A Associaçom Cultural Revira de Ponte Vedra manifesta a mais profunda solidariedade com o historiador Dionísio Pereira e com a associaçom “Verbo Xido”, após os ataques que estám sofrendo por parte de sectores da extrema direita da comarca de Cerdedo.
Diferentes análises históricas publicadas em diversos livros que recolhem os nomes de destacados dirigentes fascistas que após Julho de 1936 participárom activamente na repressom contra militantes operários e de esquerda na comarca de Terra de Montes, levam ao historiador aos julgados de Cerdedo esta quinta feira 15 de Fevereiro.

Continua:

A Associaçom Cultural Revira quer lembrar e reconhecer o contributo de Dionísio Pereira com a nossa associaçom e a sua participaçom em diversas palestras como a que tivo lugar em Março de 2004 com motivo do Dia da Classe Operária Galega; assim como o seu rigoroso contributo que de há décadas leva a cabo a prol da restauraçom e recuperaçom da nossa história colectiva, nomeadamente da classe trabalhadora galega, exercendo a necessária higiene democrática de denúncia dos repressores e de dignificaçom das vítimas.

A Associaçom Cultural Revira manifesta a sua mais enérgica repulsa às tentativas inquisitoriais que familiares de fascistas vinculados à represom franquista pretendem seguir impondo sete décadas depois.

Pessoas como Dionísio Pereira e associaçons como “Verbo Xido”som muito necessárias pois exercem como "consciência colectiva" e voz crítica num Estado que se considera democrático, mas que nunca julgou aos fascistas e inimigos do povo e da liberdade, todo o contrário, garantiu-lhes umha total impunidade e a possibilidade de seguir coacionando ao povo.

Recebe Dionísio, amigo, umha forte aperta solidária da Associaçom Cultural Revira.

Ponte Vedra, 14 de Fevereiro de 2007