seguinte da súa publicación nos medios de comunicación.
 
 

Agrupación Cultural O Facho
A Coruña, 25 de xaneiro de 2026

Desde a Agrupación Cultural O Facho comunicámosvos a celebración do seguinte acto, dentro das Palestras públicas do primeiro trimestre de 2026.

O vindeiro día 13 de xaneiro o enólogo, investigador e divulgador Alfonso Losada Quiroga pronunciará unha palestra co título:

?Denominacións de orixe dos viños de Galicia: a importancia das variedades autóctonas?.

Data: 13 de xaneiro, martes

Hora: ás 8 do serán

Lugar: Portas Ártabras - Rúa Sinagoga 22 baixo. Cidade Vella - A Coruña

Alfonso Losada é natural de Tuiriz e na actualidade reside en Ourense. Funcionario de carreira da Xunta de Galicia, a súa formación académica é de Enxeñeiro Técnico Agrícola e Master en Viticultura, Enoloxía e Marketing de Viños. Conta cunha unha longa traxectoria investigadora na Estación de Viticultura e Enoloxía de Galicia (EVEGA), onde foi xefe de sección de Viticultura e de Enoloxía.

Cunha ampla formación na materia, é un amante e divulgador dos viños galegos. Xunto coa actividade investigadora e divulgadora, realizou labores de formación e divulgación en diversos cursos, xornadas e charlas, así como de asesoramento técnico a viticultores e adegas. Participa como membro de comités de cata e certificación en numerosos eventos nacionais e internacionais e colabora asiduamente en varios medios de comunicación.

A.C. O Facho